رۋحانيات • 10 قىركۇيەك، 2020

ابىزدىڭ ابىزدىعىن ايقارا اشقان

190 رەت كورسەتىلدى

«ابىز ءابىش»... الاشتىڭ ايماڭداي دارا تۇلعالارىنىڭ بىرىنە اينالعان ءابىش كەكىلباەۆتىڭ ويشىلدىعىن تولعاعان وسىناۋ كىتاپتى جازۋعا ساليقالى قالامگەر، مايتالمان مادەنيەتتانۋشى ساۋىتبەك ابدراحمانوۆ سوناۋ جاس شاعىنان باستاپ ءومىر بويى ىشتەي، ۇزبەي، تەرەڭ دايىندىق جاساعانداي كورىنەدى. الاشتىڭ ءابىشىن قىرىق جىل قاتار جۇرگەن ساۋىتبەك ىنىسىنەن ارتىق بىلەر، كەڭىنەن تۇسىنەر ادام بار دا شىعار، بىراق نەكەن-ساياق بولار.

كىتاپتى زەيىن سالا، قىزىعا وقىپ شىققاندا العاش تۇيگەن ءبىر ويىمىز: بۇل تولعانىستاردى جازباۋعا ساۋىتبەكتىڭ حاقىسى جوق ەكەن. بۇل ونىڭ قولىنا قالام الماسقا ءاددىسىن قالدىرماعان ادامي ءھام ازاماتتىق ميسسياسى، الاتاۋداي اعا الدىنداعى اسىل پارىزى ەكەن. تاعى ءبىر تۇيسىنگەنىمىز: سول پارىزدى مەيلىنشە ادال اتقارىپ، جاۋاپتى مىندەتىن تاماشا ورىنداپ شىققان. كەمەل تۇلعانىڭ كوزى تىرىسىندە سىيلاسقان سىرمىنەزدەردىڭ ىشىنەن ساۋىتبەكتىڭ سۋىرىلىپ، ءابىشتانۋدى سونىعا سالۋى، جوعارى دەڭگەيگە كوتەرىپ، كوپ جىلدارعى ىزدەنىستىڭ ارقاسىندا ەل نازارىن اۋدارعان ەلەۋلى دۇنيە تۋدىرۋى سۇيىنەرلىك عانيبەت جاعداي، ءارى-بەرىدەن سوڭ ەلدىگىمىز بەن بىرلىگىمىزدىڭ دە بەلگىسى. كەكىلباەۆتىڭ كەمەڭگەرلىگىن ايشىقتاعان، ويشىلدىعىن زەردەلەگەن 557 بەتتىك بۇل كىتاپ ارقىلى ونىڭ اۆتورىنىڭ دا كەلىستى كەمەلدىگى، وي-تانىمىنىڭ بيىك ورەسى مەن كەڭ ءورىسى كورىنبەي قالمادى.

ارينە، ۇلىلىق ۇلاعاتىن ءاربىر سوزىڭدە دالەلگە، دايەككە جۇگىنە وتىرىپ، ورمەگىن سەتىنەتپەي كەستەلەۋ وڭاي ەمەس. وسى ارادا اۆتورعا ءوزىنىڭ ءومىر تاجىريبەسى، باستان كەشكەن عيبراتتى مىسالدار كومەككە كەلەدى. بىرەۋىن عانا ايتايىق. ادامزاتتىڭ ايتماتوۆى اتانعان شىڭعىس ايتماتوۆتان جيىرما تورتتەگى ساۋىتبەك سۇحبات الىپ، سوڭىنا قاراي تاقىرىپتان اۋىتقىپ، جاي قىزىعۋشىلىقپەن قازاق قالامگەرلەرى، ونىڭ ىشىندە ءابىش كەكىلباەۆ تۋرالى پىكىرىن سۇرايدى ەمەس پە. بۇل اڭگىمەنىڭ دە دراماسى، تۇزدىعى جەتكىلىكتى. شىقاڭنىڭ اۋزىنان ءا دەگەندە شىققان جاۋابى ءسال تىكسىنتىپ تاستايدى. «وي، ونى ايتپا» دەيدى ول كىسى. بۇل «ارالارى ناشار ەكەن عوي، قاپ، بەكەر سۇراپپىن» دەپ ويلاپ، ەسىن جيعانشا شىڭعىس اعاسى تاعى دا «ونى قوي» دەپ نىعارلايدى. جاس سۇحباتشى جىگىتتىڭ ەڭسەسى ودان ارمەن ءتۇسىپ، ءاپ-ساتتە قارا اسپان جاۋىپ كەتكەندەي كۇي كەشەدى. سويتسە، اقىرىن تىكتەلىپ، جۇزىنە قاراسا... جالپاق جاھانعا بەلگىلى جازۋشى جىميىڭقىراپ تۇر ەكەن. سالدەن سوڭ ويىن جيناقتاپ، سالماقتى تۇردە: «ون نەيسچەرپاەمىي» دەيدى... ايتماتوۆتىڭ كەكىلباەۆقا بەرگەن كەسىمدى باعاسى. تاۋسىلىپ بىتپەس، ءتۇپسىز تەرەڭ تەلەگەي-تەڭىز دەپ ەسەپتەيدى ەكەن. ۋا، بارەكەلدى! وسى ءسوزدى ايتقان شىقاڭا، ونى جادىندا قاستەرلەي، سارى مايداي ساقتاپ، ونداعان جىلداردان كەيىن بىزگە جەتكىزگەن ساۋىتبەككە دە، ءدۇيىم دۇنيەگە ءماشھۇر دۋالى اۋىزدىڭ سونداي كەرەمەت باعاسىنا لايىقتى الاشتىڭ ايدىندى، اسقار بيىك پەرزەنتى بولىپ تۋعان ءابىش اعاتايىمىزعا دا مىڭ دا راقمەت. تۋساڭ تۋ!

ەل ءابىش كەكىلباەۆتى نەگىزىنەن جازۋشى دەپ بىلەدى. ال بۇل كىتاپتا اۆتور ونى سۋرەتكەر رەتىندە ەمەس، ويشىل رە­­تىندە قاراستىرۋدى ماقسات تۇتقان. كەكىل­­باەۆتىڭ كوركەم سوزىنە ەمەس، كوسەم سو­زىنە كوبىرەك نازار اۋدارعانىن ءوزى دە بىر­نەشە مارتە قاداپ تۇرىپ ايتادى. تۇتاس قامتىلار بولسا، ءبىر بويىندا جازۋشىنىڭ، اقىننىڭ، دراماتۋرگتىڭ، اۋدارماشىنىڭ، مەملەكەت قايراتكەرىنىڭ، ساياساتكەردىڭ، سايا­سات­تانۋشىنىڭ، تاريحشىنىڭ، فيلو­سوف­تىڭ، مادەنيەتتانۋشىنىڭ، ونەر­تانۋ­شىنىڭ، ولكەتانۋشىنىڭ، الەۋمەت­تانۋشىنىڭ، ءپۋبليتسيستىڭ، ءجۋرناليستىڭ، شەشەننىڭ قابىلەت-دارىنىنىڭ تاماشا توعىسۋى ءارى سونىڭ ءبارىن دالا دا­نىش­پاندىعىنىڭ قاينارىنان سۋارۋى ءابىش كەكىلباەۆتى شىن مانىندە الىپ قۇبىلىسقا اينالدىرعانى بۇل كۇندە كوكىرەك كوزى اشىق قاۋىم-جۇرت­شىلىققا بەلگىلى اقيقات، ءبىراۋىزدان مويىندالعان فاكت. مۇنداي فەنومەننىڭ اق الماستاي الۋان قىرىن ءبىر كىتاپتىڭ قۇشاعىنا سىيعىزۋ استە مۇمكىن ەمەستىگىن ساۋىتبەك ابدراحمانوۆتىڭ وڭتايلى ەسكەرگەنى دە قۇپتارلىق جاي. سول سەبەپتەن دە ول بۇل ەرەكشە ەڭبەكتە قازىنالى تالانت يەسىنىڭ اۆتوردىڭ ءوزىنىڭ وڭ جامباسىنا ءدوپ كەلەتىن مادەنيەتتانۋشىلىق، ونەرتانۋشىلىق، ساياساتتانۋشىلىق، تا­ريح­شىلىق، ادە­بيەت­­تانۋشىلىق، ولكە­تانۋشىلىق قىر­لا­رىن بولەك-بولەك زەرتتەۋ نىساناسى ەتىپ الىپ، سول ورايداعى سيپاتتارىن ايقارا اشادى، بۇرىنعى وتكەن اباي حاكىم، احمەت ۇستازداردىڭ جالعاسىنداي بولعان زاما­ناۋي قازاق عۇلاماسىنىڭ الەمدىك اۋقىمداعى اسقان ويشىلدىعىن جان-جاقتى زەردەلەپ تانىتادى. كىتاپتا زاماننىڭ زاڭعار ويشىلىنىڭ بىرەگەي تۇلعاسى، ءبۇتىن بەينەسى سومدالىپ شىعادى. كوركەم وبراز ەمەس، لوگيكالىق قيسىنمەن، تالدامالىق پايىممەن، ساراپتامالىق سارابدالدىقپەن، پۋبليتسيستىك تولعاممەن، تەرەڭ تۇيسىكپەن قالىپتالعان ءابىشتىڭ ابىزدىق سيپاتى اشىلادى. قازىرگى قا­زاق جۋرناليستيكاسىنداعى سەركەسوز ساڭ­لاعى عانا ەمەس، ول ءارى ادەبيەتتانۋشى عالىم، بايىپتى مادەنيەتتانۋشى، كىتاپ­قۇمارلىعى ستۋدەنت كەزىنەن-اق اڭىز بول­عان ساۋىتبەكتىڭ دە بىلىمپازدىعى كە­كىلباەۆتاي كەمەلدەرمەن كەلەلى كەڭەستەر قۇرىپ، اپتالاپ جانىندا جۇرۋگە، ساعاتتاپ اڭگىمەلەسۋگە، كەمەڭگەردىڭ كوڭىلىنەن شىعۋعا ابدەن جاراعانىن دا بىلەمىز، بۇل جايدى وسى ەڭبەكتى وي كوزىمەن وقىپ شىققاندا دا بايقايمىز. ءوزىنىڭ دە مەملەكەت پەن قوعام ىستەرىندەگى تاعىلىم-تاجى­ريبەسىنە قوسا، قايراتكەرلىگى مەن سا­نات­كەرلىگى ەشكىمنەن كەم تۇسپەيتىن، بەس قارۋى ساي ساۋىتبەك ابدراحمانوۆتىڭ ابىشتەي ابىزدىڭ الىپ الەمىن يگەرۋگە شىعارماشىلىق تا، بىلىك­تىلىك تە، بىلىم­دىلىك تە الەۋەتى مولىنان جەتكىلىكتى بول­عانىن كورەمىز.

ۇلىلىق ۇلاعاتىن ۇعىندىرۋدى نىسا­نالاعان ءبىرىنشى تاراۋ كىتاپتىڭ بارشا مازمۇن-ماعىناسىنىڭ، كونتسەپتسياسىنىڭ كىلتى سياقتى. كەمەڭگەرلىكتىڭ باستاۋ-بۇ­لاق­تارى، ارنالى سىرلارى وسى تاراۋدا اعىتىلادى، تۇلعانىڭ جەكە باسىنىڭ ۇل­گىسى، رۋحاني ساقيلىعى، «سۇرتىلمەس جادى»، ەرەك­شە زەرەكتىگى ناقتى نۇسقالادى. ەندى ءبىر ارەدىكتە زامانداستارى ايتاتىن ءتورت قاسيەتتى العا تارتىپ، دارىن قۋاتى، ۇشان-تەڭىز ءبىلىمى، تىنىمسىز ىزدەنىسى، الاپات جۇمىس قابىلەتى ءوزىمىز بۇل كۇندە كوكتەن تۇسكەندەي كورىپ-بىلە قالعان كەكىلباەۆ فەنومەنىن دۇنيەگە قالاي الىپ كەلگەنىن دالمە-ءدال تاپسىرلەپ، تامىرشىداي تاپ باسىپ، ياعني وسى عاجايىپ قۇبىلىستىڭ تابيعاتىن تۋرالاپ تانىتىپ بەرەدى ءارى سونى ايعاقتاۋ ءۇشىن ونداعان ومىرلىك، بۇلتارتپاس مىسالدار كەلتىرەدى. ءيا، تولستوي تۋرا­لى گازەتتىڭ تاباقتاي ءبىر بەتىن تۇتاس الىپ جاتقان تراكتاتتى ءبىر تاۋلىككە جەت­­­كىزبەي جازىپ تاستاۋ كەكىلباەۆتىڭ عا­نا قولىنان كەلەر كەمەڭگەرلىك ەمەس پە؟! نەمەسە كىتاپ اۆتورىنىڭ اقپارات ءمي­نيسترى كەزىندە، 2003 جىلى «مادەني مۇ­را» مەملەكەتتىك باعدارلاماسى اياسىندا 100 تومدىق «الەم ادەبيەتى» سەرياسىن جا­ساقتاۋعا ءابىش ءبىلىمپازدىڭ ەدەل-جەدەل قوسقان اقىلى، الەم ادەبيەتىن جاڭعاقتاي شاعىپ اتاعان كىتاپتارى سول جوبانىڭ ابىرويىن كوتەرىپ، كەنەرەسىن تولتىرعانىن دا ەندى ءوزىنىڭ «ىرزادارلىقپەن» ەسكە الۋى ءبىر عاجاپ. ال سايلاۋ الدىندا بايان­اۋىلدا بولعان جيىنداعى باياعىنىڭ بي­لەرىندەي ايتقىر ءابىشتىڭ كوشەلى شەشەن سوزبەن الماستاي جارقىلداپ، ارۋاقتى ەلدىڭ اقساقالدارىن ۇيىتقان ءساتى ءتىپتى ادەمى بەرىلگەن، ورايلى جەتكىزىلگەن. مول­دىرەگەن مولتەك مىسالدان، تاعىلىم شاشقان توسىن تامسىلدەن ءابىش اسقارى ودان سايىن بيىكتەپ، ءدۇيىم قازاقتىڭ ۇكىلى ءۇمىتى، پاراسات شىڭىنداعى شامشىراعى ەكەندىگى اسا ءبىر پارىقتىلىقپەن پاش ەتىلەدى. ايتىلعان ساتىندە جۇرتتىڭ ايىزىن قاندىرىپ، بايان­اۋىل ەلىندە ءابىشتى اسقاقتاتىپ اكەتكەن، حان كوتەرتكەن وسىن­داي ايتقىر شەشەندىكتىڭ ءار-ءار جەر­دەن القا-مارجانداي ءتىزىلىپ بەرىلۋى وقىر­ماننىڭ ايىزىن قاندىرىپ، ءارى كىتاپتىڭ قۇندىلىعىن، قىزىقتىلىعىن ارتتىرا تۇسكەن. مۇنشاما وقيعالى، عيبراتتى ءومىر مىسالدارىن قايدان، قالاي جيناي بەر­گەنىنە تاڭ قالاسىز، اۆتوردىڭ تيا­ناق­تىلىعىنا ەرىكسىز تامساناسىز.

ودان سوڭ ءابىش كەكىلباەۆتىڭ ەڭ ءبىر قوردالى قىرلارىنىڭ ءبىرى – مادەنيەت­تانۋشىلىعىنا ويىسىپ، وسى قاسيەتىنە تەرەڭدەي بويلاپ، دەندەپ ەنەمىز. بۇل تاراۋدى بەينەبىر مادەنيەتتانۋ وقۋلىعى، وسى تاقىرىپتاعى عىلىمي-تانىمدىق پايىمداما دەرسىز. مادەنيەت تۋرالى تۇسىنىگى كىتاپحانا مەن كلۋب، كوركەمونەرپازدار ۇيىرمەسى، ءارى كەتسە تەاتر توڭىرەگىنەن اس­پاي­تىن اڭعالدار وقىسا دەيمىز-اۋ وسى كى­تاپتى. ناعىز مادەنيەت مايەگىنە قانى­عار ەدى. كەكىلباەۆ تالانتىنىڭ بۇل قىم­بات قىرىنا كەلگەندە مادەنيەتتانۋشى ابدراح­مانوۆ الامان بايگەگە شاپقان ار­عى­ماق­تاي كوسىلەدى. «مادەنيەت» ۇعىمى حا­قىنداعى ارعى-بەرگى پايىمداردى اعىل-تەگىل اقتارىستىرىپ العا تارتادى. ارى قاراي كەكىلباەۆتىڭ مادەنيەتتى – ادامزات قوعامى دامۋىنىڭ بارلىق ساتىلارىن قامتيتىن بىرەگەي قۇبىلىس، ءومىر ءسۇرۋ ونەرى، مادەنيەتتانۋدى – عىلىمنىڭ جە­كە ءپانى رەتىندە قاراستىرىپ، مەيلىنشە كەڭ اۋقىمدا تانيتىنى اتاپ كورسەتىلەدى. وسىناۋ تولىمدى تولعانىستاردى زەيىن­دەپ وقۋ بارىسىندا ءاربىر ۇلتجاندى پات­ريوتتىڭ كەۋدەسىن قازاقتىڭ مادەني ماتە­ريالدىق مۇراسىنىڭ بايلىعى ءۇشىن، كونە جادىگەرلەرىمىزدىڭ ىقىلىمنان ءۇن قاتقانى ءۇشىن، كوشپەندىلەردىڭ ادامزات مادەنيەتىنە قويان-قولتىق قاتىستىلىعى ءۇشىن ماقتانىش سەزىمى كەرنەيدى.

ونەر – مادەنيەتتىڭ ءبىر بولشەگى دەسەك، قالامگەردىڭ ونەرتانۋشىلىق قىرى دا قالىس قالماعان. سەبەبى، ونەر ادامدارى، ونەرنامالىق شىعارمالار تۋرالى ءومىر بويى ءدال ابىشتەي تولاسسىز تولعاعان، تو­گىلدىرىپ جازعان، زەرگەردەي زەرلەپ ىزعان قالامگەر كەمدە-كەم، تىپتەن، جوق دەسە دە بولعانداي. قانشاما ماقالالاردى بىلاي قويعاندا، قازاق ونەرىندەگى تاۋ تۇلعالاردىڭ شىعارماشىلىق پورترەتتەر، مەرەيتويلىق باياندامالار – قىرۋار قازىنا.

قاي ءبىر تۇستا ونەرتانۋشىلىقتىڭ ومىر­­تانۋشىلىققا ۇلاسۋى تۋرالى تىڭ ويدىڭ شەتىن شىعارادى. كەكىلباەۆ كۋلتۋرولوگياسىندا مادەنيەتتىڭ تەك مادەني قۇبىلىس رەتىندە قاراستىرىلمايتىنى ۇلكەن ارتىقشىلىق ەكەنى ايتىلىپ، بۇعان دا بۇلتارتپاس دالەل-دايەكتەر كەلتىرىلەدى. كەشەگى كەڭەستىك كەزەڭدەگى ءبىر جيىندا رەتى كەلىپ قالعاندا روك مۋزىكا تابيعاتىن تالداي اشىپ تاڭعالدىرعان ءابىش كەكىلباەۆ 2001 جىلى تۇركياعا بارعان ساپارىندا ءاز ناۋرىزدىڭ كۇللى تۇركىگە ورتاق مە­رەكە ەكەنىن، ونىڭ ىشىندە تۇرىكتىڭ دە ۇلتتىق مەيرامى اتانۋعا لايىقتىلىعىن كەلىستىرە، ايىز قاندىرىپ ايتقاندا كارداشتار دۇرىس سوزگە ءيىلىپ ءتۇسىپ، كەيىن ناۋرىزدى ۇلى دۋمان، ۇلتتىق توي-مەرەكە رەتىندە اتاپ وتەتىن بولعان عوي... سوعان كۋا ساۋىتبەك ايتپاسا مۇنى دا بىلمەس ەدىك. ونەرتانۋدىڭ ناعىز ومىرتانۋعا ۇلاسۋى وسى شىعار.

ەل ەگەمەندىگىنىڭ اراي تاڭىنداعى ءتىل تارتىسى كەزىندەگى كەكىلباەۆ كۇرەسكەرلىگىنەن، ارينە، كوپ جۇرت بۇرىننان-اق حاباردار. مىنا كىتاپتا سول ءتىل تاعدىرى شەشىلگەن تايتالاس كۇندەر وقيعالارى بۇگە-شىگەسىنە دەيىن تاپتىشتەلىپ، تەرگەلىپ، زور مايداندا قالامىن ەگەۋلى نايزا، شەشەن ءتىلىن سۇر جەبە ەتىپ ەلدىك مۇددە جولىندا قاسقايىپ شىققان ەر تۇلعاعا دەگەن قۇرمەتىڭىزدى ەرەسەن ارتتىرا تۇسكەندەي. قالامگەر رە­تىندە ءتىل تۋرالى، ونىڭ الۋان ماسەلەلەرى حا­قىندا كوپ ايتقانى، كوپ جازعانى، كور­كەم سوزىندە دە، كوسەم سوزىندە دە، مادە­نيەت­تانۋشىلىعىندا دا ءتىل شۇرايىن، افو­ريستيكاسى مەن ەۆفونياسىن ورايلى پاي­دالانعانىن دا، تاريحي لەكسيكولوگيامىزدى قالاي بايىتقانىن دا جەرىنە جەتكىزە ايتادى. ءيا، ءابىش كەكىلباەۆ – انا ءتىلىمىزدىڭ ايبىنىن اسىرىپ، ايدىنىن تاسىتۋعا ەرەن ەڭبەك سىڭىرگەن ەر دەسە، سول تۇجىرىمعا قالتقىسىز قول قويامىز، رياسىز سەنەمىز.

ءتاۋ ەتەر تاۋەلسىزدىگىمىزدىڭ ءابىش كەكىل­­باەۆتاي جارشىسى، سونىڭ باياندى­لى­عى­نىڭ بايىپتاپ قورعاۋشىسى، ەلدىڭ وتكەنىن، بۇ­گىنى مەن بولاشاعىن كەمەل ويدىڭ ەلە­گىنەن ساناتتاپ وتكىزۋشىسى بول­عاندىعى حالقىمىزدىڭ ماڭدايىنا بىتكەن باقپەن پاراپار-دى. بۇل كەزدە قازاققا قالامگەر ابىشتەن گورى قايراتكەر ءابىشتىڭ كەرەگىرەك بولعاندىعىن دا دالەلدى ايتادى. ءيا، «تاۋەلسىزدىك تولعاۋى»، «بەتەردەن دە بەتەر بار»، باسقا دا كلاسسيكالىق پۋبليتسيستيكا تۋىندىلارى ءدال وسى تۇستا جازىلدى، تاۋەلسىزدىكتى كەۋدەسىن وققا توسقان قاس باتىرداي قورعاعان جاۋىنگەر سوزدەر تال­قىلى مىنبەرلەردەن ءدال وسى الماعايىپ كەزدەردە ايتىلدى.

ەندى ءبىر ورايدا عالىمدىق قاسيەتپەن تاريحتان تاعىلىم تارتقان تاريحشىل كەكىلباەۆپەن ۇشىراسامىز. ۇلت تاري­حىنىڭ تالاي كومەسكى بەتتەرىن تاريحشىلاردان بۇرىن تۇگەندەپ بەرگەن تاريحي-تانىمدىق تۋىندىلارىنا جۇگىنەمىز. «تالايعى تاراز»، «تۇركىستان تاعىلىمى» اتتى تاريحي بايان، تاريحنامالىق ەسسە­لەرىنەن باعزىدان بۇگىنگە جەتىپ سال­تا­­نات قۇرعان قازاق مادەنيەتىنىڭ كەرە­مەتتىگىمەن كوزبە-كوز جۇزدەسەمىز. بۇلار­دى بىلاي قويعاندا، «ۇركەر» مەن «ەلەڭ-الاڭ» ديلوگياسى، بۇكىل كوركەم شىعار­ماشىلىعى تۇنىپ تۇرعان تاريح ەمەس پە. «شاندوز» دەرەكتى-تاريحي بايانىندا ماحامبەتتانۋدى جانا بيىككە كوتەرىپتى. العاشقى بەيبارىستانۋشىمىز جانە دە ءابىش كەكىلباەۆ ەكەن. بۇل جايدى دا ساۋىتبەكتىڭ ەڭبەگىنەن ءبىلىپ سۇيىنەمىز. جاي عانا ءبىلىپ قويمايمىز، تەرەڭ تالداۋى ارقىلى جان-جاقتى زەردەلەپ تانيمىز.

ءابىشتىڭ ادەبيەت الەمىندەگى نەمەسە الەم ادەبيەتى ورايىنداعى بىلىم­پازدىعىن باجايلاپ بايىپتاعان كەزدە تىپتەن ەلىكتىرىپ باۋراپ الادى. كەزىندە «فولك ۋند ۆەلد» باسپاسى انىقتاعان «جيىرماسىنشى عاسىردىڭ 100 ۇزدىك جازۋشىسى» قاتارىنا كەڭەستىك ادەبيەت كلاسسيكتەرى شولوحوۆ، پاستەرناك، احماتوۆا، عامزاتوۆتارمەن قاتار ەنىپ، قازاق كوركەم ءسوزىنىڭ اتاعىن اسىرعانىن دا ەسكە سالىپ، مەرەيىمىزدى تاعى ءبىر تاسىتىپ قويادى. سونداي ءابىشتىڭ قازاق ادەبيەتىنىڭ، قالامداستارىنىڭ ءاربىر تابىسىنا قۋانا قالام تارتپاعان كەزى دە جوق ەكەنىن نەشەمە مىسالمەن ەجىكتەپ ايتۋدى ۇمىتپايدى. وسىنداي كوپ-كوپ جاقسى قاسيەتتەرىمەن ساۋىتبەكتىڭ كىتابى جانعا شۋاق توگىپ، ساۋلە سەبەلەيدى دەر ەدىك. زياتكەر تۇلعا رەتىندە تانىمال اۆتور شىن مانىندە ساقي دا سارابدال دۇنيە تۋدىرعان. بۇعان بارشامىز قۋانامىز.

«ابىز ءابىش» اتتى تولعانىستار كىتا­بىن ۇلت كەمەڭگەرىنىڭ ۇلى رۋحىنا سومدالىپ سوعىلعان ەرەن ەسكەرتكىش دەپ باعا­لاساق، اقيقاتى دا، ءادىلى دە سول. ءبىزدىڭ ۇلت­تىق ماقتانىشىمىز بولىپ تابىلاتىن ابىشتەي ابىزدىڭ ابىزدىعىن ايشىقتى اشقان، تالانت تەگەۋرىنىن تەرەڭ تانىتقان بۇل كورنەكتى كىتاپقا الداعى الاماندا اق جول تىلەيمىز. ايتقانداي، بايگەنىڭ ىرىكتەۋ تۋرىندا تارازىعا تارتىلعان تۋىندىلاردىڭ اراسىندا ەڭ كوپ داۋىس العان ەڭبەك تاپ وسى كىتاپ بولعانى دا ءۇمىتىمىزدى ۇكىلەي تۇسكەندەي.

 

قورعانبەك امانجول،

حالىقارالىق «الاش» ادەبي سىيلىعىنىڭ لاۋرەاتى

سوڭعى جاڭالىقتار

ساقتانساڭ – ساۋ بولارسىڭ

ايماقتار • بۇگىن، 23:00

تسيرك - الەم نازارىندا

قازاقستان • بۇگىن، 20:51

ۇقساس جاڭالىقتار