اۋىل شارۋاشىلىعى ءبىرىنشى ۆيتسە-ءمينيسترى ايداربەك ساپاروۆتىڭ ايتۋىنشا, بيىلعى كوكتەمگى ەگىس جۇمىستارى قاتاڭ كارانتين رەجىمىندە ءوتتى. سونداي-اق جاز ماۋسىمىندا بىلتىرعىداي قۋاڭشىلىق بولدى.
– سوعان قاراماستان, ەگىس ناۋقانى ۋاقتىلى جۇرگىزىلدى. فەرمەرلەر ساپالى ەگىس ماتەريالدارىمەن, ارزانداتىلعان تىڭايتقىشتارمەن, وسىمدىكتەردى قورعاۋ قۇرالدارىمەن, تەحنيكامەن قامتاماسىز ەتىلدى. قازىر رەسپۋبليكانىڭ بارلىق وڭىرلەرىندە ەگىن ورۋ جۇمىستارى جۇرگىزىلىپ جاتىر. جۇمىس قارقىنى وتكەن جىلمەن سالىستىرعاندا جوعارى. وڭتۇستىك وڭىردە ءداندى داقىلداردى جيناۋ اياقتالىپ قالدى, جۇمىس 97-98 پايىزعا ورىندالدى, – دەدى ايداربەك ساپاروۆ ورتالىق كوممۋنيكاتسيالار قىزمەتىندە وتكەن بريفينگتە.
ماۋسىمدىق جۇمىستاردى ءبىرىنشى بولىپ تامامداعان جامبىل وبلىسىنداعى ونىمدىلىك ورتاشا ەسەپپەن گەكتارىنا 22 تسەنتنەردى قۇرادى. جەدەل دەرەكتەرگە سۇيەنسەك, رەسپۋبليكا بويىنشا جينالعان 66,4 پايىز استىقتىڭ ورتاشا ونىمدىلىگى – گەكتارىنا 11,7 تسەنتنەر. سونىمەن قاتار بۇگىنگە دەيىن 12,2 ملن توننا استىق باستىرىلعان.
– ەگىن ورۋ جۇمىستارىن ۋاقتىلى جۇرگىزۋ ءۇشىن اۋىل شارۋاشىلىعى تاۋارىن وندىرۋشىلەرگە 395 مىڭ توننا ارزانداتىلعان جانار-جاعارماي ءبولىندى. ورتاشا باعاسى – ليترىنە 167 تەڭگە. بۇل نارىقتاعى باعادان 10 پايىزعا تومەن. استىق قابىلدايتىن ليتسەنزيالىق كاسىپورىندار ساقاداي ساي. رەسپۋبليكادا استىقتى ساقتاۋدىڭ جالپى سىيىمدىلىعى 28,8 ملن توننانى قۇرايدى. بۇل سىيىمدىلىق ءونىمدى ساقتاۋعا جەتكىلىكتى. جەدەل دەرەكتەرگە سايكەس, بۇگىندە ەلەۆاتورلارعا ساقتاۋ ءۇشىن 1,3 ملن توننا استىق ءتۇستى. ونىڭ ىشىندە جۇمساق بيدايدىڭ 897 مىڭ تونناسى ساپالىق كورسەتكىشتەرگە ساي بولىپ شىقتى, – دەدى ءبىرىنشى ۆيتسە-مينيستر.
ەسكە سالا كەتەيىك, بيىل اۋىل شارۋاشىلىعى داقىلدارىنىڭ جالپى كولەمى 22,7 ملن گەكتاردى قۇرادى. ونىڭ ىشىندە ءداندى جانە ءداندى بۇرشاقتى داقىلدار الاڭى – 15,8 ملن گەكتار, مايلى داقىلدار – 2,9 ملن گەكتار, ازىقتىق داقىلدار 3,3 ملن گەكتار.
ءبىرىنشى ۆيتسە-ءمينيستردىڭ ايتۋىنشا, بيىل جينالاتىن استىق ىشكى نارىقتى تولىقتاي قامتاماسىز ەتۋگە جەتكىلىكتى. سونداي-اق استىقتىڭ بەلگىلى ءبىر كولەمىن ادەتتەگىدەي ەكسپورتقا شىعارۋ جوسپارلانۋدا.
– قازىر نارىقتاعى ترەيدەرلەر استىق باعاسىن اسىعا كۇتۋدە. وسىعان دەيىن بەلسەندىلىگى تومەن بولىپ كەلگەن نارىققا قايتادان قان جۇگىرە باستادى. مينيسترلىك استىقتى ەكسپورتتاۋعا ەشقانداي شەكتەۋ قويۋدى قاراستىرىپ وتىرعان جوق. جيىن-تەرىن جۇمىستارى بىلتىرعى دەڭگەيدى كورسەتكەنىن ايتتىق. سوندىقتان ەكسپورتتىق الەۋەتتى نازاردا ۇستايتىن بولامىز. ادەتتەگىدەي وزبەكستان, تاجىكستان, قىرعىزستان, تۇرىكمەنستان, اۋعانستان, يران سەكىلدى ءداستۇرلى ەكسپورتتىق نارىقتار ساقتالادى. جالپى, قازاقستاننىڭ استىعىن الەمنىڭ 40 شاقتى مەملەكەتى تۇتىنىپ وتىرعانىن اتاپ وتكەن ابزال. بيىلعى ماركەتينگتىك جىلدا, ياعني 2020 جىلدىڭ شىلدەسى مەن 2021 جىلدىڭ شىلدەسى ارالىعىندا 8 ملن توننا استىق ەكسپورتتاۋدى جوسپارلاپ وتىرمىز, – دەدى ا.ساپاروۆ.
«ازىق-ت ۇلىك كەلىسىمشارت كورپوراتسياسى» ۇك باسقارما توراعاسى قانات قاراۋىلوۆتىڭ دەرەگىنشە, قازىر كورپوراتسيادا 450 مىڭ توننا استىق بار. بۇدان بولەك, مەملەكەت باسشىسىنىڭ تاپسىرماسىنا سايكەس كوكتەم-جاز ماۋسىمىندا 516 مىڭ توننا استىق ساتىپ الىندى. بۇل ماقساتقا رەسپۋبليكالىق بيۋدجەتتەن 24,5 ملرد تەڭگە ءبولىندى. وسى ورايدا رەسپۋبليكانىڭ 370 اۋىل شارۋاشىلىعى تاۋارىن ءوندىرۋشى كاسىپورنى قارجىلاندىرىلعانىن اتاپ وتكەن ءجون. كورپوراتسيا استىقتى ساتىپ الۋ باعاسىن جيىن-تەرىن جۇمىستارى اياقتالۋعا تاياعان كەزدە, ياعني 7-10 كۇننەن كەيىن جاريالاماق. جالپى, كومپانيا
1 ملن توننادان استام استىق قورىن جاساقتاۋدى كوزدەپ وتىر.
ءبىرىنشى ۆيتسە-مينيستر رەسەيدەن استىقتى رۇقساتسىز جەتكىزۋشىلەرمەن كۇرەس جالعاساتىنىن ايتتى. جىل باسىنان بەرى اتالعان جاعداي بويىنشا قازاقستان – رەسەي شەكارالارىنىڭ وتكىزۋ پۋنكتتەرىندە 2 مىڭعا جۋىق قۇقىق بۇزۋشىلىق تىركەلىپ, 730 توننا استىق شەكارادان كەرى قايتارىلعان. ال زاڭدى تۇردە جەتكىزىلگەن استىق كولەمى – 300 توننا.
