بۇگىندە قاراجون اۋىلىندا ەڭسەلى مەكتەپ سونادايدان مەنمۇندالايدى. توقىراۋ جىلدارى اۋىل ادامدارى جان-جاققا جۇمىس ىزدەپ تارىداي شاشىلىپ كەتكەندە جەرگىلىكتى تۇرعىنداردى ساقتاپ قالعان وسى ءبىلىم وشاعى بولاتىن. مۇعالىمدەر بالا وقىتىپ جاتتى. اۋىلدىڭ جۇرەك قاعىسى قالپىنا كەلگەن سوڭ ماڭايداعى اعايىندار قاراجوننىڭ كەلەشەگىنە ءۇمىت ارتىپ, ءار-ءار جەردەن كوشىپ كەلە باستادى. وسىلاي قاراجون اۋىلى قايتا گۇلدەندى. بىراق ءبىز وسى ءبىلىم ورداسىن سالدىرۋعا وردابەك اعانىڭ كوپ ەڭبەك سىڭىرگەنىن ۇمىتىپ كەتە بەرەمىز.
مەكتەبىمىزدە قازاقستان جازۋشىلار جانە جۋرناليستەر وداقتارىنىڭ مۇشەسى وردابەك شاياحمەتوۆ اتىنداعى شاعىن كورمە بار. وسى كورمەدە اعانىڭ كۇندەلىگى قويىلعان. جۋىردا كۇندەلىكتى زەيىن قويا قايتا وقىپ شىقتىم. مىنە, 1983 جىلعى 27 قازاندا جازۋشى بىلاي دەپ جازىپتى. «وبلىستىق اۋىل شارۋاشىلىعى باسقارماسىنىڭ باستىعى ءادىل ساسبۇقاەۆتىڭ جۇمىس كابينەتىنە كىرىپ, حالىق دەپۋتاتتارى كەڭەسى وبلىستىق اتقارۋ كوميتەتى مەن قازاق كسر اۋىل شارۋاشىلىعى مينيسترلىگىنە قاراجون اۋىلىنا مەكتەپ كەرەك ەكەنى جونىندە حات تۇسكەنىن ءبىلدىم. ادەكەڭ سول جەردە اۋىل شارۋاشىلىعى باسقارماسىنا قاراستى كۇردەلى قۇرىلىس ءبولىمى مەڭگەرۋشىسىنىڭ ورىنباسارى نيكولاي الەكساندروۆيچ زينچەنكوعا تاپسىرما بەردى».
بۇدان ءارى ورەكەڭ 1985 جىلدىڭ 13 اقپانىندا «يۋجگورسەلپروەكت» مەكەمەسىنە بارىپ, قاراجون اۋىلىندا سالىناتىن مەكتەپتىڭ جوسپارى جاسالعان-جاسالماعانىن, جاسالسا قۇرىلىس جۇمىستارى قاشان باستالاتىنىن سۇراپ بىلەدى. كۇندەلىكتە سونداي-اق وسى جىلعى 5 قاراشادا وبلىستىق ارحيتەكتۋرا جانە ءبىلىم باسقارمالارىنا بارىپ, قۇجاتتار سۇراعانى جازىلىپتى. مۇنان سوڭ جۋرناليست وبلىستىق اۋىل شارۋاشىلىعى باسقارماسىنا قايتا كەلەدى. باسقارما باستىعىنىڭ ورىنباسارى ر.بايسەيىتوۆ قاراجوندا 392 ورىندى مەكتەپ سالۋ تۋرالى وبلىستىق اتقارۋ كوميتەتىنىڭ 1984 جىلى 21 قىركۇيەكتە قاۋلى شىعارىپ قويعانىن, بۇل قۇجات كەڭشار ديرەكتورىنا جىبەرىلگەنىن ايتادى. ءتيىستى قۇجاتتاردى كورسەتەدى.
مۇنان سوڭ دا اعامىز قاراپ وتىرماپتى. حالىق دەپۋتاتتارى كەڭەسى وبلىستىق اتقارۋ كوميتەتى مەن وبلىستىق اۋىل شارۋاشىلىعى باسقارماسى اراسىندا تابانىنان توزىپ ءجۇرىپ, مەكتەپ قۇرىلىسىنىڭ باستالۋىنا مۇرىندىق بولادى. دەگەنمەن, جوبالاۋشىلار 392 ورىندى مەكتەپتىڭ ورنىنا 192 ورىندى مەكتەپ سالۋ جونىندە قاۋلى بەكىتتىرىپ قويادى. ورەكەڭ تاعى شىرىلدايدى. اۋىلدا بالا سانى ارتاتىنىن, دەموگرافيالىق احۋالدىڭ جاقسارىپ كەلە جاتقانىن ايتىپ ءتيىستى ورىندارعا قايتا بارادى. سونىمەن نە كەرەك, 230 ورىندى مەكتەپ سالىناتىن بولادى.
بىراق ءتۇرلى قولبايلاۋلار كەزدەسە بەرگەن. سوسىن 31 قازان كۇنى اعامىز نيكولاي الەكساندروۆيچتىڭ الدىنا قايتا كەلەدى. ول ءجۋرناليستىڭ وتىنىشىنەن كەيىن تەلەفون ارقىلى رەسپۋبليكالىق مەملەكەتتىك جوسپارلاۋ كوميتەتىنىڭ ءتيىستى ءبولىم ماماندارىمەن سويلەسەدى. رەسپۋبليكالىق دەڭگەيدەگى مەكەمە قىزمەتكەرلەرى مەكتەپ قۇرىلىسىنىڭ كەلەسى جىلعا قالعانىن جەتكىزەدى. زينچەنكو كەلەسى جىلدىڭ جوسپارىنا مىندەتتى تۇردە ەنۋى كەرەكتىگىن ايتىپ, مينيسترلىككە حات جولدايدى.
دەگەنمەن, مەكتەپ قۇرىلىسىنىڭ قۇجاتتارىن دايىنداۋ, تاعى باسقا دا ماسەلەلەر سوزبالاڭعا سالىنىپ كەتەدى. وسى تۇستا وردابەك اعامىز رەسپۋبليكالىق «سوتسياليستىك قازاقستان» (قازىرگى «Egemen Qazaqstan») گازەتىنە ماقالا جولدايدى. بۇل 1984 جىلدىڭ 21 ناۋرىزى. گازەت رەداكتورى بالعابەك قىدىربەك ۇلى وبلىستىق اتقارۋ كوميتەتىنىڭ توراعاسى وراز جاندوسوۆپەن سويلەسەدى. و.جاندوسوۆ گازەتكە تۇسكەن ماقالا بويىنشا جۇمىس ىستەۋگە ۋادە بەرەدى. وسىلايشا قاراجونداعى مەكتەپ قۇرىلىسى اياقتالادى عوي.
و.شاياحمەتوۆ اعانىڭ اۋىلعا بۇدان باسقا دا جاساعان جاقسىلىقتارى كوپ. سونىڭ ءبىرى ءتۇرلى كەدەرگىلەردى بۇزىپ, «مايدانتال» كەڭشارى ورتالىعىنان قاراجونعا دەيىن 6 شاقىرىم اسفالت جول سالدىرۋى. بۇدان تىس ورەكەڭ اۋىل ماڭىندا 10 گەكتار جەرگە تۇڭعىش رەت باۋ ەكتى. مىنە, وسى ەرەن ەڭبەكتى ۇمىتپاۋىمىز كەرەك.
ءيا, ورەكەڭ وتتى وعلان ەدى. ءبىز ول كىسىنى ءاردايىم ەسكە الىپ وتىرامىز. مەكتەپ مۇعالىمدەرى مەن وقۋشىلارىمىزعا ونىڭ ەڭبەگىن ايتىپ وتىرۋدى وزىمىزگە پارىز سانايمىز. دەگەنمەن, كوڭىل ءالى دە قوڭىلتاقسي بەرەدى. ءبىز اعانى جەتكىلىكتى ناسيحاتتاي الماي جۇرگەندەيمىز...
سەرجان شوكامانوۆ,
«قاراجون» جالپى ورتا مەكتەبىنىڭ ديرەكتورى
تۇركىستان وبلىسى,
كەنتاۋ قالاسى
