2017 جىلدان بەرى تۇراقتى تۇردە وتكىزىلىپ كەلە جاتقان وليمپياداعا بيىل 27 مەملەكەتتەن 90-نان اسا وقۋشى باق سىناعان. ءبىلىم جانە عىلىم مينيسترلىگىنىڭ اقپاراتىنا سۇيەنسەك, قازاقستاندىق قۇراما كوماندا مۇشەلەرى ۇلتتىق جارىستار قورىتىندىسى بويىنشا انىقتالىپتى. كومانداعا ينفورماتيكا ءپانى بويىنشا رەسپۋبليكالىق وليمپيادا جەڭىمپازدارى مەن جۇلدەگەرلەرى تاڭدالىپ الىنعان.
وسى جولى پاندەمياعا بايلانىستى ونلاين رەجىمدە وتكەن وليمپيادانىڭ قورىتىندىسى بويىنشا ۆان لي التىن مەدال; تايماس كورعانباەۆ كۇمىس مەدال; ءادىل سۇلتانوۆ پەن رامازان پەردەباي قولا مەدال يەلەندى.
التىن مەدال قانجىعالاعان ۆان لي رەسپۋبليكالىق فيزيكا-ماتەماتيكا مەكتەبىنىڭ 9-سىنىبىندا وقيدى. ول بىزگە بەرگەن شاعىن سۇحباتىندا وليمپيادا قاشىقتان ۇيىمداستىرىلعانىمەن, جەڭىسكە جەتۋدىڭ وڭاي بولماعانىن ايتتى. «وسى جارىس تۋرالى مەكتەپتەگى ينفورماتيكادان وليمپياداعا دايىندايتىن ترەنەر-مۇعالىمىم ايتتى. وليمپيادا 2 كۇنگە سوزىلدى. ۇيدە وتىرىپ قاتىستىم. مەن دارىندى بالالارعا ارنالعان جانە فيزيكا-ماتەماتيكا باعىتىن تەرەڭدەتىپ وقىتاتىن مەكتەپتە وقيمىن, سوندا دا وليمپيادانىڭ تاپسىرمالارى مەن ەسەپتەرى قيىن بولدى. مەكتەپ باعدارلاماسى دەپ ايتا المايمىن. ءبىر جاقسىسى تاپسىرمالاردىڭ قورىتىندىسى بىردەن شىعىپ وتىرادى ەكەن», دەيدى ۆ.لي.
ال التىن مەدال العان العىر شاكىرتتىڭ ۇستازى تەمىرلان قايرات ۇلى حالىقارالىق جارىسقا اۋەلى رەسپۋبليكالىق دەڭگەيدە ىرىكتەۋ وتكىزىلگەنىن جەتكىزدى. «رەسپۋبليكالىق «دارىن» ورتالىعى الدىمەن ەل كولەمىندەگى مىقتىلاردى انىقتاپ الدى. سودان كەيىن بارىپ ولاردان قازاقستان قۇراماسى جاساقتالىپ, حالىقارالىق سايىسقا جىبەرىلدى. دەمەك, بۇل – ءبىزدىڭ تاڭداۋلى تالانتتارىمىز. وقۋشىلارىمىز ءبىلىم بەرۋ جۇيەسى دامىعان شەتەلدەردەگى قۇرداستارىمەن يىق تىرەسە الاتىنىن, وزگە ەلدىڭ وزات وقۋشىلارىنان وزا الاتىنىن كورسەتتى. سونىڭ ىشىندە التىن مەدال العان شاكىرتىم ۆان – وتە العىر, بارىنەن بۇرىن اسا ەڭبەكقور بالا», دەدى ت.قايرات ۇلى.
ءبىز شاكىرتى بايگەدەن ءبىرىنشى كەلگەن مۇعالىمنەن قاراپايىم مەكتەپ وقۋشىلارىنىڭ وسىنداي ناتيجە كورسەتۋى ءۇشىن نە ىستەۋ كەرەگىن سۇرادىق. سوندا ول: «نەگىزى قاتارداعى ورتا مەكتەپتەردىڭ وقۋشىلارى دا وسال ەمەس. تەك مەكتەپ اكىمشىلىگىندە وسىعان ارنايى كوڭىل ءبولىنۋى كەرەك. ماسەلەن, مەن ينفورماتيكا پانىنەن ساباق بەرمەيمىن, تەك قانا وقۋشىلاردى ينفورماتيكادان وليمپياداعا دايىندايمىن. كوردىڭىز بە, مەكتەپ بۇل باعىتتى ماقساتتى تۇردە قولعا العان. ياعني وليمپياداعا وقۋشىلاردى دايىندايتىن مامانعا بولەك شتات بار», دەپ جاۋاپ بەردى.
