جولداۋدا بەلگىلەنگەن شارالاردىڭ مىندەتتى تۇردە ىسكە اسۋى كەرەك ەكەنىن حالىق تا جەتە ءتۇسىنىپ, ونى ۇلكەن ۇمىتپەن كۇتەتىنى بەلگىلى. سەبەبى وسى ماڭىزدى قۇجات ارقىلى پرەزيدەنت پارلامەنتكە, ۇكىمەتكە, ورتالىق اتقارۋ ورگاندارى مەن سوت جانە قۇقىق قورعاۋ جۇيەسىنىڭ لاۋازىمدى تۇلعالارىنا ناقتى تاپسىرمالار جۇكتەيدى.
ال بيىلعى جولداۋدىڭ ورنى تىپتەن ەرەكشە. تورتكۇل دۇنيە پاندەميانىڭ كەسىرىنەن بۇرىن-سوڭدى بولماعان اۋىر كەزەڭدى باستان وتكىزۋدە. كەسەلدىڭ كۇردەلى بولعانى سونشا, كوپتەگەن مەملەكەت ءالى دە ونىڭ قۇرساۋىنان تولىق شىعىپ ۇلگەرگەن جوق. بۇل ىندەت ءبىزدىڭ ەلىمىزگە دە ايتارلىقتاي زالالىن تيگىزدى. ودان تەك ازاماتتاردىڭ دەنساۋلىعى مەن ومىرىنە قاتەر ءتونىپ قانا قويماي, مىڭداعان شاعىن, ورتا, ءىرى كاسىپكەرلىكتەر, ءوندىرىس ورىندارى مەن اۋىل شارۋاشىلىعى سالالارى, ءبىلىم بەرۋ ءىسى مەن دەنساۋلىق ساقتاۋ جۇيەسى بۇرىن-سوڭدى بولماعان اۋىرتپالىقتى سەزىنىپ وتىر. تابىسىمىز تومەندەپ, الەۋمەتتىك جانە قارجىلىق ماسەلەلەرى كۇردەلەنىپ كەتتى.
مىنە, وسىنداي جاعدايدان اركىم ءوز بەتىنشە جول تاۋىپ شىعۋدىڭ امالىن قاراستىرىپ جۇرگەن ساتتە مەملەكەت باسشىسىنىڭ جولداۋى ءار قازاقستاندىقتىڭ بولاشاققا دەگەن سەنىمىن كۇشەيتىپ, قايراتىنا قايرات قوسىپ وتىر. سوندىقتان بۇل جولداۋ دەر كەزىندە جارىق كورگەن وتە قۇندى تاريحي قۇجات بولدى دەۋىمىز كەرەك.
ارينە, توتەنشە جاعداي مەن كارانتين جاريالانعان ساتتەن باستاپ ۇكىمەت تاراپىنان حالىققا كومەك كورسەتۋ جۇمىستارى بەلسەندى جۇرگىزىلۋدە. بيلىك پەن حالىقتىڭ ءوزارا تۇسىنىگىنىڭ ارقاسىندا ءبىزدىڭ مەملەكەت بۇل كەسەلدىڭ بەتىن قايتارىپ, ءتيىمدى ءىس-شارالاردى بەكىتىپ ۇلگەردى. قالاي بولعاندا دا «ساقتىقتا قورلىق جوق» دەمەكشى, بارىنە دايىن بولعانىمىز ابزال. بۇل رەتتە, جولداۋدىڭ ءمانى دە ەرەكشەلەنە ءتۇستى. اسىرەسە ءوسىپ-ءونۋ جولىندا ەلباسىنىڭ «بەس ينستيتۋتتىق رەفورمانى جۇزەگە اسىرۋ جونىندەگى ۇلت جوسپارىن» نەگىزگى باعىت-باعدار ەتىپ, ەل-جۇرتتىڭ داۋلەتتى ءومىر سۇرۋىنە مۇمكىندىك جاساپ, ولاردىڭ كونستيتۋتسيالىق قۇقىقتارىن قورعاۋعا, زاڭ ۇستەمدىگىن قامتاماسىز ەتۋگە, سىبايلاس جەمقورلىققا قارسى بىرىگىپ كۇرەس جۇرگىزۋگە جۇمىس قارقىندايتىنى ايتىلدى.
ەل مۇددەسىن كوزدەي وتىرىپ قابىلداناتىن ماڭىزدى ءىس-شارالار مەن قۇجاتتاردى ايقىندايتىن جانە قاجەتتى رەفورمالارمەن اينالىساتىن ستراتەگيالىق جوسپارلاۋ جانە رەفورمالار اگەنتتىگىنىڭ قۇرىلۋىنا مول سەنىممەن قاراۋعا بولادى. ەندىگى رەتتە, مەملەكەتتىك جانە كۆازيمەملەكەتتىك ۇيىمداردىڭ قىزمەتكەرلەرىن قىسقارتاتىن, كاسىبي دەڭگەيى جوعارى, ادامگەرشىلىگى مول, ادال جانە جەمقورلىققا قارسى تۇرا الاتىن مامانداردى قالدىرىپ, ولاردىڭ ەڭبەك اقىسىن ەسەلەپ ءوسىرۋ ماسەلەسىن شەشەتىن ۋاقىت جەتتى.
جولداۋدا اۋىل شارۋاشىلىعىن دامىتىپ, وتاندىق ونىمدەردىڭ باسەكەگە قابىلەتتىلىگىن ارتتىرۋعا باعىتتالعان تاپسىرمالار وتە ورىندى. جەر ەمگەن, مال اسىراپ, جەمىس-جيدەك وسىرگەن كاسىپ يەلەرىنە ۇزاق مەرزىمگە تومەن پايىزدى نەسيە بەرىلۋىنە, ولاردىڭ جيعان ونىمدەرىنىڭ لايىقتى باعامەن ساتىلۋىنا جاعداي جاسالسا دەيمىز.
سونىمەن قاتار جولداۋدا ەكولوگيا ماسەلەسىنە ەرەكشە نازار اۋدارىلدى. اسىرەسە تابيعاتتى قورعاۋ جۇمىستارىنا جاس جەتكىنشەكتەردى تارتۋ جونىندەگى تاپسىرمانى بۇگىنگى كۇننىڭ وزەكتى ماسەلەسى دەپ ايتۋعا بولادى.
جولداۋدا ايتىلعانداي, ازاماتتاردىڭ قۇقىعىن قورعاۋ ورگاندارى مەن سوت جۇيەسىنە تالاپتى كۇشەيتۋ تاپسىرماسى ىسكە اسىرىلىپ, وتانداستارىمىز بوس اۋرەگە سالىنباسا, ادىلدىككە قول جەتكىزەتىن بولسا, مەملەكەت پەن زاڭعا دەگەن سەنىم ارتاتىنى ءسوزسىز.
رامازان سارپەكوۆ,
پروفەسسور, قازاقستان رەسپۋبليكاسى زاڭناما جانە قۇقىقتىق اقپارات ينستيتۋتىنىڭ ديرەكتورى
