سوڭعى ءبىر اي كولەمىندە اتالعان باعدارلاما جاستار اراسىندا قىزۋ تالقىلانىپ جاتىر. وسى ۋاقىت ىشىندە ازاماتتىق ۇستانىم, ءبىلىم بەرۋ, جۇمىسقا ورنالاستىرۋ, تۇرعىن ۇيمەن قامتاماسىز ەتۋ جانە تۇلعالىق دامۋ سىندى 5 نەگىزگى باعىت بويىنشا 4 مىڭنان استام ۇسىنىس كەلىپ ءتۇستى.
بەينەكونفەرەنتسيا بارىسىندا Jas Otan جق جەتەكشىسى ەلنۇر بەيسەنباەۆ باعدارلامادا كورسەتىلگەن تارماقتاردى ىسكە اسىرۋ ءۇشىن وڭىرلىك جانە اۋماقتىق جول كارتالارى ازىرلەنەتىنىن اتاپ ءوتتى.
«جاقىن ارادا تالقىلاۋ جانە ۇسىنىس قابىلداۋ ماقساتىندا بارلىق جول كارتالارى Jas Otan-نىڭ سايتىندا (jasotan.kz) جاريالاناتىن بولادى. سول سەبەپتەن دە جاستار تاراپىنان ءبىز ءالى كوپتەگەن ۇسىنىستار كۇتەمىز», دەدى ۇيىم باسشىسى.
جاس كينورەجيسسەر, ستسەناريست, New York Film Academy تۇلەگى, «قازاقستاننىڭ 100 جاڭا ەسىمى» جوباسىنىڭ جەڭىمپازى ايديە ايداربەكوۆ الماتىدا جاس كينورەجيسسەرلەر ءۇشىن قالا كولەمىندە كوپتەگەن بايقاۋ ۇيىمداستىرىلاتىنىن اتاپ ءوتتى.
«بىراق جۇمىستىڭ ساپالى بولۋى ءۇشىن رەسپۋبليكالىق كينوفەستيۆالدار وتكىزۋدى ۇسىنامىن. سول فەستيۆالداردا جاس رەجيسسەرلەر ءوز جۇمىستارىن ۇسىنىپ قانا قويماي, تاجىريبە جانە پىكىر الماسا الادى», دەدى جاس رەجيسسەر.
باعدارلاما جوباسىندا جاس عالىمدارعا دا قاتىستى بىرقاتار مىندەتتەر كورىنىس تاپقان. وسى ورايدا جاس عالىم, قازاقستاننىڭ جاس عالىمدار اليانسىنىڭ نەگىزىن قالاۋشى جانە توراعاسى, PhD ءاسيا ەرمۇحامبەتوۆا:
– مەنىڭ ويىمشا, سوڭعى ۋاقىتتا عىلىمي ازىرلەمەلەر مەن زەرتتەۋلەرگە ەمەس, ستارتاپ-جوبالارعا دا كوپ كوڭىل بولىنۋدە. جاس عالىمدارعا ارنالعان بايقاۋلار كوپتەپ ۇيىمداستىرىلۋى كەرەك دەپ ەسەپتەيمىن. سونىمەن قاتار ەلىمىزدە «جاس عالىم» ۇعىمى ءالى كۇنگە دەيىن زاڭدى تۇردە بەكىتىلمەگەن, سايكەسىنشە عىلىم وكىلدەرىنە قانداي دا ءبىر جەڭىلدىكتەر مەن قولداۋ تەتىكتەرى قاراستىرىلماعان. سونىمەن قاتار ءاربىر جوو قابىرعاسىندا ستۋدەنتتەردىڭ زەرتتەۋ داعدىلارىن دامىتۋ ماڭىزدى, – دەدى ءاسيا ەرمۇحامبەتوۆا.
قورىتىندى قۇجات «جاستار – وتانعا!» باعدارلاماسى Jas Otan جاستار قاناتىنىڭ V سەزىندە قابىلدانادى. قازىرگى ۋاقىتتا جوبا رەسپۋبليكا بويىنشا تالقىلانۋدا.
