قوعام • 07 قىركۇيەك، 2020

سەناتورلار الداعى جالپى وتىرىستا تابيعي قورىقتار تۋرالى زاڭ جوباسىن قارايدى

20 رەت كورسەتىلدى

بۇل جونىندە ماۋلەن اشىمباەۆتىڭ توراعالىعىمەن وتكەن سەنات بيۋروسىنىڭ وتىرىسىندا بەلگىلى بولدى، - دەپ حابارلايدى   Egemen.kz.

وتىرىس بارىسىندا سەنات توراعاسى مەملەكەت باسشىسىنىڭ جولداۋىندا ايتىلعان باسىم باعىتتارعا توقتالىپ ءوتتى. سونداي-اق، جولداۋدا مەملەكەتتىك باسقارۋ جۇيەسىنە رەفورما جۇرگىزۋ، كادر ساياساتىن كۇشەيتۋ، شەشىمدەر قابىلداۋ جانە حالىقپەن كەرى بايلانىس پروتسەستەرىن جەدەلدەتۋ قاجەتتىگىنە باسا ءمان بەرىلگەنىنە نازار اۋداردى. ودان بولەك، ماۋلەن اشىمباەۆ مەملەكەت باسشىسى ەكونوميكانى قالپىنا كەلتىرۋدىڭ جەتى باسىمدىعىن ايقىنداپ بەرگەنىن، وڭىرلەردى، جەرگىلىكتى ءوزىن-ءوزى باسقارۋدى دامىتۋعا، قۇقىق قورعاۋ جانە سوت جۇيەسىن رەفورمالاۋدى جالعاستىرۋعا توقتالعانىن اتاپ ءوتتى. سەنات توراعاسىنىڭ ايتۋىنشا، جولداۋدا دەنساۋلىق ساقتاۋ جانە ءبىلىم بەرۋگە باسا نازار اۋدارىلعان.

«جولداۋدا ايتىلعان باسىمدىقتاردىڭ ءبارى حالىقتىڭ تۇرمىس ساپاسىن ارتتىرۋعا باعىتتالىپ وتىر. سوندىقتان مەملەكەت باسشىسىنىڭ بارلىق رەفورماسىن ساپالى زاڭدارمەن ۋاقتىلى قامتاماسىز ەتۋىمىز كەرەك. وسى رەتتە سەناتورلار زاڭ شىعارۋعا باستاماشىل بولۋ قۇقىعىن كەڭىرەك پايدالانۋعا ءتيىس»، – دەدى ماۋلەن اشىمباەۆ.

ءبىلىم بەرۋدە، سوت پەن قۇقىق قورعاۋ جۇيەلەرىندە دە ساپالىق تۇرعىدا وزگەرىستەر بولۋى كەرەك. سونىمەن قاتار، پرەزيدەنت ەسەپ كوميتەتىن قارجىلاندىرۋدىڭ وزگە ءتارتىبىن ايقىنداپ، ونى پارلامەنتتىڭ سالالىق كوميتەتتەرى ارقىلى جۇزەگە اسىرۋعا تاپسىرما بەردى. سەنات توراعاسى بيۋرو وتىرىسىندا وسى كەشەندى جوسپاردىڭ ءبارى زاڭنامالىق تۇرعىدا قولداۋدى تالاپ ەتەتىنىن ايتا كەلىپ، دەپۋتاتتىق كورپۋستىڭ الدىندا اۋقىمدى جۇمىس تۇرعانىن جەتكىزدى.

وتىرىس بارىسىندا سەناتتىڭ تۇراقتى كوميتەتتەرىنىڭ توراعالارى دەپۋتاتتاردىڭ وڭىرلەرگە ساپارىنىڭ قورىتىندىلارى تۋرالى حاباردار ەتتى. دەپۋتاتتار ىندەتتىڭ تارالۋى مەن ءدارى-دارمەكپەن قامتاماسىز ەتۋ جاعدايىنا مونيتورينگ جۇرگىزدى، پاندەميامەن كۇرەسۋگە كومەكتەستى، سونداي-اق مەملەكەت باسشىسىنىڭ تاپسىرمالارى ايماقتاردا قالاي ورىندالىپ جاتقانىن قاداعالادى.

ودان بولەك، سەناتورلار ەلىمىزدىڭ بارلىق وبلىستارىنداعى ونەركاسىپتىك، اۋىل شارۋاشىلىعى جانە الەۋمەتتىك نىسانداردى ارالاپ، ەڭبەك ۇجىمدارىمەن كەزدەستى. جەرگىلىكتى جەرلەردە ازاماتتاردى قابىلدادى.

سەنات توراعاسى ماۋلەن اشىمباەۆ جاڭا سەسسيا اشىلار الدىندا مەملەكەت باسشىسىمەن كەزدەسكەنىنە نازار اۋداردى. سول كەزدە قاسىم-جومارت توقاەۆ سەناتتىڭ ءرولى ءار زاڭ جوباسىن ساپالى پىسىقتاۋدان تۇراتىنىن جانە زاڭ شىعارۋ ىسىندە جالپىۇلتتىق مۇددەلەردى باسشىلىققا الۋى ءتيىس ەكەنىن ەرەكشە اتاپ وتكەن بولاتىن.

بيۋرو وتىرىسىندا ماجىلىستەن كەلىپ تۇسكەن زاڭ جوبالارى سەنات كوميتەتتەرىنە ءبولىنىپ بەرىلدى.

قارجى جانە بيۋدجەت كوميتەتىنە «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا قىرعىز رەسپۋبليكاسىنىڭ قوسىلۋىنا بايلانىستى قىرعىز رەسپۋبليكاسىنىڭ 2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتتى، ەۋرازيالىق ەكونوميكالىق وداقتىڭ قۇقىعىنا كىرەتىن جەكەلەگەن حالىقارالىق شارتتاردى جانە ەۋرازيالىق ەكونوميكالىق وداق ورگاندارىنىڭ اكتىلەرىن قولدانۋى جونىندەگى جاعدايلار مەن وتپەلى ەرەجەلەر تۋرالى 2015 جىلعى 8 مامىردا قول قويىلعان حاتتاماعا وزگەرىس ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى بەرىلدى.

كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتى «قازاقستان رەسپۋبليكاسى مەن بىرىككەن اراب امىرلىكتەرى اراسىنداعى سوتتالعان ادامداردى بەرۋ تۋرالى شارتتى راتيفيكاتسيالاۋ تۋرالى» زاڭ جوباسىمەن اينالىساتىن بولدى. باس كوميتەتتەرگە سەناتتىڭ باسقا كوميتەتتەرىنىڭ ۇسىنىستارىن جيناقتاۋ جانە وسى قۇجاتتار بويىنشا قورىتىندىلار دايىنداۋ تاپسىرىلدى.

بۇدان باسقا بيۋرو وتىرىسىندا سەناتتىڭ 10 قىركۇيەكتە بولاتىن الداعى جالپى وتىرىسىنىڭ كۇن ءتارتىبى دە بەلگىلەندى. جاڭا سەسسيادا قارالاتىن العاشقى قۇجات «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەرەكشە قورعالاتىن تابيعي اۋماقتار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بولادى. اتالعان زاڭ جوباسى ماجىلىستە ماقۇلدانىپ، سەناتقا كەلىپ ءتۇستى. تابيعي قورىقتار تۋرالى كولەمدى بۇل جوبا وسى اپتادا ءبىرىنشى وقىلىمدا قارالادى.

سونىمەن قاتار تۇراقتى كوميتەتتەر مەملەكەت باسشىسىنىڭ جولداۋىن ىسكە اسىرۋ جونىندەگى سەناتتىڭ 2020 جىلعا ارنالعان نەگىزگى ءىس-شارالار جوسپارىنا ۇسىنىستار بەردى.

سوڭعى جاڭالىقتار

ۇقساس جاڭالىقتار