شىلدە ايىندا مەديتسينالىق ساقتاندىرۋ جۇيەسىندەگى جەڭىلدىك كەزەڭى اياقتالعاننان كەيىن, مەديتسينالىق ۇيىمداردىڭ قىزمەت كورسەتۋدەن باس تارتاتىنى تۋرالى, ءتىپتى قازاقستاندا تۇراتىن ءاربىر ادامعا قولجەتىمدى, تەگىن مەديتسينالىق كومەكتىڭ كەپىلدىك بەرىلگەن پاكەتىنە كىرەتىن مەديتسينالىق كومەكتەردى الۋعا كەدەرگى كوپ ەكەنى تۋرالى تۇرعىندار تاراپىنان شاعىمدار جيىلەپ كەتتى.
سوندىقتان الەۋمەتتىك مەديتسينالىق ساقتاندىرۋ قورى تىركەۋ ورنى ماماندارى مەن مەديتسينا قىزمەتكەرلەرىنىڭ مەديتسينالىق ساقتاندىرۋ جۇيەسى, ءمامس پەن تمككك پاكەتىنە كىرەتىن مەديتسينالىق قىزمەتتەر, مەديتسينالىق كومەك كورسەتۋ ستاندارتتارى, سونداي-اق پاتسيەنتتەردىڭ ساقتاندىرىلۋ مارتەبەسى تۋرالى بىلىمدەرىن تەكسەرۋ, مەديتسينا ۇيىمدارىنا مونيتورينگ جۇرگىزۋ باستاماسىن كوتەردى. اكتسيا بارىسىندا نۇر-سۇلتان قالالىق فيليالىنىڭ ارنايى دايىندالعان ساراپشىلارى مەديتسينا ۇيىمدارىنا «قۇپيا پاتسيەنت» رەتىندە قوڭىراۋ شالىپ, وسى ارقىلى مەديتسينا ۇيىمدارى قىزمەتكەرلەرىنىڭ بىلىكتىلىگىن تەكسەردى. قوردىڭ نۇر-سۇلتان قالاسى بويىنشا مەديتسينالىق قىزمەت جەتكىزۋشىلەرى اراسىندا 35 باستاپقى مەديتسينالىق-سانيتارلىق كومەك كورسەتۋشىلەر بار. زەرتتەۋ ناتيجەسىندە «ينتەرتيچ» وتباسىلىق-دارىگەرلىك امبۋلاتورياسى مەن №1 قالالىق ەمحانا شجق-داعى مكك مەديتسينا قىزمەتكەرلەرى (95%) ەڭ جوعارى ءبىلىم دەڭگەيىن كورسەتتى.
بىراق كەيبىر مەديتسينالىق قىزمەت جەتكىزۋشىلەر ناتيجەسى كوڭىل كونشىتپەيدى. مىسالى, «Sana Vita Clinic» جشس مەن №7 قالالىق ەمحانا شجق-داعى مكك-دا تەلەفونمەن قىزمەت كورسەتۋ دەڭگەيى ناشار بولعاندىقتان, ناتيجە كورسەتكىشى 21%-دى قۇرادى.
قور ءۇشىن پاتسيەنتتەرگە قاجەتتى مەديتسينالىق قىزمەت كورسەتۋدەن زاڭسىز باس تارتۋ ارەكەتتەرىن ازايتۋ, مەديتسينالىق ۇيىمدارداعى مەيتسينالىق قىزمەت كورسەتۋ ساپاسىن ارتتىرۋ, پاتسيەنتتەردى تولىققاندى كەڭەستەرمەن قامتاماسىز ەتۋ ماڭىزدى. «قۇپيا پاتسيەنت» اكتسياسىنىڭ ناتيجەلەرى مەديتسينا قىزمەتكەرلەرىنىڭ ءبىلىمى مەن مەديتسينالىق قىزمەت كورسەتۋ ساپاسىن ارتتىرۋداعى قاجەتتى باعىتتاردى انىقتاۋعا مۇمكىندىك بەردى. بۇل قانداي دا ءبىر جازالاۋ شارالارى ءۇشىن ەمەس, مەديتسينا قىزمەتكەرلەرىن اتاۋلى باعىتتا وقىتىپ-ۇيرەتۋگە نەگىز بولادى.
ساراپشىلار كەيبىر مەديتسينا قىزمەتكەرلەرىنىڭ ءمامس پەن تمككك پاكەتتەرىنىڭ اراسىنداعى ايىرماشىلىقتاردى انىق تۇسىنبەيتىنىن, جارنالار مەن اۋدارىمدارعا قاتىستى جاۋاپتاردىڭ دۇرىس بەرىلمەيتىنىن, تولەم تاسىلدەرى, دەربەس تولەۋشى مەن بجت تولەۋشى اراسىنداعى تولەم ايىرماشىلىقتارىن تۇسىنبەيتىنىن, ساقتاندىرۋدىڭ مارتەبەسى جانە ول بولماعان كەزدە مەديتسينالىق كومەك الۋ مۇمكىندىكتەرى تۋرالى اقپاراتتاردىڭ جەتكىلىكسىز ەكەنىن ايتادى.
زەرتتەۋ ناتيجەلەرى بويىنشا ءار مەديتسينا ۇيىمىنا تالداۋ جاسالدى. جوبا ارقىلى كورسەتىلەتىن مەديتسينالىق كومەك ساپاسىن پاتسيەنت كوزىمەن باعالاۋعا تىرىسقان اتالعان قوردىڭ مەديتسينا قىزمەتكەرلەرىنە ارنالعان بارلىق وقىتۋ ءىس-شارالارى انىقتالعان جاعدايلاردى ەسكەرە وتىرىپ تۇزەتىلمەك.
