بۇل كەزەڭدە سپورتشىلار لە تەي مەن ەگۋال اراسى, جالپى 191 شاقىرىمدى ءجۇرىپ ءوتتى. قازاقستاندىق الەكسەي لۋتسەنكو قارسىلاستارىنان قارا ءۇزىپ, مارەگە ءبىرىنشى بولىپ جەتتى. ول جارىس كەزىندە پەلوتوننان التى مينۋتقا وزىپ كەتتى. مارەگە جاقىن تۇستا لۋتسەنكو مەن نەگىزگى توپتىڭ اراسى ءۇش مينۋتتى قۇرادى.
دەگەنمەن «استانانىڭ» بۇرىنعى ۆەلوشاباندوزى فابيو ارۋ (UAE Team Emirates) مەن حەسۋس ەررادا (Cofidis) ءبىزدىڭ سپورتشىعا ايتارلىقتاي قارسىلىق كورسەتكەن. الايدا جارىس جولىنىڭ اياقتالۋىنا ون شاقىرىم قالعاندا ارۋدان قاۋقار كەتتى. ال ەررادا سوڭىنا دەيىن كۇرەسكەنىمەن, لۋتسەنكو قارسىلاسىنان وق بويى وزىپ, مارەگە ءبىرىنشى بولىپ كەلدى.
