تايفۋن بولجانعان ۋاقىتتان ەرتە باستالعان. فابريكالار مەن مەكتەپتەردىڭ, ءتۇرلى كاسىپتىڭ جابىلۋىنا اكەلدى. جاپونيا بويىنشا جۇزدەگەن اۋە جانە تەمىر جول رەيسى توقتاتىلدى. جاپونيا ۇكىمەتى جەدەل شتاب ۇيىمداستىرىپ, تابيعي اپات سالدارىن جويۋعا كىرىسىپ كەتتى.
مەملەكەتتىڭ مەتەورولوگيالىق ۇيىمى اتالعان تايفۋن وسىنشالىق مىقتى بولادى دەپ جوسپارلانباعانىن ايتادى. الايدا اپاتتىڭ زاردابى اۋىر بولعانى انىق. ويتكەنى ودان كەيىنگى جاڭبىردىڭ كولەمى تىم كوپ. تابيعي اپاتتار بولجام اگەنتتىگىنىڭ باسشىسى يوشيحيسا ناكاموتو تايفۋننىڭ تەڭىز دەڭگەيىنەن تومەن, وزەن ماڭىندا ورنالاسقان ەلدى مەكەندەردى اۋرەگە سالاتىنىن ايتتى.
ءجۇز مىڭداعان ادام مەكتەپتەر مەن ساۋدا ورتالىقتارىنداعى ۋاقىتشا شاتىرلارعا كوشىرىلدى. ولاردىڭ كوبى ناگاساكيدەگى گوتو قالاسىنىڭ تۇرعىندارى. اتالعان ايماق تايفۋننان ەڭ كوپ زارداپ شەككەن جەر بولىپ وتىر.
وڭتۇستىك كورەيانىڭ تابيعي اپاتقا قارسى جانە قاۋىپسىزدىك شتابى تايفۋن كورەياعا جەرگىلىكتى ساعات 19:00-دە جەتەدى دەپ بولجايدى. كورەيانىڭ ورمان قىزمەتى حالىقتى قۇلاقتاندىرىپ, قاجەتتى شارالاردى قولعا العان. قىزمەتتىڭ باسشىسى پارك چونگ-حو «تايفۋننىڭ كۇشى اۋەلدەن بەلگىلى. سوندىقتان ۇلكەن زارداپتىڭ بولاتىنىن ءتۇسىنىپ وتىرمىز. بولجامدار وسى اپاتتىڭ مۋسسون ماۋسىمىنداعى بۇعان دەيىنگى تايفۋنداردان دا كۇشتى بولارىن دالەلدەپ وتىر. دۇيسەنبىدە شامامەن تاڭەرتەڭگى ۋاقىتتا كورەيانىڭ پۋسان قالاسىنا جەتىپ قالادى دەگەن تۇجىرىمدار بار», دەدى.
ازاماتتاردى ەۆاكۋاتسيالاۋمەن قاتار ىزدەۋ جۇمىستارى دا باستالدى. ويتكەنى جاۋاپتى ۆەدومستۆولار كارگو قىزمەتكەرلەرىنىڭ, كۇزەتشىلەردىڭ جوعالعانىن مالىمدەدى. ازىرشە 43 ادام مەن 6 مىڭعا جۋىق ءىرى قارانىڭ جوعالعانى بەلگىلى.
