قازاق توپىراعىندا ەجەلدەن ەلگە ءمالىم بولعان سۇيىسپەنشىلىك, عاشىقتىق حيكايالارى ۇلتتىڭ اۋىز ادەبيەتىنىڭ التىن قورىن قالىپتاستىرعان دۇنيەلەر. عاسىرلار بويى اۋىزدان اۋىزعا كوشىپ كەلگەن تۋىندىلاردىڭ بىرقاتارى كەيىننەن ۇلتتىڭ ۇلى تۇلعالارىنىڭ ەڭبەگىمەن حاتقا دا ءتۇسىپ, حالىقپەن قاۋىشتى. جالپى, «قوزى كورپەش – بايان سۇلۋ» حيكاياسى قاراباي مەن سارىبايدىڭ قۇدا بولماققا انتتاسۋىنان باستالىپ, كەيىننەن ەكەۋىنىڭ پەرزەنتتەرى قوزى مەن باياننىڭ ءبىر-بىرىنە دەگەن سۇيىسپەنشىلىگىمەن جالعاسىپ, اقىرى قوس عاشىقتىڭ قايعىلى ولىمىمەن اياقتالادى. اشىق اسپان استىنداعى سپەكتاكلدە قوزى مەن باياننىڭ بەينەسى بىردەن جارقىراپ كورىندى. تەاتر ارتىستەرى ەلجان جارمۇحامەدوۆ پەن نۇراي قاراجانوۆا كوپ جاعدايدا جاتتاندى سوزدەن گورى قوس عاشىقتىڭ ءبىر-بىرىنە دەگەن العاۋسىز سەزىمىن, ادالدىعى مەن تۇراقتىلىعىن قيمىل-قوزعالىسى مەن كوزقاراسى ارقىلى اسەرلى جەتكىزە ءبىلدى. ال شەر شايقى بولسا جىرداعى نەگىزگى وقيعالار مەن قۇبىلىستاردى ۇنەمى داۋىلپازىن داڭعىرلاتىپ جەتكىزىپ جۇرۋىمەن ەرەكشەلەندى. سونىمەن قاتار جىرداعى بارلىق ءىس-ارەكەتتەر سول وقيعاعا قاتىسى بار باستى كەيىپكەرلەردىڭ ورىنداۋىمەن كورەرمەنگە جەتكىزىلدى. ياعني ءاربىر وقيعا كورەرمەنگە كەيىپكەرلەر ويىنى ارقىلى ۇسىنىلدى. قويىلىمداعى ءبىر ەرەكشەلىك – كوپسوزدىلىك جوق. كەيىپكەرلەر اراسىنداعى ديالوگتار تىم قىسقا. بىراق ءاربىر كەيىپكەردىڭ مىنەز-قۇلقىن, جالپى بولمىسىن ارتىستەر نەگىزىنەن يشارا ارقىلى الىپ شىققان. ماسەلەن, قارابايدىڭ ء(ارتىس رۋسلان ورازاليەۆ) شەكتەن تىس پايداكۇنەمدىگى, پەرزەنتىنە دە جىلۋى جوق كەيپى كوپشىلىكتى ءتۇرلى ويعا جەتەلەگەنى انىق. ال بايانعا ىنتىق قوداردىڭ ء(ارتىس جاندار قىرىقباەۆ) داڭعويلىعى مەن اپەرباقاندىعى دا ونىڭ قيمىل-ارەكەتىنەن-اق كوزگە ۇرىپ تۇردى دەۋگە بولادى. سول سياقتى ۇنەمى بارىنە جاقسى كورىنۋدى ويلاپ, قاراباي مەن قوداردىڭ اراسىنا وت سالىپ جۇرەتىن جانتىقتىڭ بولمىسى دا نانىمدى. جانتىقتىڭ ەكىجۇزدىلىگى, وعان قارابايدىڭ دا, قوداردىڭ دا سەنىپ قالۋى, اقىرىندا قوزى مەن باياننىڭ قۇربان بولۋى دا سەنىمدى شىققان. شەر مەن جانتىقتىڭ بەينەسىن بىردەي سومداعان تەاتر ءارتىسى مامبەت قوجاليەۆتىڭ شەبەرلىگىن ايتا كەتكەن ءجون. اتالعان قويىلىم كورەرمەندى ليريكامەن باستالىپ, تراگەديامەن اياقتالعاندىعىنا سەندىرە ءبىلدى.
سپەكتاكل سوڭىندا كەلۋشىلەر ارتىستەرگە قۇرمەت كورسەتتى. ال اسقار توقپانوۆ اتىنداعى وبلىستىق قازاق دراما تەاترىنىڭ ديرەكتورى بولات بەكجانوۆ «قوزى كورپەش – بايان سۇلۋ» قويىلىمى اراعا بىرنەشە جىلدار سالىپ تەاترسۇيەر قاۋىممەن قايتا قاۋىشىپ وتىرعانىن, ماحابباتقا ادالدىقتى, سەزىمگە بەرىكتىكتى تۋ ەتكەن بۇل تۋىندى تاربيە تاعىلىمى ەكەنىن دە ايتا كەلىپ, كەلگەن كوپشىلىككە العىس ءبىلدىردى.
جامبىل وبلىسى
