"ىسكەرلىك كەڭەستىڭ مىندەتى - اقش ساۋدا پالاتاسىنىڭ كەڭەيتىلگەن پلاتفورماسى ارقىلى ەكى ەل اراسىنداعى ەكونوميكالىق بايلانىستى ودان ءارى تەرەڭدەتۋ", دەپ حابارلايدى ءسىم تاراتقان دەرەككوزدە.
رەسپۋبليكانىڭ سىرتقى ىستەر مينيسترلىگىنىڭ حابارلاۋىنشا, كەڭەس توراعاسىنىڭ قىزمەتىن قازاقستان ەكونوميكاسىنداعى ەڭ ءىرى ينۆەستور بولىپ تابىلاتىن "شەۆرون" كومپانياسى اتقارادى.
كەڭەستىڭ حاتشىلىعى اعا ۆيتسە-پرەزيدەنت حۋش چوكسيدىڭ جالپى باسشىلىعىمەن اقش ساۋدا-ونەركاسىپ پالاتاسىنىڭ ارنايى اۋماقتىق دەپارتامەنتىندە ورنالاسادى.
حابارلامادا ايتىلعانداي, قازاقستان مەن اقش اراسىنداعى تاۋار اينالىمى جىلىنا شامامەن 2 ميلليارد دوللاردى قۇرايدى, بۇل رەتتە ەكونوميكانىڭ اۋىل شارۋاشىلىعى, ەنەرگەتيكا, تاۋ-كەن جانە ينفراقۇرىلىم سياقتى سالالارىندا ءوزارا ساۋدانىڭ ودان ءارى وسۋىنە ۇلكەن مۇمكىندىكتەر بار. قازىرگى ۋاقىتتا قازاقستاندا 700-دەن استام امەريكاندىق كومپانيا جۇمىس ىستەيدى. «قازاقستان-امەريكا بيزنەس قاۋىمداستىعىنىڭ اقش-تىڭ ساۋدا پالاتاسىنا كىرۋى بيزنەس قاۋىمداستىقتى وسى ماڭىزدى جانە ستراتەگيالىق قاتىناستاردى دامىتۋ ءۇشىن قاجەتتى قۇرالدارمەن قامتاماسىز ەتەدى", دەپ مالىمدەدى شەۆرون ەۋرازيا-تىنىق مۇحيتى پرەزيدەنتى نايدجەل حيرن.
ء"بىز اقش-تىڭ ساۋدا-ونەركاسىپ پالاتاسىندا قازاقستان-امەريكا ىسكەرلىك كەڭەسىنىڭ اشىلۋىن قازاقستان مەن اقش اراسىنداعى ساۋدا-ەكونوميكالىق سەرىكتەستىكتى كەڭەيتۋگە قۋاتتى سەرپىن بەرەتىن جانە ەكى ەلدە جاڭا جۇمىس ورىندارى مەن مۇمكىندىكتەردىڭ اشىلۋىنا ىقپال ەتەتىن تاريحي وقيعا رەتىندە قارايمىز. ورتالىق ازيانىڭ جەتەكشى ەكونوميكاسى رەتىندە قازاقستان قۇراما شتاتتاردىڭ سەنىمدى سەرىكتەسى بولىپ قالا بەرەدى جانە امەريكاندىق كومپانيالارمەن ءوزارا ءتيىمدى ىنتىماقتاستىقتى ودان ءارى دامىتۋعا نيەتتى", دەپ قوستى قازاقستاننىڭ اقش-تاعى ەلشىسى ەرجان قازىحانوۆ.
اقش ساۋدا-ونەركاسىپ پالاتاسى 3,5 ميلليونعا جۋىق امەريكاندىق كومپانيالاردىڭ, 3 مىڭ ايماقتىق پالاتالاردىڭ مۇددەلەرىن بىرىكتىرەدى جانە ولاردىڭ 90-نان استام وكىلدىكتەرى بار.
