قىتايدىڭ حinhuanet اگەنتتىگى قازاقستان پرەزيدەنتى قازاقستان حالقىنا ەكىنشى جولداۋىن ارناعانىن حابارلاي كەلە, مەملەكەت باسشىسىنىڭ داعدارىستان كەيىنگى دامۋ ستراتەگياسىنا توقتالعان. اگەنتتىكتىڭ حابارلاۋىنشا, پرەزيدەنت كوروناۆيرۋس پاندەمياسىمەن كۇرەس شارالارىن جاريالاپ, ەلدىڭ دامۋىنا قاتىستى بىرقاتار تاپسىرما بەرگەن.
مەملەكەت باسشىسىنىڭ قازاقستان حالقىنا جولداۋى جاپونيالىق باسىلىمداردىڭ دا نازارىندا بولدى. Nikkei Asian Review بيىلعى جولداۋداعى ەكونوميكانى قايتا قالپىنا كەلتىرۋ جونىندەگى ۇسىنىستارعا توقتالىپ وتكەن. اگەنتتىك كوروناۆيرۋس پاندەمياسىنىڭ ەل ەكونوميكاسىنا ۇلكەن وزگەرىس اكەلىپ, حالىقتىڭ الەۋمەتتىك جاعدايىنا تيگىزگەن اسەرى تۋرالى دا جازعان. وسى ورايدا پرەزيدەنتتىڭ مەملەكەت تاراپىنان الەۋمەتتىك سالاداعى جانە ەكونوميكانى قولداۋعا باعىتتالعان بارلىق مىندەتتەمەلەر ورىندالادى دەگەن ءسوزىن جاريالادى. شەتەلدىك باسىلىم وسى ماقساتتا ۇلتتىق قوردان 1 تريلليون تەڭگە بولىنەتىنىن اتاپ كورسەتكەن.
The Times of Central Asia حالىقارالىق اگەنتتىگى جولداۋدا ايتىلعان وتباسى, بالالار قۇقىعى, پەدوفيليا ماسەلەلەرىنە نازار اۋدارعان. «قاسىم-جومارت توقاەۆ بالالاردىڭ قاۋىپسىزدىگى مەن قۇقىعىن قورعاۋ ماسەلەسىنە ەرەكشە نازار اۋدارۋ كەرەكتىگىنە توقتالدى.
ورتالىق ازيادان جاڭالىق تاراتاتىن اگەنتتىك: «ەل پرەزيدەنتىنىڭ ايتۋىنشا, كامەلەتتىك جاسقا تولماعان بالالارعا قاتىستى جىنىستىق سيپاتتاعى ارەكەتتەرى ءۇشىن قىلمىستىق جازا ەداۋىر قاتاڭداتىلعان. دەگەنمەن پرەزيدەنت بۇل ماسەلەنىڭ ءالى دە تولىقتاي شەشىلمەگەنىن ءسوز ەتتى. «مۇنداي قىلمىسكەرلەر راقىمشىلىق الۋ جانە مەرزىمىنەن ەرتە بوساۋ قۇقىعىنان ايىرىلىپ, مەيلىنشە قاتاڭ جازالانۋى كەرەك. ولاردى قاۋىپسىزدىگى بارىنشا جوعارى تۇزەۋ مەكەمەلەرىندە وقشاۋلاعان ءجون», دەيدى قازاقستان پرەزيدەنتى.
سونىمەن بىرگە وسى تەكتەس ءاربىر ءىستى پروكۋراتۋرا ورگاندارى ەرەكشە باقىلاۋعا الۋى ءتيىس. الەۋمەتتىك جانە قۇقىق قورعاۋ ورگاندارىنىڭ ارەكەتسىزدىگى نەمەسە سالعىرتتىعىنا بايلانىستى قاتاڭ جازا قولدانىلاتىن بولادى. جولداۋدا قازاقستانعا الەۋمەتتىك ساياساتتىڭ جاڭا پاراديگماسى كەرەك ەكەنى ايتىلعان», دەپ جازدى.
كانادانىڭ The National Post گازەتى ەلىمىزدە ءمان-ماڭىزى جوعارى جاڭا جولداۋ جاريالانعانىن حابارلاي كەلە, قازاقستاننىڭ الدىندا تۇرعان اسا ماڭىزدى مىندەت – ونەركاسىپتىك الەۋەتتى تولىق پايدالانۋ دەپ قورىتادى.
«قازاقستان پرەزيدەنتى ىشكى نارىقتىڭ زور مۇمكىندىكتەرىن ءالى دە بولسا تولىققاندى جۇزەگە اسىرا الماي جاتقانىن ەسكەرتتى. ونىڭ ايتۋىنشا, وڭدەلگەن تاۋارلاردىڭ ۇشتەن ەكىسىنە جۋىعى شەتەلدەن اكەلىنەدى.
ۇلتتىق ەكونوميكانىڭ ستراتەگيالىق قۋاتىن ارتتىرۋ ءۇشىن تەز ارادا قايتا وڭدەۋ ءىسىنىڭ جاڭا سالالارىن دامىتۋ قاجەتتىلىگى ورتاعا سالىندى. اسىرەسە قارا جانە ءتۇستى مەتاللۋرگيا, مۇناي حيمياسى, كولىك قۇراستىرۋ جانە ماشينا جاساۋ, قۇرىلىس ماتەريالدارى مەن ازىق-ت ۇلىك ءوندىرۋ جانە باسقا دا سالالارعا كۇش سالۋ كەرەگى ايتىلدى. قاسىم-جومارت توقاەۆ ساپالىق تۇرعىدان مۇلدە جاڭا ۇلتتىق يندۋستريانى دامىتۋ ءۇشىن جاڭعىرتىلعان زاڭنامالىق نەگىزدىڭ قاجەتتىلىگىن باسا ايتتى», دەلىنگەن گازەت ماقالاسىندا.
بولگاريالىق The Bulgarian News Agency باسىلىمى دا قاسىم-جومارت توقاەۆتىڭ بيىلعى جولداۋىنىڭ باسىم باعىتتارى تۋرالى ارنايى حابار دايىندادى. وندا ساپالى ءبىلىم بەرۋ جۇيەسىنىڭ قاجەتتىگى مەن جاستار ماسەلەسى قوزعالعانى تۋرالى جازىلعان. اگەنتتىك پرەزيدەنتتىڭ قازىرگى جاستاردىڭ ءاپ-ساتتە بايۋعا نيەتتى ەكەنىن, سول ماقساتتا قۇمار ويىندار مەن اقشا تىگۋگە اۋەستىگى بەلەڭ الىپ بارا جاتقانى تۋرالى پىكىرىنە نازار اۋدارعان. «قازاقستان پرەزيدەنتى جاستار اراسىندا گاستاربايتەرلەر تۋرالى ورىنسىز قالجىڭ ايتۋ جانە ولاردىڭ ەڭبەگىن مەنسىنبەۋشىلىك بار ەكەنىن ەسكە سالدى. وسى رەتتە پرەزيدەنت ءار ەڭبەكتىڭ, ءاربىر قىزمەتكەردىڭ مەملەكەت ءۇشىن ماڭىزدى ەكەنىن, قازىرگى جاعدايدا باسقاسىن ايتپاعاندا, كىشى مەديتسينا قىزمەتكەرلەرى, كوممۋنالدىق جانە قىزمەت كورسەتۋ سالاسىندا ەڭبەك ەتەتىن ازاماتتار قىرۋار جۇمىس اتقارعانىن ايتتى. سونىمەن بىرگە ولاردىڭ مەملەكەت نازارىنان تىس قالمايتىنى حابارلاندى», دەپ جازدى شەتەلدىك اگەنتتىك.
باۋىرلاس تۇركيانىڭ دا بىرقاتار باسىلىمى جولداۋ جونىندە جازدى. ماسەلەن, Rize gazete جولداۋدا كورسەتىلگەندەي, ءبىلىم بەرۋ سالاسىنداعى وزگەرىستەرگە توقتالعان. ناقتى ايتار بولساق, تۇركيالىق گازەت 2021 جىلدىڭ قاڭتار ايىنان باستاپ مۇعالىمدەردىڭ ەڭبەكاقىسى 25 پايىزعا كوبەيتۋ جونىندە شەشىم قابىلدانعانىن حابارلادى. وسى رەتتە اتالعان گازەت پرەزيدەنتتىڭ «جالاقى مولشەرى الداعى ۋاقىتتا دا ارتا بەرەدى. بۇل ماقساتقا الداعى ءۇش جىلدا قوسىمشا 1,2 تريلليون تەڭگە بولىنەدى. ءبىز بالالاردىڭ مەكتەپكە دەيىنگى جان-جاقتى دامۋ ماسەلەسىن شەشۋىمىز كەرەك. 2025 جىلعا قاراي 6 جاسقا دەيىنگى بالالاردى مەكتەپكە دەيىنگى تاربيەمەن جانە وقىتۋمەن 100 پايىز قامتاماسىز ەتۋدى مىندەتتەيمىن» دەگەن تاپسىرماسىنا ەكپىن بەرگەن.
