جاڭا وقۋ جىلىندا ءبىرىنشى سىنىپقا 352 091 وقۋشى قابىلداندى, ولاردىڭ شامامەن 75%-ى – 6 جاسقا تولعان بۇلدىرشىندەر. دەگەنمەن, اتا-انالاردىڭ شەشىمى بويىنشا كۇنتىزبەلىك جىلدىڭ سوڭىنا دەيىن التى جاسقا تولاتىن 11 مىڭعا جۋىق بالا مەكتەپ وقۋشىسى اتاندى.
بالالاردىڭ جاس ەرەكشەلىكتەرى مەن اتا-انالاردىڭ تىلەكتەرى ەسكەرىلدى, مەكتەپتەردە سانيتارلىق تالاپتاردى قاتاڭ ساقتاي وتىرىپ, 1-4 سىنىپ وقۋشىلارى ءۇشىن كەزەكشى سىنىپتار جۇمىس ىستەي باستادى: ءبىر سىنىپتا 15 وقۋشىدان ارتىق ەمەس.
جاڭا وقۋ جىلىندا باستاۋىش سىنىپتاردا ءبىر ميلليوننان استام بالا وقيدى, ولاردىڭ 60%-ى اتا-انالارىنىڭ نەمەسە زاڭدى وكىلدەرىنىڭ وتىنىشتەرى بويىنشا مەكتەپتەردە, كەزەكشى سىنىپتاردا سانيتارلىق تالاپتاردى قاتاڭ ساقتاي وتىرىپ وقۋدى باستادى.
ايتا كەتەيىك, ەلىمىزدە 7 مىڭنان استام مەكتەپ جۇمىس ىستەيدى, ونىڭ 3 مىڭعا جۋىعىندا 1-11 سىنىپ وقۋشىلارى ءداستۇرلى فورماتتا وقۋدى باستادى. نەگىزىنەن, بۇل شالعايداعى شاعىن جيناقتالعان مەكتەپتەر, ولاردىڭ ارقايسىسىندا 180-نەن استام بالا بار. ءتيىستى شەشىمدى سانيتارلىق دارىگەرلەر قابىلدادى.
شامامەن 2,6 ملن وقۋشى جاڭا وقۋ جىلىن قاشىقتان وقىتۋ فورماتىندا باستادى. ولار وتاندىق ءبىلىم بەرۋ پلاتفورمالارىن پايدالانا وتىرىپ, قاشىقتان وقيتىن بولادى. «بالاپان» جانە «ەل ارنا» رەسپۋبليكالىق تەلەارنالارى پەداگوگتەردىڭ تىلەكتەرى بويىنشا قوسىمشا قۇرال رەتىندە پايدالانىلاتىن تەلەساباقتاردى تاراتاتىن بولادى.
بيىل جاڭارتىلعان ءبىلىم بەرۋ مازمۇنىنا تولىق كوشۋ اياقتالعانىن ايتا كەتكەن ءجون.
العاشقى قوڭىراۋدا ەلىمىز بويىنشا جاڭا 32 مەكتەپ اشىلدى, جىل سوڭىنا دەيىن تاعى 77 ءبىلىم بەرۋ ۇيىمى پايدالانۋعا بەرىلەدى. جەرگىلىكتى اتقارۋشى ورگاندار وقۋشىلاردى قاشىقتان وقىتۋدى ۇيىمداستىرۋ ءۇشىن ولارعا مەكتەپ كومپيۋتەرلەر مەن روۋتەرلەردى ۋاقىتشا پايدالانۋعا بەردى.
جاڭا وقۋ جىلىندا مەكتەپتەردە 10 258 جاس مامان جۇمىسىن باستادى.
