تاعى بىردە بەلگىسىز باستاماشىل توپ وسكەمەندە ءى پەتر پاتشاعا ەسكەرتكىش قويماق بولعاندا دا بريفينگ بارىسىندا وبلىستىڭ مادەنيەت باسقارماسىنىڭ باسشىسىن ءباسپاسوز وكىلدەرى جان-جاقتان سۇراقتىڭ استىنا الىپ, بوگدە نيەتتى قۋسىرا قۋعانداي بولعانى ەستە...
ارينە قالامگەرلەر, اسىرەسە جۋرناليستەر قاۋىمى جاماندى عانا ەمەس, جاقسىنى دا كورە بىلەدى. ايتپەسە سول كەزدە وسكەمەننىڭ قاق ورتاسىنا قويىلعان حاكىم ابايدىڭ ەڭسەلى ەسكەرتكىشىن اسپەتتەپ تالاي جىر جازىلماس ەدى, شەشىم الدەقايدا بۇرىن قابىلدانسا دا بىتەر ءىستىڭ باسىنا كەلگەن ءوڭىر باسشىسىنا «وسكەمەنگە اباي كەلدى» دەگەن ماداق ايتىلماس ەدى.
مىنە, سول ابايداي الىپتى جەرگە قاراتقان تاعى ءبىر ۇنامسىز ۋاقيعا سول وسكەمەندە بولعاندا ورە تۇرەگەلگەن تاعى دا باق وكىلدەرى بولدى. تاۋەلسىزدىكتىڭ العاشقى جىلدارىنان باستاپ ءبىتىم-بولمىسى دوستىقتىڭ شاھارى رەتىندە بادىزدەلىپ كەلە جاتقان وبلىس ورتالىعىنىڭ اباي مەن ميحاەليس كوشەلەرىنىڭ قيىلىسىندا ورىن تەپپەك بولعان ەكى ويشىلدىڭ دوستىق ءراۋىشتى كوزدەگەن ەسكەرتكىشى ەزۋگە كۇلكى ءۇيىردى, «سەلفي» جاساپ تۇرعان ىسپەتتى سۇرىقسىز مەشەل مۇسىندەردىڭ عۇمىرى ءبىر-اق ءتۇن بولدى. ودان كەيىن جابۋلى قازان جابۋلى كۇيىندە تاعى قالا بەردى.
ەندى بىردە بەلگىلى ءبىر باتىر باباسىنىڭ بەس قارۋى بويىندا, جاراعان اتقا مىنگەن ءمۇسىنىن گاراجدا ۇستاپ وتىرعان ءبىر كاسىپكەر اعامىزبەن اڭگىمەلەسكەنىمىزدە ەسكەرتكىشتى قويارعا جەر تاپپاي وتىرعانىن, ساتىپ الۋشىلار بولسا ساۋداعا شىعارۋعا دا بەيىلدىلىگىن تانىتتى. مىنە, بۇل – بىزدەگى ەسكەرتكىشتەر دۇنيەسىنە دەگەن كوزقاراسىمىزدىڭ جەتكەن جەرى. ياعني, تاپسىرىس بەرۋشىنىڭ كوڭىلىنەن شىقپاسا باسقا ءبىر قولى جەتكەن رۋدىڭ باياعى زامانداعى ءبىر باتىرىنىڭ بەينەسىنە قولما-قول اينالىپ كەتە بارماق.
سوڭعى جىلدارى قالىپتاسقان, شىن مانىندە كوز جۇما قارايتىن تاعى ءبىر كەلەڭسىز ءۇردىس ءىرى قالالاردان شالعاي جاتقان اۋدانداردا ورىن الىپ جاتىر. ياعني, الىس اۋىلداردا قازىر جەرگىلىكتى جەردىڭ قۇرمەتتى تۇلعالارىنا ارنالعان ەسكەرتكىشتى تەمىردەن دە, قولادان دا ەمەس, تسەمەنتتەن قۇيىپ قويا سالاتىن بولدى. ءبىر قاراعاندا ءبارى دۇرىس سياقتى. ەسكەرتكىش تۇعىرىندا تۇر. تۇعىرتاسىنا ەسىم-سويى ادىپتەلىپ جازىلعان. جان-جاعى شارباقپەن قورشالعان, گۇلدەر ەگىلىپ اباتتاندىرىلعان. بىراق بار گاپ – قۇرىلىستىڭ ورىندالۋ ساپاسىندا. ارماتۋراعا بەكىتىلگەن تسەمەنت سىلاق ءبىر-ەكى جىل وتپەي جاۋىن-شاشىنعا توتەپ بەرە الماي سىلىنىپ ءتۇسىپ قالادى. ءيا, استانادان ارنايى مەيماندار شاقىرىپ اشقان ءمۇسىنىڭىزدىڭ كەلەر جىلى ءبىر قۇلاعى جوق, مۇرنىنىڭ ۇشى كەرتىلگەن, اۋزى كەميەكتەنىپ قالعان نەمەسە كەۋدەسىنەن قارا تەمىر شىعىپ تۇرعان پۇشايمان بەينەسىنەن قارادان قاراپ قىسىلاسىز.
ءتىپتى اڭداپ قاراعان ادامعا مۇنداي وراشولاق ورىندالعان مادەني نىسانداردى وبلىس ورتالىقتارىنان دا تاۋىپ الۋعا بولادى. ونىڭ سىرتىن بوياپ-سىلاپ قويعانىمەن قولادان قۇيعان, ءمارماردان سوققان مۇسىنگە جەتە مە؟! ال جەرگىلىكتى باسشىلىقتىڭ ەسەبى تۇگەل – ەلگە دە, جوعارىداعى باسشىلىققا دا جاقتى, ەلدىكتىڭ نىشانى ىسپەتتەس ەسكەرتكىشتىڭ كەيىنگى احۋالى ويلاندىرمايدى.
جالپى, تاستان بالبال قاشاعان باعزىداعى بابالاردىڭ مۇسىنشىلىگى بىزگە قونباعان با, ەسكەرتكىشتەرگە كەلگەندە ەڭسەمىزدى كوتەرە الماي, جەر شۇقىپ قالا بەرەتىنىمىز نەلىكتەن ەكەن؟ قارجى قولبايلاۋ ما, جاۋاپكەرشىلىك جوق پا, الدە تالعامعا تالاسپاۋدىڭ كەرى مە؟ قارجى دەيىن دەسەك, كەيبىر ەلدەردەگى بيۋدجەتى الدەنەشە ەسە كەم ەسكەرتكىشتەرى ەڭسەلى, ەرەكشە مازمۇندى-اق. ءاسىلى, بۇل دا جاۋاپكەرشىلىك پەن تالعامنىڭ جوقتىعىنان بولسا كەرەك. بۇل ەكەۋى جوق بولعان سوڭ بولىنگەن قارجى دا «ۇشتى-كۇيلى جوعالادى».
جۋىردا سەمەيدەگى اباي مۇراجايىندا حاكىمنىڭ ەكى ۇلى – اقىلباي مەن تۋراعۇلمەن تۇسكەن بەلگىلى فوتوسۋرەتىنىڭ نەگىزىندە ەسكەرتكىش قويىلدى. ەگەر ەسكەرتكىش پورترەتتىك نۇسقادان دالمە-ءدال كوشىرمە بولسا, وندا ونىڭ ونەر تۋىندىسى رەتىندەگى باعاسى قانشالىقتى بولماق؟ حاكىمنىڭ حاق ەسكەرتكىشى – الماتىداعى رەسپۋبليكا سارايىنىڭ الدىنداعى اقىن ءمۇسىنىن سومداعان حاكىمجان ناۋرىزباەۆقا اقىل-كەڭەستى ايگىلى اۋەزوۆتىڭ ءوزى بەردى. جالپى, وتىزىنشى جىلداردان باستاپ اقىن سۋرەتتەرىن سالا باستاعان قىلقالام شەبەرلەرى سۇيەنگەن وسى فوتوسۋرەت قولىندا بولسا-داعى تۇڭعىش كاسىبي ءمۇسىنشى جيدەبايعا دەيىن بارىپ, اقىن ۇرپاقتارىمەن كەزدەسىپ, دالا دانىشپانىنىڭ بولمىس-ءبىتىمىن ساناسىندا ءپىسىرىپ بارىپ جۇمىسقا كىرىسكەن ەكەن. بۇگىندە ءبىزدىڭ مۇسىنشىلەرگە جەتپەي تۇرعانى دا وسى ءبىر ىزدەنىستىڭ كەمشىندىگى سياقتى.
