2020 جىلعى 20 تامىزداعى جاعداي بويىنشا نۇر-سۇلتان قالاسىنداعى جارنالار مەن اۋدارىمداردى تولەۋدەن بوساتىلعان كاسىپورىندار جۇمىسكەرلەرىنىڭ 64,8%-نىڭ اقپاراتتارى جاڭارتىلماعان. ەگەر جۇمىس بەرۋشى دەرەكتەردى ەنگىزبەسە, قىركۇيەك ايىندا شوب قىزمەتكەرلەرىنىڭ ءبىر بولىگى جۇيەدە ساقتاندىرىلماعان بولۋى مۇمكىن دەگەن قاۋىپ بار.
«ەلوردامىزدىڭ شاعىن جانە ورتا بيزنەس سۋبەكتىلەرىندەگى جۇمىس بەرۋشىلەر ءوز قىزمەتكەرلەرى ءۇشىن جاۋاپتى ەكەندەرىن ءتۇسىنۋى قاجەت. ولاردان وسى كاسىپورىندارداعى قىزمەتكەرلەر ساقتاندىرىلىپ, ءمامس جۇيەسىندە بارلىق قاجەتتى مەديتسينالىق كومەكتەردى الۋى ءۇشىن جۇمىسكەرلەرىنىڭ تىزىمدەرىن ۇنەمى جاڭارتىپ وتىرۋىن سۇرايمىز. وسى باعىتتا «اتامەكەن» ۇكپ, مەملەكەتتىك كىرىس كوميتەتى جانە ولاردىڭ ايماقتارداعى ۇيىمدارىمەن بىرلەسە وتىرىپ, اقپاراتتىق-ءتۇسىندىرۋ جۇمىستارىن جۇرگىزۋدەمىز», دەيدى «الەۋمەتتىك مەديتسينالىق ساقتاندىرۋ قورى» كەاق نۇر-سۇلتان قالاسى بويىنشا فيليالى ديرەكتورىنىڭ ورىنباسارى ايناگۇل داۋلەتشينا.
ەستەرىڭىزگە سالا كەتەيىك, الگوريتمگە سايكەس جۇمىس بەرۋشى ءار ايدىڭ 25-نە دەيىن مىنا سىلتەمەگە https://msb.fms.kz/login ءوتىپ, بسن بويىنشا تىزىمنەن ءوز ۇيىمىن تاۋىپ, زاڭدى تۇلعانىڭ نەمەسە جەكە كاسىپكەردىڭ ەتسق كومەگىمەن قوردىڭ اقپاراتتىق جۇيەسىنە تىركەلىپ, پايدالانۋشى كەلىسىمىنە قول قويۋى كەرەك. بۇدان ءارى ءمامس تولەمدەرىن تولەۋدەن بوساتىلعان قىزمەتكەرلەردىڭ جسن-ءىن (Excel-دە ءبىر فايلمەن نەمەسە ءار قىزمەتكەردى جولما-جول) قوسادى. كەيىننەن دەرەكتەردى قايتا ەنگىزۋدىڭ قاجەتى جوق, ونى تەك جاڭارتىپ وتىرۋ كەرەك. اقپارات اي سايىن مەملەكەتتىك كىرىستەر كوميتەتىنە بەرىلەدى.
ەگەر شاعىن جانە ورتا بيزنەس سۋبەكتىسىنىڭ قىزمەتكەرى ءوز مارتەبەسىنىڭ ساقتاندىرىلماعانىن بىلسە, وندا ول دەرەكتەردى Qoldau 24/7 ءموبيلدى قوسىمشاسى ارقىلى ءوزى جىبەرە الادى. ەلەكتروندى مەكەنجايىن, تەگىن, جسن, تەلەفون ءنومىرىن كورسەتە وتىرىپ, شوب سۋبەكتىسىنىڭ اتاۋىن, جۇمىس بەرۋشىنىڭ بسن/جسن-ءىن كورسەتە وتىرىپ, ءوتىنىشتى رەسىمدەۋ جانە ەڭبەك شارتىن نەمەسە تاعايىنداۋ تۋرالى بۇيرىقتى قوسا تىركەۋ قاجەت. دەرەكتەر سايكەستىگى راستالعان قىزمەتكەرگە ءبىر ايعا ۋاقىتشا مارتەبە بەرىلەدى. الايدا قىزمەتكەر ءوزى تۋرالى مالىمەتتەردى اقپاراتتىق جۇيەگە ەنگىزۋ قاجەتتىلىگى تۋرالى جۇمىس بەرۋشىگە ەسكەرتۋى كەرەك.
