ءۇشىنشى ەكيپاجدىڭ ونەر كورسەتۋىمەن قازاقستان, قىرعىزستان, رەسەي جانە وزبەكستان كوماندالارى ءۇشىن جەكە جارىس اياقتالدى.
بۇل جارىستا دا الدىڭعى كەزەڭدەگىدەي قازاقستاندىق كوماندا ەكىنشى ۋاقىتتى كورسەتىپ, تەك رەسەيلىك تانكىشىلەرگە ەسە جىبەردى. ءۇشىنشى ورىنعا وزبەكستان, ءتورتىنشى ورىنعا قىرعىزستان كوماندالارى جايعاستى.
قازاقستاننان كەلگەن جاۋىنگەرلەر بارلىق ءۇش سىندا تراسسادان ءوتۋ كەزىندە جوعارى جىلدامدىقتى, سونىمەن قاتار ماقساتتاردىڭ دالمە-ءدال ورىندالۋى مەن ەكيپاجداردىڭ ۇيلەسىمدى جۇمىسىن كورسەتتى. ءبىزدىڭ كوماندانىڭ قارسىلاستارى ازەربايجان, بەلارۋس, قىتاي جانە سەربيا كوماندالارىنىڭ قورىتىندى كەزدەسۋلەرىنەن كەيىن انىقتالادى. ءوز كەزەگىندە قازاقستاندىق جاۋىنگەرلەر جارتىلاي فينالدىق ەستافەتادا ءوز شەبەرلىكتەرىن كورسەتۋى كەرەك. وندا ەكيپاجدار كەزەكپەن تراسسادان وتەدى. جارتىلاي فينالدىق سايىستاردىڭ جەرەبە تارتۋ ءراسىمى 30 تامىزعا بەلگىلەنگەن.
فينالعا شىعۋ ءۇشىن باق سىنايتىن ەستافەتالىق جارىس 1-2 قىركۇيەككە جوسپارلانعان.
ايتا كەتەيىك, «تانك بياتلونى» بايقاۋى رەسەي فەدەراتسياسى ماسكەۋ وبلىسىنىڭ «الابينو» پوليگونىندا ارميا حالىقارالىق ويىندارى-2020 اياسىندا ءوتىپ جاتىر. اتالعان بايقاۋ وسى جىلدىڭ 5 قىركۇيەگىندە اياقتالادى.
سانيتارلىق-ەپيدەميالىق جاعداي مەن ەلدە قابىلدانعان شارالارعا بايلانىستى قازاقستان بيىل ەڭ كورنەكتى جانە بەدەلدى سانالاتىن «تانك بياتلونى» بايقاۋىندا عانا باق سىنايدى. بايقاۋعا 16 ەلدىڭ تانك ەكيپاجدارى قاتىسادى. ونىڭ ىشىندە ابحازيا, ازەربايجان, بەلارۋس, ۆەتنام, قازاقستان, قاتار, قىتاي, كونگو, قىرعىزستان, لاوس, ميانما, سەربيا, تاجىكستان, وزبەكستان, وڭتۇستىك وسەتيا ەلدەرى بار.
2019 جىلى قازاقستاندىق تانكىشىلەر ءۇشىنشى ورىندى, 2018 جىلى ءتورتىنشى ورىندى يەلەندى.
