«استانا» حالىقارالىق قارجى ورتالىعىنىڭ قاتىسۋشىسى – iKapitalist ينۆەستيتسيالىق جانە زاەمدىق كراۋدفاندينگتىك پلاتفورماسى. اتالعان پلاتفورما شاعىن جانە ورتا بيزنەسكە جەكە جانە زاڭدى تۇلعالاردان ينۆەستيتسيا تارتۋعا جانە قارىز الۋعا كومەكتەسەدى, ياعني شاعىن جانە ورتا بيزنەستىڭ بيرجاسى دەۋگە بولادى. 2019 جىلى احقو پوستكەڭەستىك ەلدەردە العاش بولىپ كراۋدفاندينگ ءۇشىن رەتتەۋ ەرەجەلەرىن قابىلدادى. اتالعان ەرەجەلەر ەلدە وسىنداي كراۋدفاندينگتىك كومپانيانىڭ قۇرىلۋىنا تۇرتكى بولدى. بۇل وسى سالاداعى قازاقستانداعى العاشقى كومپانيا.
«قازاقستاندىق كاسىپكەرلەر ءۇشىن جەكە ينۆەستورلاردان تىكەلەي قارجى تارتۋ مۇمكىندىكتەرىن ۇسىنامىز. سونىمەن قاتار كەز كەلگەن قازاقستاندىق ەندى جوعارى پايىزدىق تابىسپەن ينۆەستيتسيا قۇيا الادى. پلاتفورمامىزدا سىزدەردى كۇتەمىز!», - دەيدى iKapitalist پلاتفورماسىنىڭ باس اتقارۋشى ديرەكتورى نۇربەك راەۆ.
iKapitalist پلاتفورماسى ارقىلى قاراجات تارتۋ ءۇشىن بيزنەس مىنا تالاپتارعا ساي بولۋى كەرەك: كومپانيا كەمى 12 ايدان بەرى جۇمىس ىستەپ جاتقان بولۋى; تابىسى جىلىنا 60 ملن تەڭگەدەن كەم بولماۋى كەرەك. پلاتفورمانىڭ باس اتقارۋشى ديرەكتورى نۇربەك راەۆتىڭ ايتۋىنشا, شاعىن جانە ورتا بيزنەس وسى پلاتفورما ارقىلى نەگىزىنەن مىنا ءۇش ماقساتقا قاراجات تارتا الادى: بيزنەستى دامىتۋ; اينالىم كاپيتالىن تولتىرۋ جانە كەلىسىمشارتتى ورىنداۋ.
جالپى, شاعىن جانە ورتا بيزنەس ءۇشىن قاراجات تاپشىلىعى ۇلكەن ماسەلەلەردىڭ ءبىرى. بانكتەر قارىز بەرۋ ءۇشىن كەپىلزات سۇرايدى. ال iKapitalist پلاتفورماسىنا شىعۋ ءۇشىن كەپىلزات قويۋ كەرەك ەمەس. تالاپتارى دا جەڭىل. ءىرى بيرجالاردا اۋديتورلىق ەسەپتى قاتاڭ باقىلايتىنى دا انىق. كوبىنە وتباسىلىق بيزنەس سانالاتىن شاعىن جانە ورتا بيزنەس سۋبەكتىلەرى ءۇشىن اتالعان الاڭ ۇلكەن مۇمكىندىك.
ينۆەستورلارعا كەلەر بولساق, كەز كەلگەن قازاقستاندىق ازامات نەمەسە كومپانيا پلاتفورماداعى شاعىن جانە ورتا بيزنەسكە قاراجات قۇيا الادى. جەكە تۇلعالار ءۇشىن مينيمالدى كولەم 300 مىڭ تەڭگە. ەگەر بانكتەرگە سالىنعان دەپوزيت ايىنا تەڭگەمەن 12-14 پايىز وسەتىن بولسا, اتالعان پلاتفورما ارقىلى سالىنعان ينۆەستيتسيا كەمى 20 پايىزدان وسەدى.
پلاتفورماعا شىعىپ وتىرعان كەزەكتى كومپانيالاردىڭ ءبىرى – Art Price كومپانياسى. اتالعان كومپانيا 2020 جىلدىڭ مامىر ايىندا iKapitalist پلاتفورماسى ارقىلى 62,3 ملن تەڭگە قارىز الىپ, ونى وتەپ تاستاعان ەدى. وسى جولعى ورنالاستىرۋ «كەگوك» اق-مەن 965 ملن تەڭگە كولەمىندەگى ءىرى كەلىسىمشارتتى ورىنداۋ ءۇشىن اينالىم كاپيتالىن قامتاماسىز ەتىپ, كومپانيانى ءوسىرۋ مۇمكىندىكتەرىن كەڭەيتەدى جانە قارجىلاندىرۋ شىعىندارىن ازايتادى. Art Price كومپانياسى قارقىندى دامىپ كەلەدى. كومپانيا تابىسى 2018 جىلى 163 ملن تەڭگە, 2019 جىلى 850 ملن تەڭگە بولدى. ال 2020 جىلى 1,7 ملرد تەڭگەنىڭ كەلىسىمشارتىنا قول قويىلدى.
ايتا كەتەرلىگى, اشىلعاننان بەرگى ءبىر جىلداي ۋاقىت ىشىندە پلاتفورما ارقىلى Geek Market دۇكەندەر جەلىسى, Barlau Qazaqstan, كازپرومترانس-سەرۆيس سەكىلدى كومپانيالار 20-30 ملن تەڭگە كولەمىندە قاراجات تارتا الدى. ينۆەستيتسيانىڭ جىلدىق تابىستىلىعى بارلىعىندا كەمىندە 24-26 پايىز ارالىعىندا بولدى.
«قازاقستان مەن جالپى وڭىردە شوب-تى قارجىلاندىرۋدىڭ بانكتىك ەمەس بالامالى كوزدەرىن دامىتۋ قاجەتتىلىگىن ەسكەرە وتىرىپ, احقو پوستكەڭەستىك ەلدەردە العاش بولىپ FinTech Lab رەتتەۋ الاڭىن ىسكە قوسىپ, زاەمدىق جانە ينۆەستيتسيالىق كراۋدفاندينگتى رەتتەۋ ەرەجەلەرىن قابىلدادى. وسىلاردىڭ اياسىندا iKapitalist كراۋدفاندينگ پلاتفورماسىندا وبليگاتسيالار ورنالاستىرىلىپ وتىر. كراۋدفاندينگ پلاتفورماسىندا وبليگاتسيالاردىڭ ورنالاستىرىلۋى احقو-نىڭ قارجىلىق تەحنولوگيالار قىزمەتى مەن ينۆەستيتسيا تارتۋدى دامىتۋ بويىنشا وڭىرلىك الاڭ رەتىندە ءرولىن بەكىتە تۇسپەك», - دەيدى احقو قارجىلىق قىزمەتتەردى رەتتەۋ كوميتەتىنىڭ قارجىلىق تەحنولوگيالار بويىنشا باسقارۋشى ديرەكتورى اسىلبەك داۆلەتوۆ.
«Art Price كومپانياسى 2011 جىلدان باستاپ تۇراقتى دامىپ كەلە جاتىر. iKapitalist پلاتفورماسى ارقىلى قازاقستاندىق ينۆەستورلاردان قاراجات تارتقاننان كەيىن قازىرگىدەن دە ءىرى جوبالاردى قولعا الامىز», - دەيدى «Art Price» ديرەكتورى مەدەر ساتىبەك.
