اشىلۋ سالتاناتىنا قاتىسقان قالا اكىمى مۇرات ايتەنوۆ جاڭا قونىس بەرەكەسى مەن ىرىسى مول ۇلكەن ورداعا اينالۋىن تىلەپ, قالا تۇرعىندارىن كونستيتۋتسيا كۇنىمەن قۇتتىقتادى.
"شىمكەنتتە تۇرعىن ءۇي قۇرىلىسى قارقىن الىپ كەلەدى. ماسەلەن, وتكەن جىلى تەك "نۇرلى جەر" باعدارلاماسى شەڭبەرىندە 298 مىڭ شارشى مەتر تۇرعىن ءۇي پايدالانۋعا بەرىلسە, وسى جىلى 104 ءۇي پايدالانۋعا بەرىلىپ, 5800 وتباسى جاڭا پاتەرگە يە بولادى", دەدى قالا اكىمى.
"پرەمەرا" تۇرعىن ءۇي كەشەنى "نۇرتاس" شاعىن اۋدانىندا ورنالاسقان. كەراميكالىق كىرپىشتەن سالىنعان تۇرعىن ءۇي كەشەنىنىڭ قاسبەتىن ارلەۋگە تراۆەرتين قولدانىلعان. بۇل ءوز كەزەگىندە كەشەنگە كلاسسيكالىق كورىنىس بەرەدى.
نىسان "بايتەرەك ۇبح" اق ەنشىلەس ۇيىمى – تۇرعىن ءۇي قۇرىلىسىنا كەپىلدىك بەرۋ قورىنىڭ باقىلاۋىمەن سالىندى. قۇرىلىس كەزىندە 200-گە جۋىق ادام جۇمىسپەن قامتىلعان.
مۇنداعى پاتەرلەردى "تۇرعىن ءۇي قۇرىلىس جيناق بانكى" اق-نىڭ بارلىق باعدارلامالارى جانە "7-20-25" ارقىلى ساتىپ الۋعا بولادى.
