اۋدان اكىمدەرى مەن بارلىق ءبىلىم بەرۋ ۇيىمدارىنىڭ باسشىلارى, مەكتەپ مۇعالىمدەرى ونلاين فورماتتا قاتىسقان شارادا سالاداعى قول جەتكەن تابىستار جايلى باياندالىپ, الداعى ماسەلەلەر تالقىلاندى.
وبلىس اكىمى ءبىلىم بەرۋ سالاسىنداعى مەملەكەتتىك قولداۋ شارالارىن, سالاداعى نەگىزگى باسىم باعىتتاردى اتاپ ءوتىپ, الداعى جاڭا وقۋ جىلىندا پەداگوگتەرگە ساتتىلىك تىلەدى.
– مەملەكەت باسشىسى بىلتىرعى تامىز كەڭەسىندە سالا الدىنداعى باسىمدىقتاردى ناقتى ايقىنداپ بەردى. وتكەن جىل ۇلەسىندەگى ۇلكەن جاڭالىق – «پەداگوگ مارتەبەسى تۋرالى» زاڭ قابىلداندى. زاڭدا كوزدەلگەن مىندەتتەردى ورىنداۋ, جاڭارتىلعان ءبىلىم بەرۋ مازمۇنىن ايماقتا جۇزەگە اسىرۋ ءۇشىن رەسپۋبليكالىق بيۋدجەتتەن 27,4 ملرد تەڭگە ءبولىنىپ وتىر. مۇنان بولەك, ءبىلىم بەرۋ مەن عىلىمدى دامىتۋدىڭ 2020-2025 جىلدارعا ارنالعان باعدارلاماسى قولدانىسقا ەندى. وسى باستامالار سالاداعى ءبىراز ماسەلەنىڭ شەشىمىن تاۋىپ, ۇستازداردى قولداۋدىڭ ارتا تۇسۋىنە نەگىز قالادى.
الەمدى جايلاعان پاندەميا سالقىنى قاي سالاعا دا وڭاي ءتيىپ وتىرعان جوق. جاھانعا جايىلعان ۆيرۋستىڭ سالدارىنان ءبىلىم بەرۋدى قاشىقتان وقىتۋ جۇيەسىنە كوشىرۋگە ءماجبۇر بولدىق. جاڭا جۇيە بويىنشا ءبىلىم الۋ كەزىندە ينتەرنەت جەلىسىنىڭ السىزدىگى, ەلەكتروندى قۇرىلعىلاردىڭ جەتىسپەۋشىلىگى ايقىندالدى. وسىعان وراي, بيىلعى وقۋ جىلىنا دايىندىق بارىسىندا وسى ماسەلەنى باستى نازاردا ۇستادىق. بۇل باعىتتا بايلانىس وپەراتورلارىمەن بىرلەسىپ, اۋىلداردا ينتەرنەت جەلىسىنىڭ جىلدامدىعىن ارتتىرۋ شارالارىن باستادىق. رەسپۋبليكالىق بيۋدجەتتەن 3,4 ملرد تەڭگە ءبولىنىپ, وعان 22 مىڭنان استام كومپيۋتەر ساتىپ الىندى, – دەدى گۇلشارا ناۋشاقىزى.
پەداگوگتەر جيىنىندا سەناتور مۇرات باقتيار ۇلى بىلتىر پارلامەنتتە دە سالا ماسەلەسىنە بارىنشا ءمان بەرىلگەنىن اتاپ ءوتتى. سونىڭ ناتيجەسىندە «پەداگوگ مارتەبەسى تۋرالى» زاڭ قابىلداندى. سوڭعى 15 جىل كولەمىندە قايتا-قايتا كوتەرىلىپ كەلە جاتقان ماسەلەنىڭ شەشىمىن تابۋى قوعامداعى ۇستاز بەدەلىن بيىكتەتە ءتۇستى.
بيىل وڭىردە مەكتەپتەردى زاماناۋي تالاپتارعا سايكەستەندىرۋ باعىتىندا ءبىراز جۇمىس اتقارىلدى. بىرنەشە جىلدان بەرى جوندەۋدى قاجەت ەتكەن ءبىلىم بەرۋ نىساندارى جاڭارىپ جاتىر. قىزىلوردا قالاسىنان جانە جالاعاش اۋدانىنان 2 مەكتەپ پايدالانۋعا بەرىلەدى. سونىمەن قاتار 4 مەكتەپتىڭ قۇرىلىسى جۇرگىزىلۋدە. ونىڭ ىشىندە وبلىس ورتالىعىنداعى 600 ورىندىق, ارال اۋدانى, سەكسەۋىل كەنتىندەگى 300 ورىندىق مەكتەپتەر قۇرىلىسى جىل سوڭىندا اياقتالادى.
مەملەكەت-جەكەمەنشىك ارىپتەستىگى اياسىندا سالىنىپ جاتقان جەكە مەكتەپتەردىڭ ۇلەسى دە ارتىپ كەلەدى. بيىل قىزىلوردا قالاسىندا 500 جانە 300 ورىندىق 2 جەكە مەكتەپ سالىنىپ جاتىر.
پەداگوگيكالىق كەڭەستە وبلىستىق ءبىلىم باسقارماسىنىڭ باسشىسى اقزيرا قاسىموۆا جاڭا وقۋ جىلىنىڭ باستى ەرەكشەلىكتەرىنە توقتالىپ, ىسكە اساتىن جوبالاردى اتاپ ءوتتى.
بيىلعى وقۋ جىلىنىڭ باستى ەرەكشەلىگى – مەكتەپتەردىڭ جان باسىنا قارجىلاندىرۋ تەتىگىنە ءوتۋى بولىپ وتىر. 1 قىركۇيەكتەن باستاپ وبلىس ورتالىعىنداعى 58 مەكتەپ وسىنداي جۇيەگە كوشەدى. قارجىلاندىرۋدىڭ جاڭا تالابى مەكتەپ اراسىندا ءوزارا باسەكەلەستىكتى ارتتىرىپ, ماتەريالدىق بازانى نىعايتۋعا ارنالعان قارجىنىڭ جۇيەلى جۇمسالۋىنا جاعداي تۋعىزادى. كەلەر جىلدان باستاپ مەكتەپتەر وبلىستىق ءبىلىم باسقارماسى ارقىلى تىكەلەي قارجىلاندىرىلادى.
– بيىلدان باستاپ نازارباەۆ زياتكەرلىك مەكتەبىمەن بىرگە «اۋىل مەكتەبى» قاناتقاقتى جوباسى ىسكە اسۋدا. اتالعان جوبانى قازىر ءبىز جاڭاقورعان, سىرداريا اۋداندارى مەن قىزىلوردا قالاسىنداعى 3 مەكتەپتە جۇرگىزىپ وتىرمىز. وسى ءبىلىم وشاقتارىنىڭ تاجىريبەسى الداعى وقۋ جىلىندا بارلىق مەكتەپكە تاراتىلاتىن بولادى. جاڭا وقۋ جىلىنىڭ تاعى ءبىر وزگەرىسى – بارلىق ءبىلىم بەرۋ ۇيىمىنا «قۇندىلىقتارعا نەگىزدەلگەن ءبىلىم بەرۋ» جوباسى ەنگىزىلەدى. ال بالالارعا پاتريوتتىق تاربيە بەرۋدە جاڭا وقۋ جىلىندا 53 يننوۆاتسيالىق مەكتەپكە فاكۋلتاتيۆتىك نەگىزدە دومبىرا ساعاتتارى قوسىلادى. بۇل ورەندەرىمىزدىڭ ءداستۇرلى ونەرگە دەگەن قىزىعۋشىلىعىن ارتتىرا تۇسەدى دەگەن ويدامىز, – دەدى وبلىستىق ءبىلىم باسقارماسىنىڭ باسشىسى.
اقزيرا باقتىبايقىزى وسى جىلدان باستاپ وبلىس بويىنشا وقۋشىلارعا پسيحولوگيالىق كومەك كورسەتۋ ءۇشىن 8 ارنايى ورتالىق اشىلعانىن, مەكتەپ تۇلەكتەرى اراسىندا پەداگوگيكالىق ماماندىقتى تاڭداعانداردىڭ كوپ بولعانىن اتاپ ءوتتى.
جاڭا وقۋ جىلىندا وبلىستاعى 220 مەكتەپ «BilimLand», «دارىن-ونلاين» ينتەرنەت پلاتفورمالارى ارقىلى قاشىقتان ءبىلىم السا, شالعاي ورنالاسقان ەلدى مەكەندەگى 73 مەكتەپ ءداستۇرلى فورماتتا وقيدى. سونىمەن بىرگە اتا-انا وتىنىشىمەن 1-4 سىنىپتاعى 41 547 وقۋشى 2974 توپتا وفلاين ءبىلىم الادى.
كونفەرەنتسيادا ونلاين ارقىلى مەكتەپ ديرەكتورلارى مەن اۋىل مۇعالىمدەرى تىكەلەي بايلانىسقا شىعىپ, سالاداعى جەتىستىكتەردى ءسوز ەتتى. سىرداريا اۋدانى ناعي ءىلياسوۆ اۋىلىنداعى تۇيمەباي ايتباەۆ اتىنداعى №132 ورتا مەكتەپتە گەوگرافيا پانىنەن ساباق بەرەتىن جاس مامان جانبولات نۇرماعامبەت ۇلى نازارباەۆ زياتكەرلىك مەكتەبىمەن بىرگە جۇزەگە اسىرىلىپ جاتقان «اۋىل مەكتەبى» قاناتقاقتى جوباسى جايلى ايتىپ ءوتتى. قالالىق جانە اۋىلدىق مەكتەپتەر اراسىنداعى ءبىلىم ساپاسىنداعى ايىرماشىلىقتى ازايتۋدى كوزدەيتىن جوبا پەداگوگيكالىق پراكتيكانى جەتىلدىرۋ, ماتەريالدىق-تەحنيكالىق بازانى جاقسارتۋ جانە تسيفرلىق رەسۋرستاردىڭ قولجەتىمدىلىگىن ارتتىرۋ ارقىلى جۇرگىزىلەدى. بيىل بۇل اۋىل مەكتەبىن بىتىرگەن تۇلەكتەردىڭ ەكەۋى «التىن بەلگى», ءبىرى «ۇزدىك اتتەستاتقا» يە بولعان. ەڭ باستىسى مەكتەپ بىتىرۋشىلەردىڭ بارلىعى 100 پايىز ءبىلىم گرانتتارىن يەلەنىپ وتىر.
بالالارى وبلىس ورتالىعىنداعى ابىلايحان اتىنداعى №140 ورتا مەكتەپتە ءبىلىم الاتىن كوپبالالى انا گۇلسىم جاڭابەرگەنوۆا تاربيەدەگى ءبىلىم وشاعى مەن وتباسى ءرولى جايلى ويىن بىلدىرسە, قازالى اۋدانىنداعى اگرارلى-تەحنيكالىق كوللەدجبەن ارىپتەستىك نەگىزدە جۇمىس ىستەپ كەلە جاتقان «سىر مارجانى» جشس باسشىسى ءمىناججادين وتەەۆ بىرلەسكەن ءىستىڭ ناتيجەسى تۋرالى باياندادى. اگروسالاداعى ءىرى ءوندىرىس ورنىنىڭ ءبىرى سانالاتىن سەرىكتەستىك بيىل كوللەدج شاكىرتتەرى ءۇشىن مەملەكەت-جەكەمەنشىك ارىپتەستىگى اياسىندا 100 ورىندىق جاتاقحانا قۇرىلىسىن باستاعان.
جيىن سوڭىندا وبلىس اكىمى گۇلشارا ابدىقالىقوۆا «ۇزدىك ورتا ءبىلىم ۇيىمى» كونكۋرسىنىڭ جەڭىمپازى قازالى اۋدانىنداعى №249 مەكتەپ-ليتسەيىنە 17 ملن تەڭگەلىك گرانتتىڭ سەرتيفيكاتىن تابىستادى.
قىزىلوردا وبلىسى
