ءوتىنىش ماتىنىندە «ۇزاق ۋاقىت بويى مۇددەلى تۇلعالار توبى وسكەمەن قالاسىنداعى قازاقستاننىڭ العاشقى اۆتوموبيل زاۋىتى «ازيا اۆتونى» تولىق شەكتەۋگە باعىتتالعان جوسپارلى جۇمىستارىن جالعاستىرۋدا. كونۆەيەردىڭ جۇمىسىن توقتاتۋعا جانە رەسپۋبليكاداعى اۆتوموبيل جاساۋ سالاسىن دامىتۋ جونىندەگى حولدينگتىڭ بارلىق ينۆەستيتسيالىق باعدارلاماسىن توقتاتىپ قويۋعا ماجبۇرلەيتىن سوت شەشىمدەرىنە دەيىن پايدالانۋدا» دەپ جازىلعان.
ارىزدانۋشىلار الدا-جالدا «ازيا اۆتو» زاۋىتى جۇمىسىن توقتاتسا, مىڭداعان ادام جۇمىسسىز قالاتىنىن دا العا تارتىپ وتىر. سونداي-اق پرەزيدەنتكە باعىتتالعان حاتتا الپاۋىت كومپانيا كەز كەلگەن دارەجەدەگى تەكسەرۋلەرگە دايىن ەكەنىن دە اتاپ كورسەتكەن. قاراپايىم حالىقتىڭ كوبىن وتاندىق تەمىر تۇلپارمەن قامتىپ وتىرعان كولىك زاۋىتتارىنىڭ جەتىستىكتەرى دە جوق ەمەس. اتالعان كومپانيا كولدەنەڭ كەدەرگىلەرگە قاراماستان, 2020 جىلدىڭ ءبىرىنشى جارتىجىلدىعىندا ەلىمىزدىڭ اۆتوموبيل نارىعىنىڭ ء«ابسوليۋتتى كوشباسشىسى» ستاتۋسىن ساقتاپ قالعان. سالىق تولەۋدە دە بۇل زاۋىتتا ەشقانداي ماسەلە تۋىنداماعان كورىنەدى.
بىراق يندۋستريا جانە ينفراقۇرىلىمدىق دامۋ مينيسترلىگى «ازيا اۆتو» اق جانە «ازيا اۆتو قازاقستان» اق كاسىپورىندارى كەلىسىم مىندەتتەمەلەرىن ورىنداماعانىن, ال وزگە كاسىپورىندار شاناقتى بالقىتىپ بىرىكتىرۋ جانە بوياۋ بويىنشا تەحنولوگيالىق جابدىقتاردى ىسكە قوسۋ جونىندەگى مىندەتتەمەلەرىن كەلىسىمنىڭ جوسپار-كەستەسىنە ساي ورىنداعانىن حابارلاعان بولاتىن.
الايدا «بيپەك اۆتو – ازيا اۆتو» ءباسپاسوز قىزمەتىنىڭ مالىمەتىنە سۇيەنسەك, ونەركاسىپتىك قۇراستىرۋ بويىنشا كەلىسىمدى توقتاتۋعا بۇگىنگى تاڭدا زاڭدى نەگىز جوق. شاناقتى دانەكەرلەۋ مەن بوياۋدىڭ قۋاتىن كۇشەيتۋدى قولدانىسقا ەنگىزۋ جونىندە مىندەتتەردى ورىنداۋ مەرزىمى قوسىمشا كەلىسىممەن 2020 جىلدىڭ 31 جەلتوقسانىنا دەيىن ۇزارتىلعان.
بۇل ماسەلە كومپانيا قىزمەتكەرلەرىن عانا ەمەس, شىعىسقازاقستاندىقتاردى دا الاڭداتىپ وتىرعانى راس. ءبىرى باسقا اۆتوموبيل ساتۋ ورتالىقتارى باعانى كۇرت كوتەرىپ جىبەرۋى مۇمكىن دەسە, ەندى ءبىرى شەكارادان شەتەلدىك كولىك قولجەتىمدى باعامەن كىرە باستايدى دەپ بولجايدى. ال ەكونوميكا سالاسى ماماندارىنىڭ پىكىرىنشە, «ازيا اۆتو» كومپانياسىنىڭ جۇمىسى توقتاسا, قاراپايىم حالىق ءۇشىن ءتيىمسىز بولۋى مۇمكىن.
– قازىرگى تاڭدا وتاندىق اۆتوكولىك ونەركاسىبىنە مەملەكەت قولداۋ كورسەتۋى كەرەك دەپ ويلايمىن. وتاندىق ءونىمنىڭ قاي-قايسىسى بولسىن حالىققا ءتيىمدى باعامەن ۇسىنىلادى. سول سياقتى وتاندىق اۆتوكولىك تە حالىق ءۇشىن قولجەتىمدى. ال باسقا ورتالىقتارداعى كولىك كلاسى جوعارى بولعانىمەن, باعاسى ورتا جالاقى الىپ وتىرعان تۇرعىندار ءۇشىن ءتيىمسىز, – دەيدى مەنەدجمەنت سالاسىنىڭ Ph.D دوكتورى اقمارال تۇرسىنبەكقىزى.
مەرەي قاينار ۇلى,
جۋرناليست
وسكەمەن
