ونلاين جيىن بارىسىندا سىنىپ جەتەكشىلەرى وقۋشىلاردىڭ اتا-انالارىنا قازىرگى پاندەميا جاعدايىندا مەكتەپتىڭ قانداي وقىتۋ فورماتىن تاڭداعانىن ءتۇسىندىردى. جاڭا وقۋ جىلى قاشىقتان ءبىلىم بەرۋ فورماتىندا باستالادى. اتا-انالاردىڭ تىلەكتەرى مەن وتىنىشتەرى بويىنشا باستاۋىش سىنىپ وقۋشىلارى مەكتەپكە بارىپ وقي الادى. بۇل رەتتە ءبىلىم الۋشىلار مەن پەداگوگتەردىڭ دەنە قىزۋى كۇن سايىن ولشەنەتىن بولادى. كەزەكشى سىنىپتا سوزىلمالى اۋرۋلارى جوق بالالار عانا ءبىلىم الا الادى (وتىنىشتە كورسەتىلەدى). ءبىر سىنىپتا وقۋشى سانى 15-تەن اسپايتىن بولادى. وتىنىشتەردى سىنىپ جەتەكشىلەرى قولجەتىمدى بايلانىس قۇرالدارى ارقىلى قابىلدايدى. «كەزەكشى سىنىپقا» قابىلداۋ 25 تامىزدا باستالادى.
بۇدان بولەك, سانيتارلىق-ەپيدەميالىق جاعدايى قولايلى اۋىلدىق ەلدى مەكەندەردە وقۋ پروتسەسى سانيتارلىق قاۋىپسىزدىك شارالارىن ساقتاي وتىرىپ, ءداستۇرلى فورماتتا جۇرگىزىلەدى.
اتا-انالار بالالاردى مەكتەپكە الىپ كەلىپ, ۇيىنە ءوزى الىپ كەتۋى كەرەك. كەزەكشى سىنىپتاردا ساباقتىڭ ۇزاقتىعى 40 مينۋتتى قۇرايدى. ساباقتار اراسىنداعى ۇزىلىستەر ءار سىنىپقا ءارتۇرلى ۋاقىتتا بەرىلەدى. ءاربىر ەكىنشى ساباقتان كەيىن كابينەتتەردە جانە ءار ۇزىلىستەن كەيىن, اۋىسىمدار اراسىندا, دالىزدەردە, ىلعالدى تازارتۋ جۇمىستارى جۇرگىزىلەدى. مەكتەپ اسحاناسى مەن بۋفەتتىڭ قىزمەتى ۋاقىتشا توقتاتىلدى.
ءبىلىم بەرۋ ۇيىمدارى زارارسىزداندىرۋعا ارنالعان قۇرالدارمەن, اياق كيىمدى زارارسىزداندىرۋعا ارنالعان كىلەمشەلەرمەن, سانيتايزەرلەرمەن قامتاماسىز ەتىلەدى.
مەكتەپ فورماسىنا قويىلاتىن تالاپتار جويىلمايدى, بىراق ءتيىستى بۇيرىققا ۋاقىتشا وزگەرىستەر ەنگىزىلەدى. ياعني اتا-انالار جاڭا وقۋ جىلىندا (1 قىركۇيەكتەن باستاپ 25 مامىرعا دەيىن) بالاسىن مەكتەپكە مەكتەپ فورماسىمەن نەمەسە باسقا ىڭعايلى كيىممەن جىبەرۋگە قاتىستى شەشىمدى ءوزى قابىلدايدى.
شاعىن جيناقتى مەكتەپتەردە وقيتىن وقۋشىلاردىڭ اتا-انالارىنا دا سانيتارلىق شارالاردى ساقتاۋ قاجەتتىلىگى تۋرالى ايتىلدى. سونداي-اق بالالارى قاشىقتان وقيتىن اتا-انالار ءۇشىن ءبىلىم بەرۋ پلاتفورمالارىنىڭ مۇمكىندىكتەرى كورسەتىلدى. ايتا كەتەيىك, ءبىلىم جانە عىلىم مينيسترلىگى قانداي دا ءبىر ءبىلىم بەرۋ ينتەرنەت-پلاتفورماسىن تاڭداۋعا قاتىستى شەشىم قابىلدامايدى. ءاربىر مەكتەپ قاشىقتان وقىتۋدى ۇيىمداستىرۋعا نەگىز بولاتىن ينتەرنەت-پلاتفورمانى ءوزى تاڭدايدى.
وتكەن وقۋ جىلىنىڭ ءتورتىنشى توقسانىنداعىداي, دۇيسەنبىدەن جۇماعا دەيىن «بالاپان» جانە «ەل-ارنا» رەسپۋبليكالىق تەلەارنالارىندا قوسىمشا ءبىلىم بەرۋ رەسۋرسى رەتىندە پايدالانۋ ءۇشىن تەلەساباقتار كورسەتىلەتىن بولادى.
سونىمەن قاتار كارانتيندىك جانە شەكتەۋ شارالارى جاعدايىندا 1-11(12) سىنىپتاردا وقۋ جەتىستىكتەرىن باعالاۋ جۇيەسىنە قاتىستى ۋاقىتشا وزگەرىستەر ەنگىزىلدى. جاڭا وقۋ جىلىندا توقسان سايىن ءبولىم ءۇشىن 1 جيىنتىق جۇمىس جانە توقسان ءۇشىن 1 جيىنتىق جۇمىس جۇرگىزىلەدى. توقساندىق باعالاۋ كۇندەلىكتى باعالاۋ, بجب جانە تجب كورسەتكىشتەرى نەگىزىندە شىعارىلاتىن بولادى.
