وعان ارمەنيا, بەلارۋس, ازەربايجان, قىرعىزستان, موڭعوليا, رەسەي, تاجىكستان جانە وزبەكستان كونستيتۋتسيالىق ادىلەت ورگاندارىنىڭ وكىلدەرى, قوناق رەتىندە كونستيتۋتسيالىق سوت تورەلىگى جونىندەگى دۇنيەجۇزىلىك كونفەرەنتسيانىڭ باس حاتشىسى شنۋتس ديۋرر مىرزا قاتىستى.
ءىس-شارانى اشقان ەۋرازيالىق قاۋىمداستىق توراعاسى ق.ءمامي وسى وتىرىس العاش رەت ونلاين رەجىمدە ءوتىپ وتىرعانىن ايتتى. وعان ءالى دە حالىقارالىق سيپاتتاعى ۇلكەن قاۋىپ ءتوندىرىپ وتىرعان COVID-19 كوروناۆيرۋستىق پاندەمياسى سەبەپ بولۋدا.
– قاۋىمداستىق شەڭبەرىندە ءبىزدىڭ كونستيتۋتسيالىق-قۇقىقتىق ساياساتتىڭ وزەكتى ماسەلەلەرى, سونىڭ ىشىندە قازىرگى جاھاندىق سىن-قاتەرگە بايلانىستى ماسەلەلەر بويىنشا تاجىريبە جانە تاسىلدەر الماسۋعا مۇمكىندىگىمىز بار. بۇل, اسىرەسە 30 تامىزدا اتاپ وتىلەتىن قازاقستان رەسپۋبليكاسى كونستيتۋتسياسىنىڭ 25 جىلدىق مەرەيتويى جىلىندا اسا ماڭىزدى, – دەدى سپيكەر.
ۇيىم مۇشەلەرى قۇقىقتىق سالاداعى ىنتىماقتاستىقتىڭ نەگىزگى باعىتتارىن, جارعىلىق قۇجاتتاردى ودان ءارى جەتىلدىرۋ ماسەلەلەرىن, سونداي-اق قاۋىمداستىقتىڭ كونستيتۋتسيالىق سوت تورەلىگى جونىندەگى دۇنيەجۇزىلىك كونفەرەنتسيانىڭ الداعى 5-كونگرەسىنە قاتىسۋ ماسەلەلەرىن تالقىلادى. تاراپتار دۇنيەجۇزىلىك كونگرەسس اياسىندا قاۋىمداستىق وتىرىسىن وتكىزۋ تۋرالى شەشىم قابىلدادى.
ازيالىق كونستيتۋتسيالىق سوتتار مەن بالاما ينستيتۋتتار قاۋىمداستىعى جانە باسقا دا قاۋىمداستىقتارمەن ىنتىماقتاستىق ماسەلەلەرى اڭگىمەگە تۇيتكىل بولدى. ءوزارا ءىس-قيمىلدى كۇشەيتۋ ءۇشىن ازيالىق قاۋىمداستىقپەن ىنتىماقتاستىق تۋرالى مەموراندۋمعا قول قويۋ ۇسىنىلدى.
سونىمەن قاتار دەلەگاتسيا باسشىلارى ءبىر-ءبىرىن ءوز ەلدەرىندە بولىپ جاتقان ءىس-شارالار مەن ودان ءارى ىنتىماقتاستىق جوسپارلارى تۋرالى حاباردار ەتتى.
ق.ءمامي وتىرىسقا قاتىسۋشىلارعا بەلسەندى ۇستانىمى, ورتاق مىندەتتەردى شەشۋگە دايىندىعى ءۇشىن العىسىن ءبىلدىرىپ, 27 تامىزعا بەلگىلەنگەن قازاقستان رەسپۋبليكاسى كونستيتۋتسياسىنىڭ 25 جىلدىعىنا ارنالعان حالىقارالىق بەينەكونفەرەنتسياعا (كونگرەسكە) شاقىردى.
