ەرىكتىلەر قالاداعى از قامتىلعان, كوپبالالى وتباسىلاردان شىققان وقۋشىلاردىڭ وقۋ ۇلگەرىمىنە كومەكتەسەدى. جوبا نۇر-سۇلتان قالالىق جاستار ساياساتى ماسەلەلەرى باسقارماسىنىڭ ۇيىمداستىرۋىمەن قولعا الىندى. اتالمىش باستاما ەرىكتىلەر جىلى اياسىندا «بىرگەمىز: ءبىلىم» جالپىۇلتتىق جوباسى نەگىزىندە جۇزەگە اسۋدا.
جالپى ەرىكتىلەر 7 باعىت بويىنشا جۇمىس ىستەيدى. ونىڭ ىشىندە «بىرگەمىز: ءبىلىم» جوباسى بويىنشا قالاداعى وقۋشىلاردى, اسىرەسە جوعارعى سىنىپ وقۋشىلارىن ەمتيحانعا, ۇبت-عا, كوپتەگەن وليمپيادالىق سايىستارعا دايىنداۋعا كومەكتەسەدى.
بىلىكتى ماماندار ەرىكتى قىزمەتىندە ءوز ءبىلىمى مەن تاجىريبەسىن وقۋشىلارعا ۇيرەتەدى. ولار قازاق ءتىلى, اعىلشىن, ينفورماتيكا, فيزيكا جانە ت.ب. پاندەر بويىنشا رەپەتيتور بولادى. كۇنىنە 1-2 ساعات ۋاقىت ءبولىپ, ءبىر ءپان بويىنشا ءبىر اي وقىتىپ, دايىندايدى. ياعني, ءبىر ادامعا 30 ساعاتتان كەم ەمەس ۋاقىت جۇمسالادى.
«قالاداعى از قامتىلعان, كوپبالالى وتباسىلاردان شىققان وقۋشىلاردى ىرىكتەپ الۋعا تىرىسامىز. ءتىزىمدى نۇر-سۇلتان قالالىق ءبىلىم باسقارماسىمەن بىرلەسە وتىرىپ ازىرلەيمىز. الەۋمەتتىك جاعدايى تومەن وتباسىن ىزدەپ, مونيتورينگ جاساپ, ىرىكتەپ الامىز. ءبىز تەك ولاردىڭ وقۋ ۇلگەرىمىنىڭ جاقسى بولۋىن قاداعالاپ قانا قويماي, سونىمەن قاتار 100 شاقتى وقۋشىنى مەكتەپكە قاجەتتى قۇرال-جابدىقتارمەن دە قامتۋدى جوسپارلاپ وتىرمىز», – دەيدى نۇر-سۇلتان قالالىق جاستار ساياساتى ماسەلەلەرى باسقارماسىنىڭ ءبولىم باسشىسى اقۇلان تاستەمىر.
اتالمىش باستاما كارانتين جاعدايىندا ونلاين-فورماتتا وتەدى. ZOOM, Skype, Whats App, ت.ب. الەۋمەتتىك جەلىلەردى پايدالانا وتىرىپ, تالىمدىك-رەپەتيتورلىق جۇمىستار جۇرگىزىلەدى.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
