جالپى, الماتى وبلىسى زەينەتكە شىعۋشىلار سانى جونىنەن رەسپۋبليكا بويىنشا كوش باستاپ تۇر. دەرەك بويىنشا زەينەت جاسىنا جەتكەن تۇرعىنداردىڭ ۇلەسى بويىنشا ەكىنشى ورىندا 4 500 ءوتىنىش قابىلداعان تۇركىستان وبلىسى, ءۇشىنشى ورىندا 3 800 اداممەن شىعىس قازاقستان وبلىسى تۇر. ال «ەڭ جاس تۇرعىندار» اتىراۋ وبلىسىندا تۇرادى ەكەن, مۇنايلى وڭىردە جىل باسىنان بەرى 1295 ادام عانا زەينەتكە شىعۋعا ءوتىنىش بەرگەن كورىنەدى.
ەلىمىزدە ورىن العان ەپيدەميالىق جاعداي زەينەت جاسىنا جەتكەن ادامداردىڭ ءوتىنىشىن قابىلداۋعا دا اسەر ەتىپ وتىر. بۇل ىسپەن «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ بولىمشەلەرى تىڭعىلىقتى اينالاسىپ كەلەدى. ادامدار كوپ شوعىرلاناتىن ورىن بولعاندىقتان حالىققا قىزمەت كورسەتۋ ورتالىقتارىنداعى سانيتارلىق تالاپتار كۇشەيتىلىپ, تۇرعىندارعا قاجەت قىزمەت تۇرلەرىن قاشىقتان كورسەتۋ ءىسى جولعا قويىلدى. قازىر «ازاماتتارعا ارنالعان ۇكىمەت» كورپوراتسياسىنىڭ فرونت-كەڭسەلەرى قۇجاتتاندىرۋ جۇمىسىن تولىقتاي قالىپقا ءتۇسىرىپ, تۇرعىندارعا قاجەتتى قۇجاتتى بەرۋ مەن قابىلداۋ ءىسىن جولعا قويدى. ونىڭ ىشىندە جاسىنا بايلانىستى زەينەتكە شىعۋ بويىنشا قۇجات راسىمدەۋ دە بار. ءدال وسى باعىتتا «ازاماتتارعا ارنالعان ۇكىمەت» كورپوراتسياسى الماتى وبلىستىق فيليالىنىڭ قىزمەتكەرلەرى 5253 ادامنىڭ ءوتىنىشىن قابىلداپ, ءتيىستى قىزمەت كورسەتكەن.
"جاسىنا بايلانىستى زەينەتاقى تولەمدەرىن تاعايىنداۋ تۋرالى ءوتىنىشتى زەينەت جاسى تولعانعا دەيىن 10 كۇن بۇرىن «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ فرونت-ءوفيسى ارقىلى بەرۋ كەرەك. سانيتارلىق تالاپقا سايكەس, قازىر حالىققا قىزمەت كورسەتۋ ورتالىقتارىنا كەلۋ ءۇشىن الدى نالا كەزەك الۋ مىندەتتى. ياعني, قۇجات راسىمدەۋشى الدىمەن egov.kz پورتالى نەمەسە eGovKzBot2.0 تەلەگرام-بوتى ارقىلى كەزەك ۋاقىتىن برونداۋ قاجەت. بۇل ادامداردىڭ قاۋىپسىزدىگىن قامتاماسىز ەتۋ جانە ىندەتتىڭ تارالۋ قاۋىپىن باسەڭدەتۋ ءۇشىن جاسالعان امال. سونداي-اق, مەملەكەتتىك كورپوراتسيا eGov.kz پورتالىنا ەلەكتروندى ءوتىنىشتى جىبەرۋ ارقىلى قاشىقتان زەينەتاقى تاعايىنداۋ مۇمكىندىگىن جولعا قويدى. قازىر تۇرعىندار بۇل قىزمەتتى ۇيدەن شىقپاي-اق پايدالانىپ جاتىر", - دەيدى «ازاماتتارعا ارنالعان ۇكىمەت» كورپوراتسياسى الماتى وبلىستىق فيليالىنىڭ باسشىسى ەرمەك بەكجۇنىسوۆ.
جالپى, كەز كەلگەن قۇجات راسىمدەۋدى قاشىقتان ىستەپ ۇيرەنۋ پاندەميا كەزىندە ىندەت قاۋىپىن جۇقتىرۋ تاۋەكەلىن ازايتۋمەن قاتار ادامنىڭ ۋاقىتىن ۇنەمدەۋ ءۇشىن اسا قولايلى. ءارى بۇل قيىن شارۋا ەمەس ەكەن. مىسالعا, قاجەت انىقتاما مەن قۇجاتتى الۋ ءۇشىن ازامات ەلەكتروندىق تسيفرلى قولتاڭبا نەمەسە بىرجولعى قۇپيا ءسوز ارقىلى egov.kz پورتالىنا كىرۋى كەرەك. ودان ارعى جۇمىستىڭ ءبارى كورسەتىلگەن نۇسقاۋلىق بويىنشا جالعاسا بەرەدى.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
