ءبىلىم • 13 تامىز، 2020

وقۋ جىلىنا دايىندىق ماسەلەسى پىسىقتالدى

4457 رەت كورسەتىلدى

بيىلعى وقۋ جىلىندا سولتۇستىك قازاقستان وبلىسىندا 75 مىڭنان ارتىق وقۋشى 477 مەكتەپكە بارادى، دەپ حابارلايدى Egemen.kz

ءبىر قۋانىشتىسى سول، وقۋشىلار سانى بىلتىرعىدان ارتىق. بىلتىر 8،5 مىڭ ءبۇلدىرشىن مەكتەپ تابالدىرىعىن اتتاسا بيىل ولاردىڭ سانى 9 مىڭعا جۋىق.

جۋىردا وبلىس اكىمى قۇمار اقساقالوۆ جارتى ايداي عانا مەرزىم قالعان جاڭا وقۋ جىلى الدىنداعى دايىندىق تۋرالى جۋرناليستەردىڭ الدىندا بريفينگ بەردى.

"مەكتەپتەردە كۇردەلى جوندەۋ جۇمىستارى جالعاسۋدا. وتكەن جىلى 142 مەكتەپ جاڭارسا، بيىل 107 ءبىلىم ورداسى جوندەلۋدە. وسىلايشا، ەكى جىل ىشىندە ءبىز ءوڭىر مەكتەپتەرىنىڭ جارتىسىن جاڭارتامىز"، دەدى اكىم.

سونىمەن بىرگە بيىلعى وقۋ جىلىندا ءۇش جاڭا مەكتەپ پايدالانۋعا بەرىلەتىندىگى ايتىلدى. سونىڭ ىشىندە قىزىلجاردىڭ "جاس وركەن" ىقشام اۋدانىنداعى 900 ورىندىق قازاق مەكتەبى بار. سونداي-اق قالا ىرگەسىندەگى بەسكول اۋىلىندا دا 300 ورىندىق جاڭا مەكتەپ اشىلادى. ءوزىنىڭ سوزىندە قۇمار ىرگەباي ۇلى بارلىق مەكتەپتەردىڭ بەينەباقىلاۋمەن قامتاماسىز ەتىلگەنىن ايتتى. سونىمەن قاتار ولاردىڭ كولىك پاركى دە جاڭالانعان، بيىل ولارعا 43 اۆتوبۋس بەرىلگەن. 231 مەكتەپكە جيھاز جانە 324 مەكتەپكە سپورت قۇرالدارى الىنىپتى.

سوڭعى ءۇش جىلدا 1600 دانا كومپيۋتەر ساتىپ الىنعان. كارانتين كەزىندە ۇنەمدەۋ ەسەبىنەن تۇرمىسى تومەن وتباسىلاردىڭ بالالارىنا 580 كومپيۋتەر الىنىپ، تاراتىلعان. جاڭا وقۋ جىلىندا مەكتەپتەرگە الىناتىن تەحنيكالىق قۇرالداردىڭ قۇنى سوڭعى 10 جىلداعى كومپيۋتەرلەردىڭ باعاسىنا جۋىق.

وقۋ پروتسەسىنىڭ قالاي جۇرگىزىلەتىنىن ايتقاندا اكىم اۋىلدارداعى 318 شاعىن جيناقتى مەكتەپتە وقۋ شتاتتىق رەجىمدە وتەتىنىن اتاپ ءوتتى.

ء"بىر سىنىپتا 15 بالادان اسپاۋى قاتتى قاداعالانادى. ارتىق بولسا ەكى اۋىسىمدا وقيدى. قاشىقتىقتان وقىتاتىن مەكتەپتەردەگى باستاۋىش سىنىپتاردا اتا-انالاردىڭ ءوتىنىشى بويىنشا 2 مىڭ كەزەكشى توپ اشىلادى. مۇندا دا ءبىر سىنىپتا 15 بالادان عانا وقيتىن بولادى"، دەدى ول.

ارينە، جىلداعىداي بارلىق وقۋشىلار تەگىن وقۋلىقتارمەن قامتاماسىز ەتىلەدى. قاشىقتىقتان وقۋ ءۇشىن مۇعالىمدەر مەن وقۋشىلارعا قاجەت 15 مىڭعا جۋىق كومپيۋتەر تاراتىلماقشى. سونىڭ ىشىندە كومپيۋتەرلەر تابىسى تومەن وتباسىلاردىڭ بالالارىنا، جەتىمدەرگە جانە ەرەكشە بالالارعا بەرىلەدى.

سونداي-اق، 373 مۇعالىمگە كومپيۋتەرلەر ۋاقىتشا پايدالانۋعا بەرىلەدى.

قاشىقتىقتان وقىتۋ ءۇشىن ساپالى ينتەرنەت كەرەك ەكەنى بەلگىلى. بۇگىنگى تاڭدا وبلىستاعى 635 ەلدى مەكەننىڭ 437-نە كەڭ جولاقتى ينتەرنەت جەتكىزىلگەن. بيىل تاعى 133 اۋىل ساپالى ينتەرنەتكە قوسىلماق. ءسويتىپ جىل سوڭىنا دەيىن 570 اۋىل كەڭ جولاقتى ينتەرنەتپەن قامتاماسىز ەتىلمەك. بۇل بارلىق اۋىلداردىڭ 90 پروتسەنتى.

شالعاي اۋىلدارعا 1،5 مىڭ روۋتەر مەن USB-مودەمدەر ساتىپ الىنادى ەكەن. "ولاردىڭ بارلىعى تابىسى تومەن وتباسىلاردىڭ بالالارىنا بەرىلەدى. سونىمەن بىرگە بارلىق مەكتەپتەردە سانيتارلىق شارالار كۇشەيتىلەدى. تەپلوۆيزورلار، سانيتايزەرلەر مەن دەزينفەكتسيالىق قۇرالداردىڭ قاجەتتى كولەمى الىنادى. قاجەتسىز بايلانىستاردى بولدىرماۋ ءۇشىن مەكتەپتەردە اسحانالار ۋاقىتشا جۇمىس ىستەمەيدى"، دەدى ق.اقساقالوۆ.

1 قىركۇيەكتەن باستاپ بارلىق مەكتەپتەردە وقۋ قاشىقتىق فورماتتا وتەتىندىگى دە ايتىلدى.

"تەلەساباقتاردىڭ كورسەتىلىمى ء"ال-فارابي" جانە "ەل-ارنادا" 9.00-دەن 18.00-گە دەيىن جۇرگىزىلەدى. ولاردى وبلىستىڭ بارلىق اۋىلدارىندا "OTAU TV" ارقىلى كورۋگە بولادى. بۇدان باسقا، "قازتەلەراديونىڭ" 29 ستانتسياسى ارقىلى حابار تاراتۋ كوزدەلگەن. قوسىمشا تاعى 13 ستانتسيا قوسىلادى. قورىتىندىسىندا وبلىستى قامتۋ - 100 پروتسەنتتى قۇراماق"، دەدى اكىم.

ق.اقساقالوۆ كوللەدجدەردىڭ جۇمىسىنا دا توقتالىپ ءوتتى.

"قازىر وبلىستا 25 كوللەدج بار، سونىڭ ۇشەۋى قاشىقتىقتان جۇمىس ىستەسە، ون ەكىسى ارالاس وقىتۋ جۇيەسىنە كوشەدى. اۋىلدارداعى 10 كوللەدجدە وقىتۋ شتاتتىق رەجىمدە وتەدى"، دەدى ول.

ايتا كەتەتىن جايت، وبلىستا قازىر كادر تاپشىلىعى ماسەلەسى تولىق شەشىلگەن ەكەن. سوڭعى ءۇش جىلدا وڭىرگە 1 390 جاس مۇعالىم سىرتتان كەلىپتى. بيىل تاعى 315 جاس مامان كەلمەكشى.

ءسوزىنىڭ سوڭىندا ق.اقساقالوۆ قاشىقتىقتان وقىتۋ فورماتىنىڭ وڭاي ەمەس ەكەنىن، بۇل بالالار ءۇشىن عانا ەمەس، مۇعالىمدەرگە دە ۇلكەن سىن ەكەنىن ەسكە سالدى.

"مۇعالىمدەر ءۇشىن "قاشىقتىقتان وقيمىن" ونلاين-كۋرسى ازىرلەندى. قازىردىڭ وزىندە 3 مىڭعا جۋىق مۇعالىم دايارلىقتان ءوتتى. وقۋ جىلى باستالعانعا دەيىن تاعى 10 مىڭ ادام وقيدى"، دەدى ول.

 

سوڭعى جاڭالىقتار

ۇقساس جاڭالىقتار