جوبا بويىنشا ايماققا ەلىمىزگە بەلگىلى عالىمداردى شاقىرىپ, وبلىس تۇرعىندارىنا اباي قۇنانباي ۇلى, شوقان ءۋاليحانوۆ, ءابۋ ناسىر ءال-فارابي سىندى ۇلى تۇلعالاردىڭ ءومىرى مەن شىعارماشىلىعى تۋرالى دارىستەر ۇيىمداستىرىلۋ كەرەك بولاتىن. اشىق دارىستەردى قالاعان تىڭدارمان قاتىسا الاتىنداي اشىق الاڭدا وتكىزۋ كوزدەلگەن. وسىنداي ماقساتپەن باسقارما شاقىرتۋىمەن ناۋرىز ايىندا بەلگىلى عالىم عاريفوللا ەسىم قوستانايعا كەلىپ, حاكىم ابايدىڭ دانالىق دۇنيەتانىمى تۋرالى ءدارىس وقۋى ءتيىس ەدى. بىراق يگى باستاماعا الەمدى جايلاعان ىندەت كەدەرگى بولىپ, پاندەميا ءوز پارمەنىن جۇرگىزە باستادى. ايماقتا شەكتەۋ شارالارى جاريالانىپ, ادام كوپ شوعىرلاناتىن شارالاردى وتكىزۋگە تىيىم سالىندى. وسىلايشا, عالىمنىڭ قوستانايعا ءىسساپارى امالسىز كەيىنگە شەگەرىلدى.
كارانتين ۋاقىتى ۇزارىپ, ەلدەگى سانيتارلىق ساقتىق شارالارى اياققا تۇساۋ سالا بەرگەن سوڭ, ىشكى ساياسات باسقارماسى ابايتانۋشىمەن كەزدەسۋدى بيىل ەلىمىزدە تۇڭعىش رەت اتالىپ ءوتىپ جاتقان اباي كۇنىنە ورايلاستىرىپتى. باسقارما وكىلدەرى عالىمنىڭ "حاكىم اباي جانە قازىرگى زامان" دەپ اتالاتىن ۆيدەودارىسىن 3 تامىز كۇنى نۇر-سۇلتان قالاسىندا بەينەتاسپاعا ءتۇسىرىپ العان. عالىمنىڭ ابايتانۋعا قاتىستى تىڭ ويلارعا تولى بۇل ءدارىسى بۇگىن, ياعني 10 تامىز – اباي كۇنى مەرەكەسىنە وراي ساعات 10:00-دە جەرگىلىكتى "Qostanai" تەلەارناسىنىڭ ەفيرى ارقىلى ارقىلى كورسەتىلدى.
قوستاناي وبلىسى
