6 تامىز كۇنى ساعات 19.30 شاماسىندا كوكتەم ىقشام اۋدانىندا جاس بالاعا سەكسۋالدىق سيپاتتاعى زورلىق زومبىلىق ارەكەتىن جاساۋعا وقتالعان ازاماتتى قىراعىلىقپەن بايقاعان بويى دەرەۋ ءجىتى قيمىلداپ, ازاماتتىق مىندەتتەرىن ابىرويمەن اتقارعان قالا تۇرعىندارىن وبلىس پوليتسيا دەپارتامەنتىنىڭ باستىعى قامزا ۇمبەتقاليەۆ ارنايى شاقىرىپ, قابىلدادى.
كارانتين رەجىمىنىڭ تالاپتارىن, ياعني قورعانۋ قۇرالدارى مەن ارا قاشىقتىقتى ساقتاي وتىرىپ, وبلىستىڭ باس پوليتسەيى قىلمىستىڭ الدىن الىپ, كۇدىكتىنى ۇستاۋدا كورسەتكەن كومەكتەرى ءۇشىن اتىراۋ قالاسىنىڭ تۇرعىندارى شاميل كۋليەۆ, ارتۋر نوۆيكوۆ جانە 16 جاستاعى الىشەر تولەگەنگە ءوز اتىنان جانە دەپارتامەنتتىڭ جەكە قۇرامى اتىنان العىس حاتپەن ماراپاتتاپ, سىيلىقتار تابىستادى. قامزا باقتىعالي ۇلى الىشەرگە ازاماتتىق ۇستانىمى جانە وسىنداي جاعدايعا بەيجاي قاراماي كومەككە كەلگەنى ءۇشىن العىس ايتىپ, بولاشاقتا ىشكى ىستەر ورگاندارىندا قىزمەت ەتۋگە شاقىردى. ماراپاتتالعان ازاماتتارعا قامزا باقتىعالي ۇلى ريزاشىلىعىن ءبىلدىردى.
– كۇدىكتىنى ۇستاۋعا كورسەتكەن كومەكتەرىڭىزدى ەرلىك دەپ بىلەمىز. ەگەمەندى ەلىمىزدىڭ وسكەلەڭ ۇرپاعى سىزدەردەي جاناشىر بولسا, ەل ەرتەڭى كەمەل بولارىنا سەنىم مول. سىزدەرگە مىقتى دەنساۋلىق, جارقىن بولاشاق تىلەيمىن, – دەدى قامزا باقتىعالي ۇلى.
