ءبىلىم • 04 تامىز، 2020

باتىس قازاقستاندا 17 مىڭنان اسا وقۋشى وففلاين وقىعىسى كەلەدى

85 رەت كورسەتىلدى

باتىس قازاقستان وبلىستىق ءبىلىم باسقارماسىنىڭ باسشىسى ايگۇل مىڭباەۆا الداعى جاڭا وقۋ جىلىنىڭ ەرەكشەلىكتەرى، وعان دايىندىق تۋرالى ايتىپ بەردى دەپ حابارلايدى Egemen.kz

ايگۇل ادىلگەرەيقزىنىڭ ايتۋىنشا، وبلىستا جاڭا 2020-2021 وقۋ جىلىنا دايىندىق جۇيەلى ءجۇرىپ جاتىر.

– مەكتەپتەردەگى وقىتۋ فورماتىن انىقتاۋ، وقۋشىلار مەن پەداگوگتاردى كومپيۋتەرمەن قامتاماسىز ەتۋ باعىتىنداعى شارالار جاسالۋدا. الدىن الا جاسالعان تالداۋلارعا بايلانىستى ەپيدەميولوگيالىق جاعدايى تۇراقتى شالعاي اۋىلدىق ەلدى مەكەندەردىڭ مەكتەپتەرىندە بالالاردى شتاتتىق رەجيمدە، ياعني ادەتتەگىدەي وقىتۋ جوسپارلانعان، – دەدى باسقارما باسشىسى.

ياعني شالعاي اۋىلدارداعى شاعىن 220 مەكتەپتە قوڭىراۋ سوعىلىپ، 16251 وقۋشى قادىمگىدەي پارتادا وتىرىپ ءبىلىم الماق. ارينە، ول جەرلەردە ساقتىق، قاۋىپسىزدىك شارالارى بارىنشا قاتاڭ ساقتالاتىن بولادى.

دەگەنمەن، وقۋشىلاردىڭ دەنى وبلىس ورتالىعىندا، ءىرى ەلدىمەكەندەردە تۇرادى. سوندىقتان قالالاردا جانە وقۋشى كونتينگەنتى كوپ اۋىلدىق مەكتەپتەردە قاشىقتىقتان وقىتۋ قاراستىرىلعان. مۇنداي 160 مەكتەپتە 90 425 وقۋشى وقيدى.

– وتكەن وقۋ جىلىنىڭ سوڭعى توقسانىنداعى تاجىريبە كورسەتكەندەي، باستاۋىش سىنىپ وقۋشىلارى ءۇشىن قاشىقتان وقۋدىڭ قيىندىعى بايقالدى. اتا-انالار ۇل-قىزىنىڭ بارىنشا قاۋىپسىزدىك شارالارىن ساقتاپ، مەكتەپتە وقىعانىن قالاپ وتىر. سوندىقتان قاشىقتان وقىتىلاتىن مەكتەپتەردە باستاۋىش سىنىپتار ءۇشىن كەزەكشى سىنىپتار اشۋ جوسپارلانۋدا. بۇل دەگەنىڭىز – 1376 سىنىپ، 17 مىڭنان استام وقۋشى، – دەيدى ايگۇل مىڭباەۆا.

قاشىقتان وقۋدىڭ ساپاسى ءبىلىم وردالارىنىڭ تەحنيكالىق مۇمكىندىگىنە تىكەلەي بايلانىستى. سوندىقتان مەكتەپتەردەگى كومپيۋتەرلىك قۇرىلعىلاردى جاڭارتۋ قولعا الىنعان. وبلىس بويىنشا بيىل ۇنەمدەلگەن قاراجات ەسەبىنەن 1454 كومپيۋتەر الىنعان ەكەن. قوسىمشا 1922 كومپيۋتەر ساتىپ الۋ جوسپارلانىپتى. ال از قامتىلعان، كوپبالالى وتباسى وقۋشىلارى بىلتىرعىداي مەكتەپ كومپيۋتەرلەرىمەن ۋاقىتشا قامتاماسىز ەتىلەدى.

تاعى ءبىر كۇردەلى ماسەلە – مەكتەپتەردىڭ ينتەرنەت جىلدامدىعىن كوتەرۋ. باسقارما باسشىسىنىڭ ايتۋىنشا، قاشىقتان وقىتىلاتىن بارلىق مەكتەپتى ينتەرنەت پلاتفورمالارىنا قوسۋ بويىنشا ءتيىستى ورىندارمەن كەلىسىم شارت جاسالىپ جاتىر ەكەن. پەداگوگتاردىڭ ءىت قۇزىرەتتىلىگىن ارتتىرۋ، ءتۇرلى ينتەرنەت پلاتفورمالاردى پايدالانۋ، ءبىلىم الۋشىلارمەن كەرى بايلانىستى ءتيىمدى ۇيىمداستىرۋ ماقساتىندا وقىتۋ سەمينارلارى جۇرگىزىلمەك. ءپان مۇعالىمدەرىن ادىستەمەلىك قولداۋ ماقساتىندا بارلىق ءپان بويىنشا تىرەك كونسپەكتىلەر مەن بەينە كونتەنتتەر دايىندالىپ جاتىر.

– وبلىستىڭ 12 262 پەداگوگى قازاقستان رەسپۋبليكاسى ءبىلىم جانە عىلىم مينيسترلىگى ۇيىمداستىرعان قاشىقتان وقىتۋ ماسەلەلەرىنە ارنالعان كۋرستا وقىدى. 2020-2021 وقۋ جىلىنا وقۋلىقتار مەن وقۋ-ادىستەمەلىك كەشەندەرمەن قامتاماسىز ەتۋ ماقساتىندا جەرگىلىكتى بيۋدجەتتەن 2839،5 ملن. تەڭگە قاراجات ءبولىندى. بۇل قارجىنىڭ 39،3 ملن تەڭگەسى بۇل وقۋلىقتاردى ءار مەكتەپكە، ءار وقۋشىعا جەتكىزۋ ءۇشىن تاسىمالداۋ شىعىندارىنا قاراستىرىلدى، – دەيدى ايگۇل مىڭباەۆا.

ايتپاقشى، بيىل باتىس قازاقستان وبلىسىندا 32 ءبىلىم بەرۋ نىسانىن كۇردەلى جوندەۋ ءۇشىن 9،4 ملرد تەڭگە بولىنگەن بولاتىن.

سوڭعى جاڭالىقتار

ۇقساس جاڭالىقتار