جالپى, جوبانىڭ ءوزى ەل دامۋىنا ۇلەسىن قوسىپ جۇرگەن كەيىنگى بۋىن وكىلدەرىن ناسيحاتتاۋ, ولاردىڭ ەڭبەك تاجىريبەسىن تانىستىرۋ ماقساتىندا ۇيىمداستىرىلعان بولاتىن. قازىر بۇل ماقسات تولىعىمەن اقتالىپ, «100 جاڭا ەسىم» قاتارى جىل سايىن تولىعىپ كەلەدى. ياعني ەل ءۇمىتىن اقتايتىن جاستاردىڭ سانى دا ءوسىپ وتىر دەگەن ءسوز. «وسى جوبا ارقىلى ءتۇرلى سالادا قازاقستاندا دارىندى جاستار بار ەكەنىن كورسەتكىمىز كەلەدى. بۇگىندە ولاردىڭ تابىستى تاجىريبەسى كوپتەپ كەزدەسەدى. وكىنىشكە قاراي, كۇندەلىكتى ومىردەگى قاربالاس جۇمىستارمەن وسى ادامداردى بايقاماي ءجۇرۋىمىز مۇمكىن. سوندىقتان بۇل ادامداردىڭ تابىستى ەڭبەك تاجىريبەسىمەن ماقتاناتىنىمىزدى كورسەتكەنىمىز ءجون» دەگەن بولاتىن جوبا ماڭىزدىلىعى جايىندا ايتقان سوزىندە پرەزيدەنت اكىمشىلىگى باسشىسىنىڭ ورىنباسارى داۋرەن اباەۆ.
جوباعا قاتىسىپ, جەڭىمپاز اتانعاندار قاتارى جەتىسۋ جاستارى اراسىندا دا بار. زامانداستارىنىڭ اراسىنان توپ جارعان تالانتتى, تاعدىرلى ۇرپاقتىڭ قاتارىندا ايماقتىڭ الەۋمەتتىك – ەكونوميكالىق, رۋحاني دامۋىنا ۇلەس قوسىپ جۇرگەن كوشباسشىلار تۇر. سولاردىڭ ءبىرى – ەلدار ساپاروۆ. ەلدار «100 جاڭا ەسىم – 2019» جوباسىنىڭ جەڭىمپازى. ەلدار ول كەزدە وبلىستىق ازاماتتىق اليانس ۇيىمىنا جەتەكشىلىك ەتەتىن. ايماقتاعى قوعامدىق ۇيىمداردىڭ باسىن قوساتىن بۇل ۇيىم ءتۇرلى سالاداعى بەلسەندىلەردى ورتاق يدەياعا جۇمىلدىرىپ, ەلدىڭ دامۋىنا ۇلەس قوسىپ ءجۇر. جوباعا قاتىسۋعا ۇسىنىس تۇسكەندە ەلداردى وسى قوعامدىق ۇيىمنىڭ قاتىسۋشىلارى بىردەن قولداعان. بۇل جاس مامانعا قوعام بەلسەندىلەرى تاراپىنان جۇكتەلگەن سەنىم عانا ەمەس, ونىڭ ىسكەرلىگىنە بەرىلگەن باعا مەن قۇرمەتتىڭ بەلگىسى دە ەدى. ناتيجەسىندە, ەلدار ساپاروۆ «100 جاڭا ەسىم» جوباسىندا باسىم داۋىسپەن جەڭىسكە جەتىپ, جەتىسۋلىقتاردىڭ ءۇمىتىن اقتادى. قازىر ەلدار وبلىستىق ىشكى ساياسات باسقارماسى جانىنداعى اقپاراتتىق-تالداۋ ورتالىعىنىڭ جەتەكشىسى بولىپ قىزمەتكە كەلدى. قوعامدىق ۇيىمداردى ورتاق مۇددەگە جۇمىلدىرىپ, جۇمىسىن دوڭگەلەتىپ اكەتكەن جاس مامانعا ەندى ساراپشىلىق باعىتتاعى جۇمىستى جالعاستىرۋ مىندەتى جۇكتەلگەن. ايتپاقشى, ەلدار تالدىقورعان قالالىق ءماسليحاتىنىڭ ەڭ جاس دەپۋتاتى ەكەن. ءوز قاتارىنان وزعان ەلدارمەن از-كەم تىلدەستىك.
– ەلدار, ءبىر سۇحباتىڭدا «100 جاڭا ەسىم» جوباسى ماعان جەڭىس قانا ەمەس, جاۋاپكەرشىلىك تە جۇكتەيدى» دەگەن وي ايتىپسىڭ, قازىر قوعام الدىنداعى ۇستانىمدارىڭ وزگەرىپ, جۇمىستى جاڭا قىرىنان جۇرگىزۋ مۇمكىندىگى بولدى ما؟
– كەز كەلگەن ىستەگى جەڭىستەن كەيىن, مويىنعا ارتىلعان جۇكتىڭ سالماعى ەكى ەسەگە اۋىرلايدى. بۇل – زاڭدىلىق. وسىدان بارىپ, قوعام الدىنداعى مىندەتىڭ ايشىقتالادى ەمەس پە؟ مەنىڭ ۇستانعان ۇستانىمىم نەگىزگى باعىتتان اينىعان جوق. تەك قانا, ماڭىزدىلىعى ارتتى. ءاردايىم ۇسىنعان يدەيا مىقتى بولسا, كەز كەلگەن ءىستى جاڭا قىرىنان الىپ جۇرۋگە بولادى.
– تالدىقورعان قالاسىنداعى ەڭ جاس ءماسليحات دەپۋتاتى ەكەنسىڭ. سايلاۋشىلار الدىنداعى مىندەت پەن پارىزدى قالاي وتەپ ءجۇرسىڭ؟ جالپى, ماسليحاتتارعا جاستار كوپتەپ كەلۋى كەرەك پە؟
– جاستار اتىنان مەنى دەپۋتاتتىققا لايىقتى دەپ تانىدى. بۇل دا ماقتانىشتان بۇرىن ۇلكەن سىن بولدى. ويتكەنى بۇل جەردە تەك مەنىڭ ەمەس بارشا وبلىس جاسارىنىڭ ءيميدجى تۇر دەپ ويلايمىن. مىندەت پەن پارىزىمدى قاي دەڭگەيدە اتقارىپ جاتقانىم سىرت كوزگە بەلگىلى. «اقىلدى اقىلدىمىن دەسە, ونىڭ اقىماقتىعى» دەگەن ءسوز بار عوي, ءوزىمدى ماقتاۋدان اۋلاقپىن. دەگەنمەن ءار سالاعا جاستاردىڭ كەلگەنى دۇرىس. وزگەشە باعىت, جاڭا سارىن الىپ كەلەدى عوي. دەمەك, العا جىلجۋ بولادى.
– «پرەزيدەنتتىك جاستار كادرلىق رەزەرۆى» دەگەن باستاما بار, تاڭداۋ تۇسكەن جاستاردىڭ العاشقى لەگى مەملەكەت قىزمەتىنە كەلدى. جالپى, ساياسي بيلىككە جاڭا كوزقاراستاعى, كرەاتيۆتى جاستار كەلۋى قانداي وزگەرىس اكەلەدى؟
– جاستاردىڭ ساياساتقا كەلۋى الدىمەن قوعامدى جاڭاشىلدىققا الىپ كەلەدى. ەسكى, قاتىپ قالعان ستاندارتتاردان ارىلامىز دەگەن ويدامىن. جىلدامدىق پەن شاپشاڭدىق الدىڭعى ورىنعا شىعىپ, جاڭا تەحنولوگيالار ماڭىزدى ورىنعا يە بولىپ, ەلگە قولايلى جاڭا دامۋ ءداۋىرى قالىپتاسادى.
– ماقساتقا جەتۋ ءۇشىن ۇمىتكەر جاسقا قانداي قاسيەت كەرەك؟
– ماقساتقا جەتۋ ءۇشىن الدىمەن شىدامدىلىق جانە ارەكەت قاجەت. وسى ەكەۋى جاستاردىڭ باستى ارقا سۇيەيتىن كۇشى بولۋى شارت سىندى مەنىڭشە. ال قالعانى تاجىريبەمەن كەلەدى.
جالپى, قازاقتىڭ باعزىدا ايتقان «قاتارىڭنىن الدى بول» دەگەن باتالى ءسوزى بۇگىنگى «100 جاڭا ەسىم» جوباسىنا قاتىسۋشىلارعا قاراتا ايتىلعانداي. ويتكەنى ىسىمەن ۇلگى, ويىمەن وزىق جاس – ەلدىڭ ەرتەڭى. وسكەلەڭ ۇرپاقتىڭ ونەگەلى جولمەن دامۋى مەملەكەتتىڭ ىرگەسىن نىقتاپ, كەلەشەككە دەگەن سەنىمدى بەكىتەدى. ال بولاشاق ەل قىزمەتشىسىنىڭ الدىڭعى ساپىندا «100 جاڭا ەسىم» جوباسىنىڭ جەڭىمپازدارى جۇرگەنى ول سەنىمدى ەكى ەسەلەيتىنى جانە ايان.
الماتى وبلىسى
