ۇكىمەت • 01 تامىز، 2020

قازاقستاندىق اسكەريلەر ليۆانعا بىتىمگەرلىك ميسسياعا اتتاندى

31 رەت كورسەتىلدى

بۇگىن قازاقستاندىق اسكەري قىزمەتشىلەر توبى ليۆانعا بىتىمگەرشىلىك ميسسيالارىن اتقارۋعا اتتاندى.

بۇل «ليۆانداعى بۇۇ-نىڭ ۋاقىتشا كۇشتەرى» ميسسياسىنىڭ قۇرامىندا قىزمەت اتقارۋعا بارا جاتقان ءتورتىنشى بىتىمگەرلەر توبى. وڭىرلىك قولباسشىلىقتار مەن دەسانتتىق-شابۋىلداۋ اسكەرلەرىنىڭ اسكەري قىزمەتشىلەرى 2019 جىلعى قاراشادان بەرى ليۆاندا بولعان قازاقستاندىقتاردى اۋىستىرادى.

«قازاقستان قارۋلى كۇشتەرىنىڭ بىتىمگەرشىلىك قىزمەتى – بۇل حالىقارالىق اسكەري ىنتىماقتاستىقتىڭ دامۋىمەن قاتار اسكەري قىزمەتشىلەر ءۇشىن باعا جەتپەس تاجىريبە. ميسسياعا قاتىسۋ حالىقارالىق قاۋىپسىزدىكتى نىعايتۋعا ىقپالىن تيگىزەدى جانە حالىقارالىق قوعامداستىقتاعى جاۋاپتى مۇشەسى رەتىندە قازاقستان تۋرالى وڭ ءيميدجدى قالىپتاستىرادى. سىزدەردىڭ ەلىمىزدەن جىراقتا جۇرسەڭىزدەر دە ءوز مىندەتتەرىڭىزدى ابىرويمەن ورىندايتىندارىڭىزعا سەنەمىن»، – دەپ دەسانتتىق-شابۋىلداۋ اسكەرلەرىنىڭ قولباسشىسى گەنەرال-مايور قانىش ابۋباكىروۆ بىتىمگەرلەرگە تىلەگىن ايتتى.

بۇرىنعىداي، قازاقستاندىق اسكەري قىزمەتشىلەر جارتى جىل بويى ليۆان رەسپۋبليكاسىنداعى ءۇندى بىتىمگەرشىلىك باتالونى قۇرامىندا بولادى. بىتىمگەرلەر جەرگىلىكتى اۋماقتى پاترۋلدەۋ، ازاماتتىق تۇرعىندارعا كومەك كورسەتۋ، باقىلاۋ بەكەتتەرىن ۇيىمداستىرۋ جانە ميسسيا شتابىنىڭ باسقا دا شارالارىنا قاتىساتىن بولادى. كۇن سايىن قازاقستاندىق جانە ءۇندى بىتىمگەرلەر 50-دەن كەم ەمەس تاپسىرما ورىندايدى.

ليۆانعا اتتاناتىن روتا قۇرامى ءداستۇر بويىنشا 120 ادام قۇرالعان. ەپيدەميولوگيالىق جاعدايدى ەسكەرە وتىرىپ، جەكە قۇرامنىڭ دەنساۋلىعىن ساقتاۋ ماقساتىندا اسكەري قىزمەتشىلەردى جونەلتۋ ەكى كەزەڭدە -تامىز ايىنىڭ باسىندا جانە ورتاسىندا جۇزەگە اسىرىلادى.

بىتىمگەرلەرگە قيىن كليماتتىق جاعدايدا قىزمەت ەتۋلەرىنە تۋرا كەلەدى، سوندىقتان ۇمىتكەرلەر قاتاڭ ىرىكتەۋدەن، مەديتسينالىق كوميسسيادان، مورالدىق-پسيحولوگيالىق تۇراقتىلىقتارىن تەكسەرۋگە ارنالعان سىناقتاردان ءوتتى. بىتىمگەرشىلىك ميسسياسىنىڭ وفيتسەرلەرى مەن سەرجانتتارى اعىلشىن ءتىلىن جاقسى بىلەدى، سونىمەن قاتار بىرىككەن ۇلتتار ۇيىمىنىڭ بىتىمگەرشىلىككە قاتىستى نەگىزگى قۇجاتتارىنىڭ ەرەجەلەرىمەن تانىس.

ەسكە سالا كەتسەك، قازاقستاننىڭ ليۆانداعى بىتىمگەرشىلىك ميسسياسى 2018 جىلدىڭ قازان ايىندا بۇۇ-نىڭ مانداتىنا سايكەس ليۆاندا قازاقستاندىق جانە ءۇندى بىتىمگەرلەرىن بىرلەسىپ ورىستەتۋ تۋرالى مەموراندۋمعا قول قويىلعاننان كەيىن باستالدى.

سوڭعى جاڭالىقتار

ۇقساس جاڭالىقتار