الاش ءۇنى – ارگەنتينا تورىندە

الەم • 31 شىلدە، 2020

الاش ءۇنى – ارگەنتينا تورىندە

73 رەت كورسەتىلدى

ارگەنتينالىقتار بۇگىندە ديماشتى تاۋلىك بويى تىنباي تىڭداپ جاتىر. بۇل تۋرالى dimashnews.com سايتى حابارلادى. «ارگەنتينادا ديماش قۇدايبەرگەن مەن ونىڭ فاناتتارىنا ارنالعان «La Era Dimash» راديوستانتسياسى اشىلدى. اتالعان تولقىندا كۇنى-ءتۇنى قازاقستاندىق ورىنداۋشىنىڭ اندەرى قوسىلادى. ارگەنتيناداعى جانكۇيەرلەر ءۇشىن 2020 جىلدىڭ باستى وقيعاسى وسى بولدى»، دەپ جازدى اتالعان سايت.

ميراس اسان

تەك ديماشتىڭ اندەرى قوسىلاتىن راديوستانتسيا اشۋ تۋرالى وي جەرلەسىمىزدىڭ ارگەنتيناداعى تىڭدارمانى پاولا روميناعا 2019 جىلدىڭ تامىزىندا كەلگەن ەكەن. بويجەتكەننىڭ باستاماسىن تەك لاتىن امەريكاسىنداعى ەمەس، جەر جۇزىندەگى فاناتتار دا قولداعان.

اتالعان سايت جازعانداي، «Dimash´s Dears Argentina» فان-كلۋبى اكىمشىلەرىنىڭ ءبىرى فلاۆيا التاميرانو پاولامەن ارگەنتينالىق فاناتتاردىڭ روساريوداعى كەزدەسۋىندە تانىسقان ەكەن. قىزدار تەز ءتىل تابىسىپ، از ۋاقىتتان كەيىن پاولا «The Dimash Era» دەگەن اتپەن مادەني الماسۋعا ارنالعان پاراقشا اشقان. بۇل پاراقشادا پاولا قازاقستان مادەنيەتىن وزگە ەلدەردىڭ مادەنيەتىمەن سالىستىرا وتىرىپ، ۇقساستىعى جانە ايىرماشىلىعى تۋرالى جاريالايدى ەكەن.

فاناتتار تاراپىنان وڭ باعا العان پاولا دۇنيە جۇزىندەگى فاناتتارعا تارتۋ جاساعىسى كەلگەن. ويلانا ءجۇرىپ سوڭىندا جەكە راديو ستانتسيا اشۋعا بەل بۋىپتى. جاڭا يدەياسى تۋرالى پاولا ارگەنتينالىق Dears-قا حابارلايدى، ال ولار ءوز كەزەگىندە قۋانا-قۋانا قولداۋ تانىتقان.

ايتا كەتۋىمىز كەرەك، راديوستانتسيانىڭ نەگىزگى ماقساتى – الەمدە بولىپ جاتقان جاعدايعا بايلانىستى قينالعان، مۇقتاج جاندارعا، فاناتتارعا باقىت سىيلاۋ. راديونى WiFi جەلىسى جوق ورىنداردا دا ءموبيلدى تراففيك جۇمساماي-اق تىڭداي بەرۋگە بولادى. ول ءۇشىن «ZenoRadio» ءموبيلدى قوسىمشاسىن «App Store» جانە «Google Play-دەن» جۇكتەپ الۋعا بولادى.

ديماش بۇگىندە الەمگە تانىمال تۇلعا. قارشاداي ۇلدىڭ قازاق ساحاراسىندا تۋىپ، از عانا جىلدىڭ ىشىندە اتى الەمگە ءماشھۇر بولۋى، اتلانت مۇحيتىن اسىپ ارگەنتينا تورىندە تاۋلىكتەر بويى ءانى شىرقالىپ جاتۋى – ۇلتىمىزعا تەڭدەسسىز مەرەي.

قازاقتىڭ ءانى مەن ءسانىن، ونەرى مەن ءتىلىن ناسيحاتتاپ جۇرگەن قۇبىلىستى ەل ىشىندە بۇدان دا ۇلكەن قۇرمەتپەن ناسيحاتتاۋىمىز كەرەك قوي.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز