ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆتىڭ توراعالىعىمەن وتكەن شاراعا ادام قۇقىقتارى جونىندەگى ۋاكىل ەلۆيرا ءازىموۆا, ءمام ديرەكتورلارى مەن الەۋمەتتىك سالا قىزمەتكەرلەرى قاتىستى.
ەرلان اۋكەنوۆ ءوز سوزىندە ەڭبەك جانە حالىقتى الەۋمەتتىك قورعاۋ مينيسترلىگى ارنايى الەۋمەتتىك قىزمەتتەردىڭ ساپاسىن ارتتىرۋ بويىنشا جۇيەلى جۇمىس جۇرگىزىپ جاتقانىن اتاپ ءوتتى. ءمام قىزمەتىن جەتىلدىرۋ ماقساتىندا مينيسترلىك جەرگىلىكتى اتقارۋشى ورگاندار مەن قوعامدىق بىرلەستىكتەردىڭ ۇسىنىستارىن جينادى. بارلىعى 174 ۇسىنىس كەلىپ ءتۇستى, ونىڭ 150-دەن استامى ۆەدومستۆونىڭ 7 بۇيرىعىنا وزگەرىس ەنگىزۋگە, قالعانى ۇكىمەت قاۋلىلارىنا, 2 كودەكسكە جانە قولدانىستاعى 5 زاڭعا قاتىستى. ۇسىنىستاردىڭ كوبى ارنايى الەۋمەتتىك قىزمەتتەر كورسەتۋ ستاندارتتارىنىڭ وزگەرۋىنە بايلانىستى. مىسالى, ءمام قىزمەتتەرىن الۋشىلار ءۇشىن كيىم, اياقكيىم, توسەك-ورىن جانە جەكە گيگيەنا زاتتارىنىڭ ەڭ تومەنگى نورماسىن ارتتىرۋعا جانە قولدانۋ مەرزىمىن قىسقارتۋعا قاتىستى ۇسىنىستار بار. ارنايى الەۋمەتتىك قىزمەتكە جۇگىنگەن كەزدە ۇسىنىلاتىن قۇجاتتار ءتىزىمىن وڭتايلاندىرۋ, مەكەمەدەن شىعارۋ ەرەجەسىن قايتا قاراۋ, ءمام قىزمەتكەرلەرىنىڭ مىندەتتەرىن ناقتىلاۋ جونىندە باسقا دا ۇسىنىستار ءتۇستى. بۇل ۇسىنىستار مۇقيات قارالادى.
بۇگىنگى تاڭدا قازاقستاندا 12 مىڭعا جۋىق الەۋمەتتىك قىزمەتكەر جۇمىس ىستەيدى, ولاردىڭ 10 مىڭى ءمام اياسىندا قىزمەت كورسەتەدى. فورۋم بارىسىندا الەۋمەتتىك قىزمەتكەرلەردىڭ كاسىبي ادەبى جونىندەگى ادىستەمەلىك ۇسىنىستار تانىستىرىلدى. قۇجات قىزمەت الۋشىلارعا, الەۋمەتتىك قىزمەتكەرلەردىڭ مىنەز-قۇلقىنا قاتىستى 5 تاراۋدان تۇرادى. ۇسىنىستاردا الەۋمەتتىك قىزمەتكەرلەردىڭ ادەپ قاعيدالارى مەن نەگىزگى مىنەز-ق ۇلىق ستاندارتتارى كورسەتىلگەن. جاقىن ارادا بۇلار ءىس جۇزىندە ەنگىزىلەدى.
فورۋم بارىسىندا الەۋمەتتىك قىزمەتكەر مارتەبەسىن كوتەرۋ ماسەلەسى دە ايتىلدى.
«مەملەكەتتىك دەڭگەيدە ولاردىڭ قۇزىرەتى مەن ماڭىزىن ارتتىرۋ قاجەت. مىسالى, ەڭبەك كودەكسىنە جۇمىسكەرلەردىڭ جەكەلەگەن ساناتتارىنىڭ ەڭبەگىن رەتتەۋ تۋرالى ءبولىم ەنگىزۋگە بولادى. الەۋمەتتىك قىزمەتكەرگە ەڭبەك نارىعىندا مارتەبە مەن كەپىلدىك بەرىلۋى كەرەك. الەۋمەتتىك قىزمەتكەردى جانە ونىڭ وتباسى مۇشەلەرىن الەۋمەتتىك قامتاماسىز ەتۋ قاجەت. ءبىز ولاردى ءتيىستى الەۋمەتتىك قورعاۋ ارقىلى عانا ادەپ قاعيدالارىنىڭ ساقتالۋىن تالاپ ەتە الامىز», دەدى پرەزيدەنت جانىنداعى ايەلدەر ءىسى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى ءلاززات رامازانوۆا.
بۇعان دەيىن ءمام جۇمىسىن جاقسارتۋ ماقساتىندا وبلىستار مەن رەسپۋبليكالىق ماڭىزى بار قالالاردىڭ اكىمدىكتەرىنە 22 تارماقتان تۇراتىن شارالاردى قابىلداۋ ۇسىنىلدى. ونىڭ ىشىندە قوعامدىق كەڭەستەر قۇرۋ, اشىقتىق قاعيداتىن ەنگىزۋ, قىزمەت الۋشىلاردى عالامتورمەن قامتاماسىز ەتۋ, بارلىق مەكەمەنى بەينەباقىلاۋمەن قامتۋ, كامەرالارداعى جازبالارعا قىزمەت الۋشىلاردىڭ تۋىستارىنا قولجەتىمدىلىكتى قامتاماسىز ەتۋ, قاجەت بولعان جاعدايدا كۇردەلى جانە اعىمداعى جوندەۋ جۇمىستارىن جۇرگىزۋ, شالعاي اۋىلداردا ورنالاسقان مەكەمەلەردى قالالار مەن اۋدان ورتالىقتارىنا كوشىرۋ جانە مەكەمەلەر جۇمىسىن جاقسارتۋ جونىندەگى باسقا دا شارالار بار.
الەۋمەتتىك قىزمەتتەر ساياساتىن دامىتۋ دەپارتامەنتىنىڭ ديرەكتورى دامەجان سادۋاقاسوۆانىڭ ايتۋىنشا, ءمام جۇمىسىندا شاعىمداردى تالداۋ مەن كەرى بايلانىس ورناتۋعا ەرەكشە كوڭىل بولىنەدى.
«شاعىمدار مەن وتىنىشتەر نەگىزىندە, ونىڭ ىشىندە الەۋمەتتىك جەلىلەر بويىنشا تاۋەكەلدەر كارتاسىن جاساۋ كەرەك. تاۋەكەلدەر كارتاسى ولقىلىق انىقتالعان وڭىردە عانا ەمەس, الدىن الۋ ماقساتىندا باسقا وڭىرلەردە دە جاسالۋى قاجەت», دەدى دامەجان سادۋاقاسوۆا.
وتكەن كەزەڭ ىشىندە مەرزىمى اياقتالۋعا جاقىن ۇسىنىستاردى ورىنداۋدىڭ وڭ ءۇردىسىن كورۋگە بولادى. بۇل تۇستا ۇسىنىستاردىڭ ورىندالۋىنىڭ ەڭ جوعارى پايىزى اقمولا, اقتوبە, جامبىل, قوستاناي وبلىستارىندا جانە نۇر-سۇلتان قالاسىندا بايقالدى. ۇسىنىستاردى ىسكە اسىرۋ ناتيجەلەرى بويىنشا ارنايى الەۋمەتتىك قىزمەتتەر ۇسىناتىن 113 ورتالىقتىڭ 74-ءى wi-fi بار عالامتورمەن قامتاماسىز ەتىلگەن. بۇل مەكەمەلەردىڭ بارلىعىندا قوعامدىق كەڭەس قۇرىلدى, الەۋمەتتىك جەلىلەردە اككاۋنتتارى اشىلدى. 95 ءمام بيۋدجەتى اشىق تۇردە جاريالاندى. ءمام باسشىلىعى مەن قىزمەتكەرلەرى قامقورلىقتاعى جانداردىڭ جاقىندارىمەن تىعىز بايلانىس ورناتقان.
ء«بىزدىڭ مىندەتىمىز – اشىقتىقتى ارتتىرۋ, قىزمەت الۋشىلارمەن جۇمىس سيپاتىن وزگەرتۋ. بۇل ءۇشىن بيۋدجەت اشىقتىعىن قامتاماسىز ەتۋ, ءمام جاعدايىن ەگجەي-تەگجەيلى قاراۋ جانە ورتالىقتار ۇسىناتىن قىزمەتتەردىڭ ساپاسىن ارتتىرۋ ماسەلەلەرىن كوتەرۋ قاجەت. بارلىق ۇسىنىستىڭ ورىندالۋىن باقىلاۋ – قازىرگى كەزدە ەڭبەك, الەۋمەتتىك قورعاۋ جانە كوشى-قون كوميتەتى, سونداي-اق اۋماقتىق دەپارتامەنتتەر الدىندا تۇرعان باستى مىندەت», دەدى ە.اۋكەنوۆ.
قىزمەت الۋشىلاردىڭ ءومىر ءسۇرۋ ساپاسىن جاقسارتۋعا باعىتتالعان ۇسىنىستاردى ورىنداۋ بويىنشا جۇمىس جالعاسادى. ەسكە سالا كەتەيىك, بۇگىندە ەلىمىزدە ستاتسيونارلىق تيپتەگى 113 مەديتسينالىق-الەۋمەتتىك مەكەمە بار, وندا 21 مىڭنان استام قىزمەت الۋشى تۇرادى.
