وتىرىستى اشقان قحپ پارلامەنتتىك فراكتسياسىنىڭ جەتەكشىسى, زاڭناما جانە سوت-قۇقىقتىق رەفورما كوميتەتىنىڭ حاتشىسى, كونستيتۋتسيالىق رەفورما جونىندەگى كوميسسيانىڭ مۇشەسى ماگەررام ماگەرراموۆ مەملەكەت باسشىسىنىڭ باستامالارى ەلدى كەزەڭ-كەزەڭىمەن جاڭا كونستيتۋتسيا ازىرلەۋگە الىپ كەلگەنىن اتاپ ءوتتى. ونىڭ ايتۋىنشا, ۇسىنىلىپ وتىرعان جوبا مەملەكەتتىك باسقارۋ جۇيەسىنىڭ تۇبەگەيلى جاڭارۋىن كوزدەيدى.
«جوبا ەلىمىزدىڭ مەملەكەتتىك ساياساتىنىڭ جاڭا باعدارىن ايقىندايدى. ءبىر پالاتالى قۇرىلتاي قۇرىلادى, جاڭا جوعارى كونسۋلتاتيۆتىك ورگان – حالىق كەڭەسىنە ارنالعان جەكە ءبولىم ەنگىزىلەدى, سونداي-اق ۆيتسە-پرەزيدەنت ينستيتۋتى قالىپتاسادى. مۇنىڭ بارلىعى مەملەكەتتىك بيلىك ارحيتەكتۋراسىنىڭ مۇلدە جاڭا قۇرىلىمىن جاسايدى», دەدى دەپۋتات.
قازاقستان حالىق پارتياسى جاڭا كونستيتۋتسيا جوباسىن تولىق قولدايتىنىن ءبىلدىردى. سپيكەرلەر قۇجاتتىڭ ادامعا باعدارلانعان سيپاتىن ەرەكشە اتاپ ءوتتى. جوبا ءومىر ءسۇرۋ قۇقىعىن ابسوليۋتتەندىرۋدى, جەكە تۇلعاعا قول سۇعىلماۋشىلىعىن, تسيفرلىق جەكە دەرەكتەردىڭ قورعالۋىن, سونداي-اق ازاماتتاردىڭ ار-نامىسى مەن قادىر-قاسيەتىن جانە الەۋمەتتىك قۇقىقتارىن, سونىڭ ىشىندە ەڭبەك ەتۋ قۇقىعىن قورعاۋدى كۇشەيتۋدى كوزدەيدى.
الەۋمەتتىك زەرتتەۋ: قازاقستان حالقىنىڭ 85%-ى جاڭا كونستيتۋتسيا جوباسىن قولدادى
قحپ دەپۋتاتى يرينا سميرنوۆا پارتيا ۇستانىمىنىڭ وزەگىندە ادام تۇرعانىن ايتتى.
ء«بىزدىڭ پارتيا ەكونوميكا ادامعا قىزمەت ەتۋى كەرەك ەكەنىن ۇنەمى ايتىپ كەلەدى. ەڭبەك ادامى – بۇل رەسۋرس تا, بىرلىك تە ەمەس, ول – مەملەكەتتىڭ نەگىزى جانە كۇشى», دەدى ول.
كونستيتۋتسيا جوباسىنىڭ قۇقىقتىق مانىنە ادىلەت ۆيتسە-ءمينيسترى لاۋرا مەرساليموۆا توقتالدى. ونىڭ سوزىنشە, جاڭا رەداكتسيا ەل دامۋىنىڭ قازىرگى كەزەڭىن ناقتى بەينەلەيدى.
«ازاماتتاردىڭ قۇقىقتارى مەن مىندەتتەرىنە ارنالعان بولىمدە قۇقىق پەن بوستاندىقتى قورعاۋدىڭ ناقتى كەپىلدىكتەرىن كۇشەيتۋگە باسىمدىق بەرىلدى. بۇل رەتتە حالىقارالىق قۇجاتتاردىڭ تالاپتارى تولىق ەسكەرىلدى», دەدى ۆيتسە-مينيستر.
قازاقستاننىڭ ازاماتتىق اليانسى كونستيتۋتسيالىق رەفورمانى قولدادى
جيىن بارىسىندا سەنات دەپۋتاتى عالياسقار سارىباەۆ «جاڭا كونستيتۋتسيا – ەل دامۋىنىڭ جاڭا كەزەڭى, قوعام سۇرانىسى مەن ۋاقىت تالابى» تاقىرىبىندا بايانداما جاسادى. ءماجىلىس دەپۋتاتى مارات باشيموۆ اتا زاڭ جوباسىنىڭ قۇقىق قورعاۋ الەۋەتىن سارالادى. استانا حالىقارالىق ۋنيۆەرسيتەتى جوعارى قۇقىق مەكتەبىنىڭ پروفەسسورى يسيدور بورچاشۆيلي قۇجاتتىڭ ستراتەگيالىق باعىتتارىنا توقتالسا, زاڭناما جانە قۇقىقتىق اقپارات ينستيتۋتىنىڭ ديرەكتورى ينديرا اۋباكىروۆا جاڭا كونستيتۋتسيا شەڭبەرىندە قالىپتاساتىن نەگىزگى قاعيداتتار مەن جالپىۇلتتىق قۇندىلىقتاردى ىلگەرىلەتۋ ماسەلەسىن كوتەردى.
سونداي-اق وتىرىستا «اسسامبلەيا جاستارى» رەسپۋبليكالىق قوعامدىق بىرلەستىگىنىڭ توراعاسى تيمۋر جۇمىرباەۆ, «استانا زاڭگەرلەر ليگاسى» زاڭ كونسۋلتانتتارى پالاتاسىنىڭ ءتورايىمى اينۇر اباتوۆا جانە پرەزيدەنت ءىس باسقارماسى جانىنداعى پارلامەنتاريزم ينستيتۋتى جەكە زاڭناما ورتالىعىنىڭ باسشىسى يۋليا كوستيانايا پىكىر ءبىلدىردى.
جيىندى قورىتىندىلاعان ماگەررام ماگەرراموۆ كونستيتۋتسيا جوباسىنا قوعامنىڭ بەلسەندى قاتىسقانىن اتاپ ءوتتى.
«كونستيتۋتسياعا قاتىستى پىكىر بىلدىرمەگەن, بەي-جاي قالعان بىردە-ءبىر ادام جوق. ۇسىنىلىپ وتىرعان جوبادا اتا زاڭنىڭ ءارپى مەن رۋحىنىڭ تەپە-تەڭدىگى قازىرگى كەزەڭنىڭ شىنايى سۇرانىسىنا ساي ساقتالعان», دەدى ول.
«ادىلەتتى قازاقستان» قاعيداتتارىنا نەگىزدەلگەن جاڭا كونستيتۋتسيا جوباسى بويىنشا جۇمىس الداعى ۋاقىتتا دا جالعاسادى.
