فوتو: Lada.kz
Lada.kz -ءتىڭ جازۋىنشا ءورت 6 اقپان كۇنى تاڭەرتەڭ 29ا شاعىناۋدانىندا ورنالاسقان تەحنيكالىق قىزمەت كورسەتۋ ورتالىعىندا بولعان. ءورت ءسوندىرۋ بولىمشەسىنە دەيىنگى قاشىقتىق شامامەن 4 شاقىرىمدى قۇرايدى.
ءورت كەزىندە ەكى گاراج بوكسى تولىعىمەن ورتكە ورانعان. ەكى ادام تەرميالىق كۇيىك الىپ, وبلىستىق اۋرۋحاناعا جەتكىزىلدى. عيمارات ىشىندە ءۇش اۆتوكولىك زاقىمدانعان: Mercedes-Benz كولىگىنىڭ قوزعالتقىش بولىگى مەن سالونى جانىپ كەتكەن, سونداي-اق Mercedes-Benz GL 460 پەن Toyota Alphard تولىقتاي ورتەنگەن. بۇدان بولەك, سىرتتا تۇرعان Mazda 626 جانە Toyota Corolla اۆتوكولىكتەرى دە زاقىمداندى.
ءورتتىڭ جالپى اۋماعى 150 شارشى مەتردى قۇرادى, ال تەحنيكالىق قىزمەت كورسەتۋ ورتالىعى عيماراتىنىڭ جالپى اۋدانى – 600 شارشى مەتر.
زارداپ شەككەندەردىڭ ءبىرى – 1993 جىلى تۋعان, وزبەكستان ازاماتى. وعان باسى, بەتى, تىنىس الۋ جولدارى, موينى, ەكى قولى مەن اياعى, كەۋدە تۇسى, ءىشى جانە ارقاسى كۇيگەن دەگەن دياگنوز قويىلعان. دەنە بەتىنىڭ زاقىمدانۋ كولەمى شامامەن 90 پايىزدى قۇرايدى.
ەكىنشى زارداپ شەككەن ادام دا ورتالىق قىزمەتكەرى. ونىڭ باس تەرىسى, بەتىنىڭ ەكى جاعى, ەكى قۇلاعى, كەۋدەسىنىڭ سول جاق بولىگى, ەكى قولى, ەكى سانىنىڭ الدىڭعى-ورتاڭعى بولىگى جانە ەكى تابانى جالىننان كۇيگەن. زاقىمدانۋ كولەمى 25-30 پايىز, كۇيىك دارەجەسى – II–III اب. سونىمەن قاتار جوعارعى تىنىس الۋ جولدارىنىڭ ينگالياتسيالىق تەرميالىق كۇيىگى انىقتالعان.
ەكى ناۋقاستىڭ دا جاعدايى اۋىر دەپ باعالانىپ وتىر. ولار ەمحاناعا جاتقىزىلىپ, وكپەنى جاساندى جەلدەتۋ اپپاراتىنا قوسىلعان.
ءورت 09:21-دە وقشاۋلانىپ, 10:43-تە تولىقتاي ءسوندىرىلدى. ءورتتىڭ شىعۋ سەبەبى انىقتالىپ جاتىر.
ءورتتى سوندىرۋگە 23 تج قىزمەتكەرى مەن 4 تەحنيكا بىرلىگى, پوليتسيا دەپارتامەنتىنەن 8 قىزمەتكەر مەن 4 تەحنيكا, سونداي-اق اپاتتار مەديتسيناسى ورتالىعىنان 4 قىزمەتكەر مەن 1 تەحنيكا تارتىلدى.
