ەلباسىنىڭ جەكە ءارحيۆى, كىتاپحاناسى مەن مۋزەيىنىڭ قور ماتەريالدارىنان جاساقتالعان كورمە فيلوسوفيا, ادەبيەت, پوەزيا, مۋزىكا سالالارىمەن ۇشتاسقان كەمەڭگەردىڭ مۇراسىنان سىر شەرتتى.
كورمەگە قويىلعان ەلباسى ن.ءا.نازارباەۆتىڭ حالىق الدىندا ۇلى اقىن جايلى سويلەگەن سوزدەرىنە قاراپ-اق قازاق حالقىنىڭ تاريحي ساناسى مەن مادەني مۇراسىن جاڭعىرتۋداعى ماڭىزدىلىعىن اڭعارۋعا بولادى. تۇڭعىش پرەزيدەنتتىڭ ءار بايانداماسى ۇلكەن ويشىلدىڭ شىعارماشىلىعىنا تالداۋ جاسايتىندىقتان, عىلىمي زەرتتەۋگە تاتىرى انىق.
مىسالى, 1995 جىلعى 9 تامىزدا اباي قۇنانباي ۇلىنىڭ 150 جىلدىعىنا وراي الماتىدا وتكەن سالتاناتتى جيىندا ەلباسى بىلاي دەگەن ەدى: «ابايدىڭ تەرەڭ ويى مەن پىكىرى تەك ايتا جۇرەر اڭگىمە بولماي, كۇنبە-كۇنگى تىرلىگىمىزگە ءبىر كىرپىش بولىپ قالانىپ جاتاتىن ناقتى ىسكە اينالسا, تىپتەن قۇبا-قۇپ. ول ۇيرەتكەن تاعىلىم مەن ول كوكسەگەن مۇراتتاردى شىن قاستەرلەي بىلگەنىمىزدىڭ, ادىلەت پەن ابزالدىق ۇستازى الدىنداعى پەرزەنتتىك قارىزىمىزدى تەرەڭ ءتۇسىنىپ, وتەي العاندىعىمىزدىڭ بىردەن-ءبىر بەلگىسى دە وسى...». بۇگىنگى ۇرپاق ابايدى ادامزاتقا ورتاق قۇندىلىقتاردىڭ تۇتقاسى دەپ قابىلدايدى. ولاردىڭ تۇسىنىگىندەگى اباي – قىرعيقاباقتان ازات بەيبىتشىل ۇستانىمداردىڭ ۇلگىسى, ەلباسى باستامالارىنىڭ نەگىزىنە الىنعان ابىرويدىڭ تۇعىرى. قوعامنىڭ رۋحاني تىرەگىنە اينالعان ويشىلدىڭ مۇراسى قۇندىلىقتار ساباقتاستىعىن ساقتاپ قالا بەرمەك.
