ونلاين وتىرىستى اشقان اقپارات جانە قوعامدىق دامۋ ءمينيسترى ايدا بالاەۆا حالىقتىڭ دەنساۋلىعى قورشاعان ورتانىڭ تازالىعىمەن تىكەلەي بايلانىستى ەكەنىن اتاپ ءوتتى.
«ادام بويىنداعى ءتۇرلى اۋرۋلاردىڭ قورشاعان ورتاداعى كەلەڭسىز وزگەرىستەرگە تىكەلەي نەمەسە جاناما تۇردە بايلانىستى ەكەنى انىقتالعان. الايدا وسى جاعدايعا, حالىق دەنساۋلىعىنىڭ ناشارلانۋىنا ەكولوگيالىق فاكتورلاردىڭ سەبەپ بولاتىنى ازىرگە ەلىمىزدە جەتكىلىكتى دەڭگەيدە ەسكەرىلمەي كەلەدى. ەكولوگيالىق ساۋاتسىزدىقتى جويۋ حالىق اراسىندا جۇرگىزىلەتىن ماڭىزدى ماسەلەگە اينالۋى ءتيىس. تابيعات پەن قورشاعان ورتانى قورعاۋ ماسەلەسى جالپىحالىقتىق ەكولوگيالىق ساۋات اشۋ, جاستارعا ۇزدىكسىز ءبىلىم بەرۋ ناتيجەسىندە عانا شەشىلەدى», دەدى ۆەدومستۆو باسشىسى.
جيىندا ءسوز العان ەكو بەلسەندى ارمان حايرۋلين كەلەسى جىلدى ەكولوگيا جىلى دەپ جاريالاۋدى ۇسىندى. ونىڭ ويىنشا, سوڭعى 20 جىل ىشىندە ەكولوگيا جىلى جاريالانباعان. ء«بىز كورشىمىز وزبەكستاننان حالىقتىڭ ءوسىمى بويىنشا بىرنەشە ەسەگە ارتتا قالىپ كەلە جاتىرمىز. بۇل پروبلەما شىن مانىندە ءدال وسى ەكولوگيالىق جاعدايدان تۋىپ وتىر. ءبىز اشارشىلىقتى گەنوتسيد دەپ تانىساق, قازىر سول ناۋبەتپەن پارا-پار ەكوتسيد جاعدايىندا تۇرمىز. سوندىقتان ناقتى ىسكە كىرىسەتىن كەز كەلدى. ەگەر ەكولوگيا ماسەلەلەرىمەن اينالىساتىن ارنايى مينيسترلىكتى قۇرعان پرەزيدەنتىمىز ق.توقاەۆ كەلەسى جىلدى ەكولوگيا جىلى دەپ جاريالاسا, ءبىراز نەگىزگى تۇيتكىلدەردىڭ ءتۇيىنى تارقاتىلار ەدى», دەدى.
مەملەكەت باسشىسى ق.توقاەۆتىڭ تاپسىرماسىمەن ءبىلىم جانە عىلىم مينيسترلىگىندە ارنايى قۇرىلعان جۇمىس توبى ەكولوگيا ءپانىن مەكتەپ باعدارلاماسىنا ەنگىزۋ بويىنشا جۇمىستى باستادى. بىراق ECO Network جوباسىنىڭ نەگىزىن قالاۋشى ەۆگەني مۇحامەدجانوۆ ەكولوگيالىق ءبىلىم ماسەلەنى تولىعىمەن شەشپەيتىنىن جەتكىزدى. «ەكولوگيانى قورعاۋعا باعىتتالعان جۇمىستاردى جۇرگىزۋگە مەملەكەتتەن قارجى ءبولۋدى قويۋ كەرەك. ونىڭ ەشقانداي ناتيجە بەرمەيتىنىن, جاي عانا ۇكىمەت قارجىسىن جەلگە ۇشىراتىنىن تاجىريبەدەن انىق كوردىك. نەگىزى, ەكولوگيانى قورعاۋ ءار ادامنىڭ وزىنەن باستالۋى كەرەك. مەن, مىسالى, ءوزىمنىڭ جەكە كولىگىمدى تاستادىم. قازىر قوعامدىق كولىكپەن جۇرەمىن», دەدى ول.
وسىعان قاراماستان كەيىنگى ۇرپاققا ەكولوگيالىق ءبىلىم بەرۋ قاشان دا, قاي ەلدە دە وزەكتى بولىپ وتىر. سونىڭ ءبىر دالەلى بولار, دوڭگەلەك ۇستەلگە رەسەيدەن قاتىسقان تانىمال ەكوبلوگەر رومان سابلين ونلاين-مەكتەپتەردىڭ جۇمىسى ناتيجە بەرەتىنىن, سونداي-اق وسى تاجىريبەنى قازاقستانعا دا ەنگىزۋگە بولاتىنىن ايتتى. قازىر ەكولوگيالىق ءبىلىم بەرەتىن رەسەيلىك ونلاين-مەكتەپتەردە قازاقستاندىق وقۋشىلار دا وقيدى ەكەن.
