– ءيسى مۇسىلماننىڭ ەڭ قادىرلى مەرەكەسىنىڭ ءبىرى – قاسيەتتى قۇربان ايت تاياپ قالدى. قازىرگىدەي جاعدايدا وسى مەرەكەنى اتاپ ءوتۋدىڭ قانداي جولىن ۇسىناسىزدار؟
اسا قامقور, ەرەكشە مەيىرىمدى اللانىڭ اتىمەن باستايمىن. بيىل ەلىمىزدە قۇربان ايت مەرەكەسى 31 شىلدە مەن 2 تامىز ارالىعىندا وتەدى. قازاقستان مۇسىلماندارى ءدىني باسقارماسىنىڭ عۇلامالار كەڭەسى ورتالىق ازيا عالىمدارىمەن كەڭەسىپ, وسىنداي ورتاق ءپاتۋا قابىلدادى. ەلدەگى پاندەميا جاعدايىنا بايلانىستى ايت نامازى وقىلمايدى.
قۇربان ايت كۇنى مۇسىلمان بالاسى ادال نيەتپەن قۇربان شالىپ, قايىرىمدىلىق جاسايدى. ءبىز ەلدەگى پاندەمياعا بايلانىستى تۇڭعىش رەت ونلاين قۇربان شالۋ جوباسىن قولعا الدىق. وسى باعىتتا qurban2020.muftyat.kz سايتىن ىسكە قوستىق. بۇل – دەلدالدىق قىزمەت ەمەس, قايىرىمدىلىق باعىتتاعى شارا. ىندەت تاراۋىنىڭ الدىن الىپ, حالىقتىڭ دەنساۋلىعى مەن ومىرىنە قاۋىپ تۋدىرماۋ ماقساتىندا بيىل قۇرباندىق ەتىنىڭ ۇشتەن ءبىر بولىگى قۇرباندىق شالۋشى ادامعا بەرىلمەيدى, تۇگەلدەي مۇقتاج ازاماتتارعا تاراتىلادى. بۇل شەشىمگە تۇسىنىستىك تانىتىپ, دۇرىس قاراۋعا شاقىرامىن.
ونلاين رەجىمدە تاپسىرىس قابىلداپ, قۇرباندىق ەتىن كومەككە ءزارۋ جاندارعا تاراتۋ تاجىريبەسى تۇركيا, مالايزيا, يندونەزيا, بىرىككەن اراب امىرلىكتەرى سياقتى بىرقاتار مۇسىلمان مەملەكەتتەرىندە بۇرىننان قالىپتاسقان جانە جىل سايىنعى يگى داستۇرگە اينالعان. وسى تاجىريبەنى ەنگىزۋدەگى ماقساتىمىز – جۇرتشىلىقتى ىندەتتەن ساقتاۋ.
ەسكەرەتىن جايت, قۇرباندىق شالۋ ءراسىمىن قمدب-نىڭ ايماقتاعى وكىلدىگى جەرگىلىكتى اكىمدىكپەن كەلىسىپ, ايت كۇندەرى بەلگىلەنگەن ورىنداردا سانيتارلىق تالاپتاردى ساقتاي وتىرىپ جۇزەگە اسىرادى.
ايت كەزىندە تۋىسقاندارعا, دوس-جاراندارعا بارۋدان ءوزىمىزدى شەكتەيىك. بۇل ماسەلەدە جاۋاپكەرشىلىكتى ءار ادام وزىنەن باستاۋى كەرەك. جاعداي تۇراقتالمايىنشا, قۇربان ايتتىڭ ءۇش كۇنىندە ۇيگە قوناق شاقىرماي, كەلەتىن كىسىگە ىندەت جاعدايىن الدىن الا ەسكەرتىپ, ماسەلەنى ءوزىمىز رەتتەپ وتىرۋىمىز قاجەت. وسىلايشا اۋەلى ءوزىمىزدى قورعايىق, سول ارقىلى وتباسىمىزعا قورعان بولايىق. بۇل جاۋاپكەرشىلىك بارلىق ادامعا قاتىستى دەپ سانايمىز.
ايتتا تۋىسقانداردى تەلەفون ارقىلى قۇتتىقتاپ, مۇمكىندىك بولىپ جاتسا ايتتىق سىيلىعىن جىبەرسە نۇر ۇستىنە نۇر بولادى. مەيرامدى تويلاۋدىڭ, تۋعان-تۋىستاردى قۋانىشقا بولەۋدىڭ وسى فورماتىنا اۋىسقانىمىز ابزال.
قازىر تويلاۋدىڭ ەمەس, دەنساۋلىق پەن ءوز ءومىرىمىزدى ويلاۋدىڭ كەزەڭى. كىشكەنە سابىر ەتەيىك. اللا قالاسا, 2 تامىزدان كەيىن مەشىتتەرىمىز دە اشىلادى دەگەن ۇمىتتەمىز. ماماندار قاۋىپتى ىندەتتىڭ بەتى قايتا باستاعانىن ايتۋدا. اللا قالاسا, ءبارى جاقسى بولادى. جاقسى كۇندەر الدىمىزدا. ءپاتۋالارىمىز بەن ۇندەۋلەرىمىزگە تۇسىنىستىكپەن قاراپ, سوعان بويسۇنايىق. ءوزىمىز بەن وزگەلەردىڭ ءومىرى مەن دەنساۋلىعىنا جاۋاپكەرشىلىكپەن قارايىق. سوندا عانا ءبىز بۇل سىناقتان امان-ەسەن وتەمىز.
– وكىنىشكە قاراي, جۇقپالى ىندەتتى جۇقتىرۋ وشاقتارىنىڭ ءبىرى قارالى جيىندار بولىپ وتىرعانى بەلگىلى. جانازاعا قاتىسۋ مۇسىلمان ءۇشىن قانشا جەردەن ساۋاپتى ءىس دەسەك تە, قازىرگى جاعدايدا ونى مەيىلىنشە از اداممەن وتكەرۋ قاجەتتىگى تۋىنداۋدا. وسىعان بايلانىستى قانداي شەشىم قابىلداندى؟
الەمگە قاۋىپ توندىرگەن دەرتكە نەمقۇرايدىلىق تانىتۋ – ءوزىمىز ءۇشىن عانا ەمەس, اينالامىزداعى جانداردىڭ ومىرىنە دە تەرىس اسەرىن تيگىزەرى حاق. ەلىمىزدەگى كارانتين تالاپتارىن ساقتاپ, ىندەت تارالۋىنىڭ الدىن الۋ ماقساتىندا قازاقستان مۇسىلماندارى ءدىني باسقارماسى جانازا نامازى مەن جەرلەۋ ءراسىمىن وتكىزۋگە قاتىستى ارنايى مالىمدەمە جاسادى. وسى مالىمدەمەدە ءمايىتتى جۋ, كەبىندەۋ, جانازا نامازىن وقۋ كەزىندە سانيتارلىق-ەپيدەميالىق تالاپتاردى قاتاڭ ساقتاۋ مىندەتى ايتىلدى. سونىمەن قاتار جانازا نامازىن 5 مينۋت ىشىندە وقۋعا, ءمايىتتى جەرلەگەن سوڭ حالىقتى كوپ ۇستاماي لەزدە قايتارۋعا پارمەن بەردىك. جانازا نامازىنا جانە قابىر باسىندا بارلىق قاتىسۋشىلاردى قوسقاندا 10 كىسىدەن ارتىق جينالماۋعا ۇندەدىك. حالىقتى جيناپ قوناق اسىن وتكىزۋدى, جەرلەۋ راسىمىنەن كەيىن اس بەرۋدى, جەتىسى, قىرقى, جىلى ت.ب. قۇدايى استاردى ەلىمىزدە ەپيدەميالىق جاعداي تولىق تۇراقتالعانعا دەيىن توقتاتۋعا شاقىردىق. يمامدار وسى باعىتتا ءتۇسىندىرۋ جۇمىستارىن جۇرگىزۋدە.
الايدا كەيبىر ازاماتتارىمىز بۇل ۇسىنىستارىمىز بەن كەڭەستەرىمىزگە نەمقۇرايدى قاراپ, وزىمەن قوسا وزگەلەردىڭ دە ومىرىنە قاۋىپ توندىرۋدە. ارينە ءبارىمىز دە توپىراقتى ولىمدە توبە كورسەتكىمىز كەلەدى. بىراق قازىر سەزىمگە بەرىلمەي, اقىلعا سالىپ شەشىم قابىلدايتىن ءسات. وسىنى جاماعات ءتۇسىنۋى ءتيىس. اللا تاعالا: «وزدەرىڭدى ءوز قولدارىڭمەن قاۋىپ-قاتەرگە سالماڭدار», دەپ ەسكەرتكەن («باقارا» سۇرەسى, 195-ايات). ارداقتى پايعامبارىمىز (وعان اللانىڭ سالاۋاتى مەن سالەمى بولسىن): «وزگەگە جانە وزىنە زيان تيگىزۋگە بولمايدى», دەگەن. جيىندار مەن قۇدايى استارعا بارۋدان بۇرىن ءوزىمىزدىڭ, وتباسىمىزدىڭ, تۋعان-تۋىسىمىزدىڭ ءومىرى مەن بولاشاعىن ءبىر ءسات ويلاساق. مۇسىلمان عالىمدارى: «زالالدى جويۋ پايدا كەلتىرۋدەن بۇرىن تۇرادى» دەگەن. قازىرگىدەي جۇقپالى اۋرۋدىڭ قاۋپى كۇشەيگەن كەزدە ودان ساقتانۋ – ءاربىرىمىز ءۇشىن مىندەت.
– «اباي جولى» ەپوپەياسىندا حاكىم ابايدىڭ سەمەيدى جايلاعان ىندەتپەن كۇرەسكەنى, سارموللا ەسىمدى مولداعا حالىق جۇقپالى اۋرۋدان ساقتانۋ ءۇشىن جانازا, حاتىم, استاردى از اداممەن وتكىزۋدى جۇرتقا ءتۇسىندىرۋ كەرەگىن ايتقانى باياندالادى. سودان سارموللا جەدەل ىسكە كىرىسىپ, جانازاعا حالىق از جينالسىن, ءمايىت شىققان ۇيگە كوپ ادام كەلىپ-كەتۋ بولماسىن, ول ۇيدە اس ءىشۋ, جەتىسىن, قىرقىن جاساۋ ۋاقىتشا توقتاتىلسىن دەگەن مازمۇندا ءپاتۋا شىعارادى. وسىدان كەيىن تۇرعىنداردىڭ قارالى جيىنعا كوپتەپ بارۋى بارىنشا شەكتەلگەن ەكەن. حالىق يمامداردىڭ سوزىنە قۇلاق اسىپ جاتىر ما؟
– ءمۇفتيات ءدىني بىرلەستىك بولعاندىقتان, ءبىزدىڭ ءپاتۋالارىمىز بەن شەشىمدەرىمىز ۇسىنىس, كەڭەس رەتىندە ايتىلادى. الايدا, پاتۋاعا بويسۇنۋ – مۇسىلماننىڭ مىندەتى. حالىقتى تاعى دا پاتۋاعا بويسۇنىپ, سانيتارلىق تالاپتاردى قاتاڭ ساقتاۋعا شاقىرامىن. دەنساۋلىققا سالعىرتتىق تانىتۋ قاۋىپ پەن قاتەرگە اكەپ سوعادى. سوندىقتان ەلدەگى بارشا جاماعاتتى وسى ءبىر قيىن كەزەڭدە بارىنشا ساقتانۋدى, جيىن-تويلار مەن قۇدايى استارعا مۇمكىندىگىنشە بارماۋدى سۇرايمىز.
ءوزىڭىز ايتىپ كەتكەندەي, اباي قۇنانباي ۇلى سەمەيگە كەلگەن ءبىر ساپارىندا شاھاردا جۇقپالى ىندەتتىڭ تاراپ جاتقانى جايىندا جايسىز حابار ەستيدى. ءبىرىنشى كەزەكتە, اباي جانازا راسىمدەرىن وتكىزۋگە قاتىستى بىرقاتار وزگەرىس جاساۋ قاجەتتىلىگىن حالىققا ءتۇسىندىرۋ كەرەگىن ۇقتى. مىنە, وسى تۇستا ول ءوزى بىلەتىن سارموللا ەسىمدى مولدانى شاقىرىپ, وعان حالىق جۇقپالى اۋرۋدان ساقتانۋ ءۇشىن جانازا, حاتىم, استاردى از اداممەن وتكىزۋدى جۇرتقا ءتۇسىندىرۋ كەرەگىن جەتكىزەدى. سارموللا: «قازا بولعان ادام ۇيىنە, جانازاعا حالىق از جينالسىن. ءمايىت شىققان ۇيگە كوپ ادام كەلمەسىن. ول ۇيدە اس ءىشۋ, حالىققا تاعام تاراتۋ, جەتىسىن, قىرقىن جاساۋ ۋاقىتشا توقتالسىن!» دەگەن ءسوزىن جەتكىزەدى.
بۇگىندە يمامدارىمىز وسى مازمۇندا وزدەرىنىڭ ناسيحاتى مەن كەڭەستەرىن جەتكىزىپ-اق جاتىر. الايدا سەزىممەن, نامىسپەن قارالى جيىنعا بارىپ قوياتىندار بار. سونىڭ سالدارىنان توسەك تارتىپ, اۋىرىپ قالعان جانداردى دا جاقسى بىلەمىز. وسى رەتتە ءۇي يەسىنە ارتىلاتىن جاۋاپكەرشىلىك تە ۇلكەن. قازالى ءۇيدىڭ يەسى تۋىسقاندارىنا: «ەلدەگى جاعداي تۇراقتالعانشا كوڭىل ايتىپ كەلمەڭىزدەر. جاعدايدى جاقسى تۇسىنەمىن. سانيتارلىق تالاپتى ءبارىمىز ورىنداۋىمىز كەرەك. ولگەننىڭ ارتىنان ولمەك جوق» دەپ ءوتىنىش بىلدىرسە, قانشاما ادامعا ساۋاپ جاساعان بولادى.
باسىندا بۇل ىندەتتىڭ قاۋىپتىلىگىن سەزىنبەدىك. تانىس-ءبىلىس ادامداردىڭ قايتىس بولىپ جاتقانى تۋرالى قارالى حابارلار تولاسسىز كەلىپ جاتتى. وسى جاعدايلار ساقتانباۋدىڭ سالدارىنان بولعانى ايتپاسا دا تۇسىنىكتى. بۇل – ويلاناتىن جايت. سوندىقتان ساقتانايىق دەگەن ءسوزدى ايتۋدى, وعان امال ەتۋدى توقتاتپايىق. اللا تاعالا ساقتانعان پەندەسىن ساقتايدى. وسىنى ۇمىتپايىق.
اسىل دىنىمىزدە كەرەك ۋاقىتتا قاجەت كومەكتى جاساۋ ۇلكەن ساۋاپتى امالدىڭ بىرىنە جاتادى. وسى رەتتە كاسىپكەر ازاماتتاردى ءدارى-دارمەكتەردىڭ باعاسىن قىمباتتاتپاي, جۇرتقا جاقسىلىق جاساپ, حالىقتىڭ العىسىن الۋعا شاقىرامىن. جەرلەۋ راسىمدەرىنە قاتىستى قىزمەت باعاسىن دا قولدان شارىقتاتپايىق. اسىرەسە زيرات باسىنداعى جەردىڭ قۇنىن اسپانداتىپ جىبەرمەيىك. سىندارلى ساتتە حالىقتىڭ جاعدايىن ەسكەرگەنىمىز ابزال. ار مەن ۇياتتى ەستەن شىعارمايىق, اعايىن!
– ەلىمىزدەگى احۋالدى جەڭىلدەتۋدىڭ ەڭ ءتيىمدى شەشىمدەرىنىڭ ءبىرى, ءتىپتى بىرەگەيى – حالىقتىڭ ءوز دەنساۋلىعىنا جاۋاپكەرشىلىكپەن قاراپ, كارانتين تالاپتارىن مۇلتىكسىز ورىنداۋى. ءدىني باسقارما وسى ماسەلەنى ەل ىشىنە ءتۇسىندىرۋ ىسىندە قانداي جۇمىستار اتقارىپ جاتىر؟
دەنساۋلىق – اللانىڭ بەرگەن اماناتى. ونى ساقتاۋ – مۇسىلماننىڭ مىندەتى. پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن) ءبىر حاديسىندە: «ادام ەكى نارسەنىڭ قادىرىن بىلمەيدى. ول – بوس ۋاقىت پەن دەنساۋلىق», دەگەن. راسىندا, دەنساۋلىق پەن ۋاقىت – ادام ومىرىندەگى ەڭ قاجەتتى ۇلى نىعمەت. وسى نىعمەت پەن اماناتقا قيانات جاساعان ادامنىڭ ارەكەتى – ءوزىنىڭ ومىرىنە قيانات جاساعانمەن تەڭ. بۇل ماسەلەدە ادام ءوز وزىنە ادىلەتتى بولۋى ءتيىس.
ەلىمىزدە توتەنشە جاعداي جاريالانعان ساتتەن باستاپ, ونلاين دارىستەر مەن ۋاعىز-ناسيحات جۇمىستارىنىڭ كەستەسى بەكىتىلدى. يمامدارىمىز بەن عالىمدارىمىز ينتەرنەتتىڭ يگىلىگىمەن كۇنىنە 3 رەت تىكەلەي ەفيردە ۋاعىز ايتىپ, حالىقتىڭ سۇراقتارىنا جاۋاپ بەرۋدە, ءتۇسىندىرۋ جۇمىستارىن بەلسەندى تۇردە جۇرگىزۋدە.
كارانتين كەزىندە ۋاعىز-ناسيحات جۇمىستارى جاڭا جۇيەمەن جۇرگىزىلدى. بۇگىندە تارالىمى 30 000 دانادان اساتىن قمدب-نىڭ «مۇنارا» ءدىني-تانىمدىق گازەتى, «HikmetTV» تەلە-راديو ستۋدياسى, رەسپۋبليكالىق جانە ايماقتىق 22 سايت, تاۋلىك بويى ەكى تىلدە قىزمەت كورسەتەتىن رەسپۋبليكالىق Call-ورتالىق ارقىلى حالىق اراسىندا ءتۇسىندىرۋ جۇمىستارىن جۇرگىزدىك. ارنايى «Qalam-tor» جوباسىن ىسكە قوستىق. وسى جوبا اياسىندا www.muftyat.kz پەن «HikmetTV» ستۋدياسىنىڭ كونتەنت-ونىمدەرىن الەۋمەتتىك جەلىلەردە كەڭىنەن ناسيحاتتاۋ ماقساتىندا اقپاراتتىق-پۋل قۇردىق. اتالعان اقپاراتتىق-پۋل قۇرامىنداعى 1010 يمام ءبىر مەزەتتە ءبىر ماقساتتا جۇمىس ىستەۋدە.
قاسيەتتى رامازان ايىندا قمدب قىزمەتكەرلەرى مەن عۇلامالار كەڭەسىنىڭ مۇشەلەرى «Qazaqstan» ۇلتتىق تەلەارناسى ارقىلى تىكەلەي ەفيردە «ورازا قابىل بولسىن» باعدارلاماسىندا 30 كۇنگە 30 سۇحبات بەردى. ەلىمىزدە كارانتين جاريالانعان ساتتەن باستاپ ءار جۇما كۇنى «سىن ساعاتىنداعى سابىر», ء«ار ءىستىڭ ءبىر قايىرى بار», «جاڭا كۇننەن جاقسىلىق كۇتەيىك», ت.ب. تاقىرىپتاردا «اسىل ارنا» تەلەارناسى ارقىلى 17 رەت «جۇما ناسيحاتىن» جۇرگىزدىم.
پاندەميا كەزىندە تاريحي ءدىني شەشىمدەر شىعارىپ, جاماعاتتىڭ سالاماتتىلىعى مەن قۇلشىلىعىنا قاجەتتى 12 ماڭىزدى قۇجات قابىلدادىق. اتالعان قۇجاتتار ىشىنەن «قمدب-نىڭ قاۋىپتى جۇقپالى ىندەتتەن قايتىس بولعان ادامنىڭ ءمايىتىن جەرلەۋگە قاتىستى ءپاتۋاسىن» ايتۋعا بولادى. تمد ەلدەرى اراسىندا ءبىز ءبىرىنشى بولىپ وسىنداي قۇجات ازىرلەدىك. حالىقتى قاۋىپتى ىندەت كەزىندە جانازا نامازىنا قاتىسپاۋعا ۇندەپ, قۇدايى استاردى كەيىنگە شەگەرۋگە شاقىردىق.
سونىمەن قاتار مۇسىلمان الەمىنىڭ بەلدى ءدىني تۇلعالارى مەن ۇستازدارىن, بارشا جاماعاتتى ءبىر مەزەتتە دۇعا ەتۋگە ۇندەدىك. اللاعا شۇكىر, بۇل باستامامىز الەمدىك ءدىن ليدەرلەرى تاراپىنان قولداۋ تاپتى.
– ءدىن قىزمەتكەرلەرى ناۋقاس جاندارعا قولدان كەلگەن كومەكتى كورسەتىپ جاتىر ەكەن. قايىرىمدىلىق جاساۋ قاجەتتىلىكتەن تۋا ما, الدە جۇمىس باعىتتارىڭىزدىڭ ءبىرى مە؟
ءبىزدىڭ تاريحىمىزدا ادامگەرشىلىك پەن قايىرىمدىلىق ىستەردىڭ العى شەبىندە دە ءدىن قايراتكەرلەرى جۇرگەن. اللاعا شۇكىر, بۇگىندە وسى ءداستۇر جالعاسىن تاۋىپ كەلەدى. ويتكەنى ءبىز ەل باسىنا كۇن تۋعاندا اسارلاتىپ, جىلۋ جيناپ, قايىرىمدىلىق ىسىندە شەت قالماعان حالىقپىز.
قازاقستان مۇسىلماندارى ءدىني باسقارماسىنىڭ «زەكەت» قورى جاماعات پەن دەمەۋشى ازاماتتاردىڭ كومەگىمەن 255 وتتەگى جەلدەتكىشىن جەر-جەردەگى ەمحانالارعا جەتكىزدى. يمامدارىمىز 2 توننادان استام قىمىزدى ناۋقاستارعا تەگىن تاراتتى. قمدب ۇجىمى ىندەتكە قارسى كۇرەس شارالارىنا ءبىر كۇندىك جالاقىسىن اۋداردى. سايىپ كەلگەندە, بۇل يگى شارالار از دا بولسا حالىقتى قولداۋ نيەتىمەن جۇزەگە اسۋدا.
– بۇگىندە ىندەتكە قاتىستى سىرتقى جانە ىشكى احۋالدى ءبىلىپ وتىرعان حالقىمىز كۇيزەلىس ۇستىندە. وسىندايدا مۇسىلمان بالاسى ءوزىن قالاي ۇستاۋ كەرەك, قانداي جەتەلى ويدىڭ جەتەگىنە ىلەسۋى ءتيىس؟
– ءبىز سان عاسىرلىق تاريحىمىزدا تالاي سىندارلى ساتتەر مەن سىناقتاردى, زوبالاڭ زاماندار مەن ناۋبەتتەردى باستان كەشكەن ەلمىز. سىن ساعاتتاردا ءبىر-بىرىمىزگە قامقورلىق كورسەتىپ, يمانىمىز بەن باۋىرمالدىعىمىزدىڭ ارقاسىندا امان قالعان رۋحى بيىك جورالى جۇرتپىز.
ەل باسىنا كۇن تۋعان قازىرگى ساتتە دە وسى قالپىمىزدان تانباي, قابىرعامىزدى قايىستىرماي, ۇمىتسىزدىككە بوي الدىرماي, العا جىلجۋىمىز كەرەك. بۇگىندە ۇرەي قۇشاعىنا ەنىپ, ەلەڭ-الاڭ كۇي كەشكەن ادام ءۇشىن جىلى ءسوزدىڭ ءوزى جانعا داۋا, كوڭىلگە مەدەۋ بولىپ تۇر.
دانا حالقىمىز: «جاقسى ءسوز – جارىم ىرىس» دەمەي مە. وسى ساتتە اينالامىزدى ۇرەيگە ەمەس, ۇمىتكە, قايعىعا ەمەس, قۋانىشقا بولەيتىن ءسوزىمىزدى ارناساق ساۋاپقا كەنەلەرىمىز حاق. ءبىز بۇدان دا قيىن-قىستاۋ زاماندى كورگەن قارعا تامىرلى قازاقپىز. جاراتقاننىڭ جار بولۋىمەن بۇل سىناقتى دا جەڭەمىز.
ءبىز وتكەنگە سالاۋات ايتىپ, اللانىڭ ارايلاپ اتقان ءاربىر تاڭىنان جاقسىلىق كۇتكەن حالىقپىز. رۋحىمىزدى تۇسىرمەي, سىن ساعاتىندا ساعىمىزدى سىندىرىپ المايىق. ءبىز ءبىر قايىرى بار دۇنيەنىڭ ەڭ كوركەم بەينەدە, ابايشا ايتقاندا, ماحابباتپەن جاراتىلعان ادامبىز. اللا ءبارىن كورىپ تۇر. بۇل سىناقتىڭ سوڭعى ناتيجەسى دە ونىڭ قۇدىرەت-قۇزىرىندا. ويتكەنى, ول – شەكسىز ءبىلىم مەن حيكمەت يەسى.
ءبىز قازىر ىمىراسىزدىققا ەمەس – ىنتىماققا ۇيىساتىن سىندارلى ساتتە تۇرمىز. مۇندايدا حالىق دانالىعى: «بەتەگە كەتسە – بەل قالار, بەرەكەڭ كەتسە – نەڭ قالار؟» دەمەي مە؟ اللا ەلشىسى ايتقانداي, جاقسى سويلەپ, اينالاداعى ادامدارعا شۋاق شاشىپ, ۇرەيگە ەمەس, ۇمىتكە قانات بىتىرەيىك.
اڭگىمەلەسكەن
جولدىباي بازار,
«Egemen Qazaqstan»
