كەلىسىپ پىشكەن تونداي...

الماتىدا بيلىك پەن ۇكىمەتتىك ەمەس ۇيىمدار وكىلدەرى ءىس-قيمىل بىرلىگى ماسەلەلەرىن تالقىلادى جاقىندا اۋەلى قالا اكىمدىگىندە “قوعام جانە بيلىك: الەۋمەتتىك ارىپتەستىك كوكجيەگى” اتتى ىسكە اسى­رىلعان الەۋمەتتىك ءماندى جوبالار كورمەسى بولىپ ءوتتى. وندا مەملە­كەتتىك تاپسىرىس اياسىندا ۇكىمەتتىك ەمەس ۇيىمدار جۇزەگە اسىرعان ءبىر­تا­لاي جوبالار كورسەتىلىپ, جۇرت­شى­لىققا تانىستىرىلدى. وسى ءىس-شارا بارىسىندا ۇكىمەتتىك ەمەس ۇيىم­داردىڭ ءىس-قيمىل بىرلىگى مەن ىنتى­ماقتاستىق جونىندەگى قوعامدىق كەڭەسىنىڭ وتىرىسى وتكىزىلىپ, وعان قالا اكىمى احمەتجان ەسىموۆ ءتور­اعالىق ەتتى. وتىرىس كەزىندە ۇكىمەتتىك ەمەس ۇيىمداردىڭ وكىلدەرى قالالىق قۇ­رى­لىمداردىڭ جەتەكشىلەرىمەن بىرلەسە وتىرىپ, بيلىك پەن قوعام­دىق سەكتوردىڭ الەۋمەتتىك ءارىپ­تەستىگىن ودان ءارى دامىتۋعا قاتىستى ماسەلەلەردى كەڭىنەن ءسوز ەتتى. قالا اكىمى الەۋمەتتىك ارىپتەستىكتىڭ قول­جەتىمدى ءارى ءتيىمدى تەتىكتەرى قاجەت­تىگىن ەرەكشە اتاپ كورسەتتى. “كەلىسىپ پىشكەن تون كەلتە بولماس” دەگەن­دەي, وسىناۋ وتىرىستىڭ نەگىزگى ماق­ساتىنىڭ ءوزى دە اتقارۋشى ورگان­دارمەن ءىس-قيمىل بىرلىگىنىڭ پايداسىن باعامداپ, بارلىق كوم­مەرتسيالىق ەمەس ۇيىمداردىڭ كۇش-جىگەرىن توپتاستىرۋ ماقساتىن كوز­دەگەنى دە انىق. بۇكىل ەل بويىنشا تىركەلگەن قوعامدىق ۇيىمداردىڭ قىرىق پايىزى الماتىدا جۇمىس ىستەيدى ەكەن. ەندەشە, قالا باسشى­سىنىڭ وسىناۋ جايعا باسا نازار اۋدارعانى دا تۇسىنىكتى بولسا كەرەك. وسىعان وراي ءوزارا ىنتىماق­تاس­تىقتىڭ كوكجيەگى مەن كەلەشەگى تۋرالى قوعامدىق ۇيىمدار وكىلدەرى دە ءوز وي-پىكىرلەرىن بۇكپەسىز ورتاعا سالدى. الماتىداعى قوعامدىق كەڭەس رەسپۋبليكادا العاشقى بولىپ 2009 جىلى قۇرىلعانىنان حاباردار ەدىك. ونىڭ كونسۋلتاتيۆتىك-كەڭەسشىلىك ورگان رەتىندەگى مارتەبەسى جانە بار. مۇندا جۇرتشىلىق پەن اكىمدىك وكىلدەرى ءارتۇرلى ماسەلەلەردى ۇنەمى بىرلەسىپ تالقىلايدى. كەڭەس ءوز وتىرىستارىنىڭ قورىتىندىلارى بويىنشا قانداي دا ءبىر پروبلەما­لاردى شەشۋدىڭ جولدارىن نۇسقاعان ءوز ۇسىنىستارىن ءتيىستى قۇزىرلى ورىندار مەن مەملەكەتتىك ورگان­دارعا جولداپ وتىرادى. قالا اكىم­دىگى الەۋمەتتىك تاپسىرىس ارقىلى ۇكىمەتتىك ەمەس ۇيىمدارعا بىرقاتار وكىلەتتىكتەردى بەرۋدى يگى داستۇرگە اينالدىرىپ كەلەدى. بۇگىنگى وتى­رىستا ءمالىم ەتىلگەندەي, قالالىق وكىمەت ورىندارى ۇكىمەتتىك ەمەس ۇيىمدارمەن ءوزىنىڭ وسى باعىتتاعى ءوزارا تىعىز قارىم-قاتىناسىن كە­ڭەيتە ءتۇسۋدى ۇيعارعان. سونىمەن بىرگە, الماتىنىڭ اكىمدىگى قالا­لىق ءماسليحات قاراۋىنا ۇكىمەتتىك ەمەس ۇيىمداردى قارجىلاندىرۋ­دى ەكى ەسە ۇلعايتۋ جونىندە ۇسى­نىس ەنگىزىپ وتىر. وسىعان وراي جۇرت­شىلىق وكىلدەرى مۇنداي اشىق ءۇن قاتىسۋعا جانە ءوز ۇسى­نىستارى مەن سىن-ەسكەرتپەلەرىن ەنگىزۋ ءمۇم­كىندىگى ءۇشىن العىس­تارىن ءبىلدىردى. وتىرىس سوڭىندا قالا اكىمى 2009 جىلى جۇزەگە اسىرىلعان الەۋ­مەتتىك ءماندى جوبالار كورمەسىنىڭ جەڭىمپازدارىن قۇتتىقتاپ, ولارعا ماراپات گراموتالارىن تاپسىردى. ورىندالعان جوبانىڭ ۇزدىك تۇساۋ­كەسەرى ۇسىنىمىندا ورالمانداردىڭ “اسار” رەسپۋبليكالىق قوعامدىق بىرلەستىگى, حالىققا الەۋمەتتىك قىزمەت كورسەتۋدەگى وزىق تاجىريبە ۇسىنىمى بويىنشا “شىراق” مۇگەدەك ايەلدەر قاۋىمداستىعى, الەۋمەتتىك ءماندى جوبالاردى ۇزاق مەرزىمدى ىسكە اسىرۋ كەلەشەگى ۇسىنىمى بويىنشا قازاقستاننىڭ داعدارىس ورتالىقتارى وداعى جەڭىمپاز اتاندى. قورعانبەك امانجول.