التىناي قاراعويشيەۆا الماتىداعى پەرزەنتحانالاردىڭ بىرىندە اكۋشەر-گينەكولوگ بولىپ جۇمىس ىستەيدى. اۋرۋحاناعا قازىر كوروناۆيرۋسپەن اۋىراتىن ايەلدەر اكەلىنەدى. بىراق بۇگىندە التىناي بوسانعان ايەلدەر مەن جاڭا تۋعان سابيلەر ءۇشىن عانا ەمەس, سونىمەن قاتار ءوز وتباسىنا دا اۋرۋ جۇقتىرماۋى ءۇشىن جاۋاپتى, - دەپ جازدى بۇۇ جاڭالىقتارى.
التىناي قاراعويشيەۆا الماتى قالاسىنداعى №1 قالالىق پەرزەنتحانانىڭ بوساندىرۋ بولىمىندە 15 جىلدان بەرى اكۋشەر-گينەكولوگ بولىپ جۇمىس ىستەيدى. ونىڭ ايتۋىنشا, بۇل پەرزەنتحانا COVID-19 جۇقتىرۋى مۇمكىن جۇكتى ايەلدەردى بوساندىراتىن وقشاۋلاۋ ورنى رەتىندە تاڭدالعاندا, ول ءبىر ءسات تە ويلانباستان, ءوز قىزمەتىندە قالامىن دەپ شەشكەن.
قازاقستاندا COVID-19 جۇقتىرۋدىڭ العاشقى جاعدايلارى وسى جىلدىڭ ناۋرىز ايىندا نۇر-سۇلتان مەن الماتى قالالارىندا انىقتالدى. ىندەت انىقتالعان العاشقى كۇندەرى بيلىك ددۇ قولداۋىمەن مەديتسينا قىزمەتكەرلەرىن پاندەميا جاعدايىندا جۇمىس ىستەۋگە دايىنداۋعا ارنالعان وقۋ كۋرستارىن ۇيىمداستىردى.
قالالىق دەنساۋلىق ساقتاۋ باسقارماسىنىڭ جۇقپالى اۋرۋلار جونىندەگى ماماندارى التىناي جۇمىس ىستەيتىن پەرزەنتحانا قىزمەتكەرلەرىن دە وقىتقان. وندا دارىگەرلەر جاڭا ينفەكتسيادان قورعانۋ جانە COVID-19 ىندەتىنە شالدىققان ادامدارعا كومەك كورسەتۋ بويىنشا تاجىريبە الدى.
ەرتەسى كۇنى تاڭعى التىدان باستاپ بىزگە COVID-19 دياگنوزى راستالعان ادامدارمەن تىعىز بايلانىستا بولعان ايەلدەر كەلىپ تۇسە باستادى, – دەپ ەسكە الادى التىناي.
ونىڭ ايتۋىنشا, ەكى كۇننەن سوڭ اۋرۋحاناعا كارانتيندەگى جۇكتى ايەلدەر كەلىپ تۇسە باستاعان. ولاردىڭ كوپشىلىگىنىڭ جاڭا كوروناۆيرۋسكە تاپسىرعان تەستى وڭ ناتيجە كورسەتىپتى.
"بۇل كۇنى مەن ءتورت ايەلدى بوساندىرىپ الدىم: ۇشەۋى تابيعي جولمەن, ال بىرەۋى كەسار تىلىگى ارقىلى بوساندى. وسى ايەلدەردىڭ بارلىعى COVID-19 جۇقتىرعان ەدى", - دەيدى ول.
دارىگەردىڭ ايتۋىنشا, پاندەميا بوساناتىن ايەلدەرگە كومەك كورسەتۋ پروتسەسىن قيىنداتقان. مىسالى, بۇگىندە مەدبيكەلەر سانى قىسقارعاندىقتان, بوساناتىن ايەلدەردى ەموتسيونالدى تۇردە قولداۋعا ۋاقىت جەتپەيدى. تولعاق كەزىندە اۋىرسىنۋدى سەزىنەتىن ايەلدەر وزدەرىن جالعىز سەزىنەدى. مەديتسينا قىزمەتكەرلەرىنىڭ وزدەرى دە ءوزىنىڭ جانە بالالارىنىڭ دەنساۋلىعىنا الاڭدايدى.
"مەن پەرزەنتحانادا اۋرۋ جۇقتىرعان پاتسيەنتتەرمەن جۇمىس ىستەۋدەن قورىقپايمىن, بىراق ءوز وتباسىم مەن بالالارىم ءۇشىن ۋايىمدايمىن. بوسانعان انا مەن جاڭا تۋعان ءسابيدىڭ جاعدايلارى جاقسى ەكەنىن كورگەندە, ءوز ۋايىمىمدى جەڭۋ وڭاي بولادى", - دەيدى التىناي قاراعويشيەۆا.
وعان تاۋلىگىنە 24 ساعاتتان قورعانىش كوستيۋمىمەن جانە ماسكامەن جۇمىس ىستەۋگە تۋرا كەلەدى. بۇل وڭاي ەمەس.
"كەيدە ۇنەمى ماسكا تاعۋ مەن رەسپيراتور قولدانعاننان تەرى كوگەرىپ, قىزارادى. ال كەيبىر ارىپتەستەرىمدە ونداي زاتتارعا اللەرگيا بار. ماسكانى ۇنەمى اۋىستىرىپ وتىرۋ كەرەك, سەبەبى ولار ىلعالدى بولادى. بۇل – بۇكىل الەمدەگى مەديتسينا قىزمەتكەرلەرى ءۇشىن قيىن ۋاقىت. سونىمەن قاتار, ءبىز بارىنە ورتاق پروبلەمامەن بەتپە-بەت كەلدىك", - دەيدى ول.
سوعان قاراماستان, التىنايعا اۋرۋحانادا جۇمىس ىستەگەن ۇنايدى. "مەن وتە ءتوزىمدى ادام ەكەنمىن. قيىندىقتاردى جەڭە وتىرىپ, ءوز جۇمىسىمدى جالعاستىرعىم كەلەدى. بۇل وڭاي شارۋا ەمەس, بىراق اناسى بالاسىن قۇشاقتاپ, ساعان العىسىن ايتقاندا, بارلىق قيىندىق ۇمىتىلادى", - دەيدى التىناي.
