سۋرەتتى تۇسىرگەن وقاس امانعالي
دۇنيەنى دۇرلىكتىرگەن پاندەمياعا قارسى كۇرەس ەلىمىزدە جالپىحالىقتىق مايدانعا اينالدى. جۇرت بولىپ جۇمىلىپ, دارىگەرلەرگە دەم بەرۋشى, اۋرۋحانالارعا كومەكتەسىپ جاتقان اعايىن كوپ.
– كوروناۆيرۋس پاندەمياسىنا قارسى كۇرەسكە كاسىپكەرلەرىمىز تاعى دا جۇمىلدى. بىزگە اكەلىنگەن 10 ليترلىك وتتەگى كونتسەنتراتورلارى – اۋرۋحاناعا اۋىر جاعدايدا تۇسكەن ناۋقاستار ءۇشىن وتە قاجەتتى قوندىرعىلار. پۋلسوكسيمەتر قۇرالى ناۋقاس قانىنىڭ قۇرامىنداعى وتتەگى مولشەرىن انىقتاپ, ءدال دياگنوستيكا قويۋعا تاپتىرماس كومەكشى. ءدال قازىر وبلىستىق اۋرۋحاناداعى پروۆيزورلىق ستاتسيوناردا 148 ناۋقاس جاتىر. ولاردىڭ 80 پايىزى وتتەگى كونتسەنتراتورىنا قوسىلعان. ال 10-15 پايىزى وكپەنى جاساندى تىنىستاندىراتىن اپپاراتتىڭ كومەگىنە مۇقتاج. ايتا كەتەتىن جايت, ناۋقاستاردىڭ كوبى ۇيدە ەمدەلىپ, 10-12 كۇن ۋاقىت وتكىزىپ, اۋرۋدى اسقىندىرىپ كەلەدى. وسى جەردە عانا ناقتى دياگنوزى انىقتالىپ, كاسىبي مەديتسينالىق جاردەم الادى, – دەيدى وبلىستىق كوپبەيىندى اۋرۋحانا ديرەكتورى.
مەديتسينالىق جابدىقتار رەسەي فەدەراتسياسىنان اكەلىنگەن. كورشى مەملەكەتپەن اراداعى كەلىسىمدەرگە سايكەس قاجەتتى قۇرالدار جەڭىلدىكپەن, جەدەل جەتكىزىلۋدە.
– ەلدە وسىنداي قيىن جاعداي بولىپ جاتقاندا ءبىز, كاسىپكەرلەر, قاراپ قارا المادىق. ءبىز – ەلمەن بىرگەمىز. «باي بولساڭ, ەلگە پايداڭ ءتيسىن» دەگەن اتالى ءسوزدى ەسكەرىپ, ءوز الىمىزشە ازدى-كوپتى قاراجات ءبولىپ, ىندەتكە قارسى كۇرەستە كەرەكتى قۇرال-جابدىقتاردى جەتكىزىپ جاتىرمىز. وسى باستاما وزگە ارىپتەستەرىمىزگە دە ۇلگى بولسا دەيمىز. ىندەتتى بىرگە ەڭسەرەيىك! – دەيدى كاسىپكەرلەر اتىنان ءسوز العان ديدار اسەتوۆ.
وبلىستىق ىشكى ساياسات باسقارماسى باسشىسىنىڭ ورىنباسارى دارحان قانىبەك ۇلىنىڭ ايتۋىنشا, «اقجايىق» قورىنا وسى كەزگە دەيىن وبلىس كاسىپكەرلەرىنەن 100 ملن تەڭگەنىڭ ۇستىندە قاراجات اۋدارىلعان. مۇنىڭ ءبارى ورتالىقتاندىرىلعان ساتىپ الۋ جۇيەسى بويىنشا كوروناۆيرۋس ىندەتىمەن كۇرەسكە قاجەتتى ءدارى-دارمەك پەن جابدىقتار الۋعا جۇمسالۋدا. جاقىندا عانا 160 وتتەگى كونتسەنتراتورى ماسكەۋ قالاسىنان ورالعا جەتكىزىلىپ, ءتيىستى ەمدەۋ مەكەمەلەرىنە تاراتىلدى.
باتىس قازاقستان وبلىسى
