كەلىسىم بويىنشا 193 ءۇيدىڭ بارلىعىنا ءى ترانش بويىنشا 17 ميلليون تەڭگەنىڭ 50%-ى اۋدارىلىپ, تۇرعىندار ۇيلەرىنىڭ قۇرىلىسىن قارقىندى جۇرگىزىپ جاتىر. سونداي-اق, 7 تۇرعىن ۇيگە ءىى ترانش بويىنشا تاعى 25% قارجى اۋدارىلىپ, اتالعان ۇيلەرگە ىشكى ارلەۋ جۇمىستارى جۇرگىزىلىپ جاتىر.
قازىر 188 ءۇيدىڭ ىرگەتاسى قالانىپ, 105 ءۇيدىڭ قابىرعاسى ورىلگەن. سونىمەن قاتار, 43 ءۇيدىڭ شاتىرى جابىلعان. وسى ۋاقىتقا دەيىن اۋىلدا 190 ۇيگە بۇزۋ جۇمىستارى جاسالىپتى.
جالپى ەلدىمەكەندە 694 قۇرىلىسشى 60 ۇجىمعا بىرىگىپ, قۇرىلىس جۇمىستارىن قارقىندى جۇرگىزۋدە. بۇعان دەيىن وزبەكستان رەسپۋبليكاسى تاراپىنان ورگەباستىقتارعا 3 ەكسكاۆاتور, 1 كاماز بەن 30 ادام كومەككە كەلگەن ەدى.
ايتا كەتەيىك, ورگەباس اۋىلى 1971 جىلى قۇرىلعان. اۋماعى 1256 گەكتاردى, ونىڭ ىشىندە ەگىستىك جەردىڭ كولەمى 1203 گەكتاردى قۇرايدى. 1451 تۇرعىن تۇرادى.
اۋىلدا 1 مەكتەپ, 2 بالاباقشا, 1 مەديتسينا پۋنكتى مەن 1 پوليتسيا پۋنكتى بار. سونىمەن قاتار, 155 شارۋا قوجالىعى, 1 مال بورداقىلاۋ الاڭى, 3 ساۋدا نۇكتەسى مەن 1 جاۋاپكەرشىلىگى شەكتەۋلى سەرىكتەستىك جۇمىس ىستەيدى.
