ەلىمىزدە جاقىندا اتالىپ وتكەن مەديتسينا قىزمەتكەرلەرىنىڭ كاسىبي مەرەكەسىنە وراي باتىس قازاقستان وبلىستىق جۇقپالى اۋرۋلار اۋرۋحاناسىنىڭ ءبولىم مەڭگەرۋشىسى بيبىگۇل ايتباەۆا – «پاراسات» وردەنىمەن, وبلىستىق كوپبەيىندى اۋرۋحانانىڭ دارىگەرى مارات بالشامباەۆ – «قۇرمەت» وردەنىمەن, وبلىستىق جۇقپالى اۋرۋلار اۋرۋحاناسىنىڭ رەانيماتولوگ-دارىگەرى سالاۋات اعداۋوۆ, وبلىستىق كارديولوگيالىق ورتالىقتىڭ دارىگەرى دانيار ارەنوۆ, وبلىستىق جۇقپالى اۋرۋلار اۋرۋحاناسىنىڭ اعا مەدبيكەسى ءاليا ماۋجانوۆا – «ەرەن ەڭبەگى ءۇشىن» مەدالىمەن, وبلىستىق كوپبەيىندى اۋرۋحانا مەدبيكەسى ءاسيما گاسينا – «شاپاعات» مەدالىمەن, وبلىستىق كارديولوگيالىق ورتالىق مەدبيكەسى ۆەنەرا مىرزاعاليەۆا – قازاقستان رەسپۋبليكاسىنىڭ قۇرمەت گراموتاسىمەن ماراپاتتالعان بولاتىن. ولاردىڭ ءبارى دە – وسى كوروناۆيرۋسپەن كۇرەستە تىكەلەي وتتىڭ ورتاسىندا جۇرگەن ماماندار.
– قازىر بۇكىل الەمدە قاتەرلى ىندەتكە قارسى كوزگە كورىنبەيتىن الاپات سوعىس ءجۇرىپ جاتىر. بۇل مايداننىڭ العى شەبىندە دارىگەرلەر جۇرگەنى زاڭدىلىق. سوڭعى كەزدە قايتىس بولعان ارىپتەستەرىمنىڭ ءبارىن دە جەكە تانۋشى ەدىم. ولار ءوز ءىسىنىڭ بىلىكتى مامانى بولاتىن, ءومىرىنىڭ سوڭىنا دەيىن انتىنا ادال بولىپ, وزگە ناۋقاستاردى قۇتقارۋ ءۇشىن ءوز باسىن قاۋىپكە تىكتى. وتە وكىنىشتى, ارينە. ولاردىڭ جارقىن بەينەسى ءبىزدىڭ جۇرەگىمىزدە ماڭگى ساقتالادى, – دەيدى وبلىستىق دەنساۋلىق ساقتاۋ باسقارماسىنىڭ باسشىسى بولاتبەك قايۋپوۆ.
كوروناۆيرۋسپەن اۋىرعان باتىسقازاقستاندىق مەديتسينا قىزمەتكەرلەرىنىڭ ءبارى دە ۆيرۋستى ناۋقاستان جۇقتىرعانى انىقتالعان. ياعني ولاردىڭ ءبارى دە كاسىبي قىزمەتىندە ءجۇرىپ قاتەرلى ۆيرۋسپەن بەتپە-بەت كەلگەن.
مىسالى, باتىس قازاقستان وبلىستىق پەريناتالدىق ورتالىق ديرەكتورى نيكولاي دميتريەنكو وزىنە ءتونىپ تۇرعان قاۋىپكە قاراماستان شالعايدان كەلگەن جۇكتى ايەلگە مەديتسينالىق جاردەم كورسەتكەن. ول ايەلدىڭ كوروناۆيرۋس جۇقتىرىپ كەلگەندىگى بەلگىلى ەدى. ءسابي مەن انانىڭ ءتىرى قالۋى ءۇشىن بارىن سالعان نيكولاي بوريس ۇلى بىرنەشە كۇننەن كەيىن پنەۆمونيادان اسقىنعان ترامبوز سالدارىنان قايتىس بولدى.
ال يۋري ەسەنعالي ۇلى ساريموۆ بايتەرەك اۋداندىق №2 اۋرۋحاناسىندا حيرۋرگ بولىپ ىستەيتىن. اۋعان سوعىسىندا اسكەري بورىشىن وتەگەن جاۋىنگەردىڭ كەيىنگى ءومىرى دەنساۋلىق ساقتاۋ سالاسىندا وتكەن. ول دا دارىگەرلىك قىزمەتىنە وراي ىندەت جۇقتىرعان پاتسيەنتپەن قارىم-قاتىناس جاساۋعا ءماجبۇر بولعان. بايتەرەك اۋدانى رەسەي فەدەراتسياسىمەن شەكارادا تۇرعانىن, العاشقى كەزدە ىندەت جۇقتىرۋشىلاردىڭ 90 پايىزى وسى شەكارادان كەلگەنىن ەسكەرسەك, بايتەرەكتىك دارىگەرلەردىڭ ۆيرۋس جۇقتىرۋ ىقتيمالدىلىعى وتە جوعارى دەدى.
وبلىستىق دەنساۋلىق ساقتاۋ باسقارماسىنىڭ باسشىسى بولاتبەك امانگەلدى ۇلىنىڭ ايتۋىنشا, ورال قالالىق №1 ەمحانانىڭ رەنتگەن-لابورانتى ۆەنەرا يحسانقىزى قۇتحوجينا مەن ورال قالالىق №6 ەمحانانىڭ پەدياتر-دارىگەرى باتيما جولمۇحامبەتقىزى بيسەنعاليەۆا دا كاسىبي مىندەتىن اتقارۋ ۇستىندە قازا تاپقان اسىل جاندار.
راس, قازا تاپقان باتىسقازاقستاندىق دارىگەرلەر رەسمي ستاتيستيكا بويىنشا سovid-19 ىندەتىمەن كۇرەسۋ جولىندا ەڭبەك ەتىپ ءجۇرىپ قايتىس بولعان مەديتسينا قىزمەتكەرلەرىنىڭ تىزىمىنە كىرمەيدى ەكەن. ويتكەنى ولار تىكەلەي پروۆيزورلىق نەمەسە ينفەكتسيالىق ستاتسيوناردا قىزمەت ەتكەن جوق. دەگەنمەن ولاردىڭ كاسىبي قىزمەتى بارىسىندا covid-19 ۆيرۋسىن جۇقتىرعان ناۋقاستارمەن بەتپە-بەت كەلىپ, قارىم-قاتىناستا بولعانى شىندىق. دارىگەر رەتىندە, مامان رەتىندە ولار ءوز ارەكەتىنىڭ قانداي قاۋىپتى ەكەنىن انىق ءبىلدى, سوندا دا تاۋەكەل ەتىپ, ءوز مىندەتىنە, انتىنا اقىرىنا دەيىن ادالدىق تانىتتى. مىنە, سوندىقتان دا ولاردى ارىپتەستەرى دە, قاراپايىم حالىق تا باتىر سانايدى.
باتىس قازاقستان وبلىسى
