كىتاپقا اقىننىڭ ۇلدارى اقىلباي, ماعاۋيا, تۇراعۇل مەن نەمەرەسى اۋباكىر اقىلباي ۇلىنىڭ كوركەم تۋىندىلارى جانە ولاردىڭ ءومىرى مەن شىعارماشىلىقتارى تۋرالى زەرتتەۋلەر, ەسسەلەر مەن ماقالالار توپتاستىرىلعان. جيناقتىڭ التىن ارقاۋى – عۇلاما مۇحتار اۋەزوۆ, كورنەكتى ابايتانۋشى-عالىم قايىم مۇحامەدحان ۇلىنىڭ ەڭبەكتەرى.
«ابايدىڭ اقىن ۇلدارىن» وقىرمانعا تانىستىرۋعا ۇيتقى بولىپ, يدەيا بەرگەن تۇلعا – مەملەكەت جانە قوعام قايراتكەرى, كورنەكتى عالىم, ابايتانۋشى مۇحتار قۇل-مۇحاممەد. كىتاپتىڭ جالپى رەداكتسياسىن باسقارعان قازاقستان رەسپۋبليكاسى ۇلتتىق كىتاپحاناسىنىڭ ديرەكتورى, قازاقستاندىق كىتاپحانالىق وداقتىڭ توراعاسى باقىتجامال وسپانوۆا.
ال ونىڭ قۇراستىرۋشىسى – ۇلتتىق كىتاپحانانىڭ عىلىمي حاتشىسى, قازاقستان جازۋشىلار وداعىنىڭ مۇشەسى بولات جۇنىسبەكوۆ. وسىنىڭ الدىندا ۇلتتىق كىتاپحانا ۇلى اقىننىڭ 175 جىلدىق مەرەيتويىنا ارناپ ب.جۇنىسبەكوۆتىڭ «اباي ساۋلەسى» اتتى زەرتتەۋلەر مەن ماقالالار جيناعىن باسىپ شىعارعان ەدى.
ابايدىڭ اقىن ۇلدارىنىڭ ولەڭدەرى مەن اۋدارمالارىن وقي وتىرىپ ۇلى اقىن ءارى دانىشپان اكەنىڭ ءومىر مەن ونەر مەكتەبىنىڭ ماۋەلى جەمىسىنە تامسانىپ, «ولسە دە ولمەگەنگە تەڭ» زور ونەگەگە ءتانتى بولامىز. كىتاپ ادەبيەتسۇيەر قاۋىمنىڭ جانە بارشا جۇرتشىلىقتىڭ قىزىعۋشىلىعىن تۋعىزادى دەپ سەنەمىز.
