بالالار ديابەتىمەن قالاي كۇرەسەمىز؟

بۇگىنگى تاڭدا قانت ديابەتى مەن سەمىزدىك سياقتى اۋرۋلار ەرەسەكتەردى بىلاي قويعاننىڭ وزىندە, جاس­وسپىرىم بالالار ارا­سىن­دا كەڭىنەن تاراپ كەتتى. بۇل قالاي بولعان دەگەن سۇراققا سارسەنبى كۇنى “نۇر وتان” حدپ ورتالىق اپ­پاراتىندا “مەكتەپتەگى قانت ديابەتىمەن اۋىراتىن بالالار” اتتى تاقىرىپتا وتكەن دوڭگەلەك ۇستەلگە جينالعان دەنساۋلىق ساقتاۋ سالاسىنىڭ ماماندارى جاۋاپ ىزدەدى. حالىقتى الەۋمەتتىك قورعاۋ ءجۇ­يەسىن ودان ءارى جەتىلدىرۋ مەن مە­ديتسينالىق قىزمەت كورسەتۋدى جاقسارتۋ – “نۇر وتان” حدپ-نىڭ نەگىزگى نىساناسىندا جۇرگەن ماسەلەلەردىڭ ءبىرى. وتكەن جىلدىڭ مامىر ايىندا تۇڭعىش پرەزيدەنت قورىنىڭ قولداۋىمەن قازاقستان ديابەت قاۋىمداستىعىنىڭ “ورتا ءبىلىم بەرەتىن مەكەمەلەردە ءبىلىم الۋشى قانت ديابەتىمەن اۋىراتىن بالالار مەن جاسوسپىرىمدەر پرو­بلەمالارىن شەشۋ, قۇقىقتارىن قورعاۋ جانە مۇددەلەرىن تانىستىرۋ ءۇشىن رەسپۋبليكالىق اتا-انالار كوميتەتىن قۇرۋ” جوباسى ءوز جۇمىسىن باستاعان بولاتىن. وسىعان بايلانىستى بۇگىنگى تاڭدا ەلىمىزدىڭ كوپتەگەن ايماقتارىندا قانت ديابەتىنىڭ تارالۋ سەبەپتەرى جان-جاقتى زەرتتەلۋ ۇستىندە. قازاقستان بالالارىنىڭ ارا­سىندا قانت ديابەتىنىڭ كەڭ تارا­لۋى­نىڭ الدىن الۋ, بۇل اۋرۋدىڭ ەتەك جايىپ كەتۋىنە توسقاۋىل قويۋ ءۇشىن بالالار اراسىنداعى سالاماتتى ءومىر سال­تىن قالىپتاستىرۋ ءۇشىن “نۇر وتان” حدپ, دەنساۋلىق ساقتاۋ مينيسترلىگى, ءبىلىم جانە عىلىم مينيس­ترلىگىنىڭ بالالار قۇقىق­تارىن قورعاۋ كوميتەتى مەن ديابەت قاۋىمداستىعى كۇش بىرىكتىرگەندى ءجون كورىپتى. اتالعان ءتورت قۇرىلىم اراسىندا ىنتىماقتاستىق تۋرالى ءتورت جاقتى مەموراندۋمعا قول قويىلدى. دوڭگەلەك ۇستەل بارىسىندا با­لالار اراسىنداعى قانت ديا­بەتىنىڭ كەڭ تارالۋىنا, ولاردىڭ دۇرىس تاماقتانباۋى, سونىمەن قاتار, اتا-انا, ءبىلىم بەرۋ مەكەمەلەرى تارا­پىنان ناقتى قاداعالانباۋى سەبەپ ەكەندىگى اتاپ كورسەتىلدى. سوزىل­مالى اۋرۋلار قاتارىنا جاتاتىن بۇل دەرتتىڭ جاراسى جەڭىل دەپ كوپتەگەن بالالار مەن ولاردىڭ اتا-انالارى بۇل اۋرۋعا ونشا ءمان بەرىپ قارامايدى. قان قۇرامىنداعى قانتتىڭ جوعارىلاۋى ۋاقىت وتە كەلە باسقا دا كۇردەلى ءارى قيىن اۋرۋلارعا شالدىقتى­را­تىن­دىق­تارىن قاپەرگە المايدى. سوندىقتان دا قانت ديابەتىمەن اۋىراتىن بالالاردى بەلگىلى ۋاقىت مەرزىمىندە تەكسەرىپ, ولاردى قاتاڭ ديەتالىق باقىلاۋدا ۇستاپ, مىنەز-ق ۇلىق­تارىن­داعى ەرەكشەلىكتەردى باقى­لاۋ­عا ءاربىر ءبىلىم بەرۋ مەكەمەلەرىندە ارنايى دارىگەرلەردىڭ بولۋى قاتاڭ ەسكەرتىل­مەك. قورىتا ايتقاندا, قانت ديابەتى – شىعىن كوپ جۇمسالاتىن, اس­قىنسا مۇگەدەكتىككە دۋشار ەتەتىن سوزىلمالى اۋرۋ, سونداي-اق مۇنداي اۋرۋمەن اۋىراتىن بالالاردى جازعى لاگەردە قابىلدامايدى. وسى سەبەپتى ءاربىر اتا-انا ءوز بالا­لارىنىڭ دۇرىس تاماقتانۋىن قاتاڭ باقىلاۋعا الۋى شارت. اراي ۇيرەنىشبەكقىزى.