ونلاين باسقوسۋدا قفف باس حاتشىسى مادەنيەت جانە سپورت مينيسترلىگىمەن بىرگە چەمپيوناتتى ءبىر جەردە وتكىزۋ جوباسىن تالقىلادى. بۇل ارقىلى ينفەكتسيانىڭ تارالۋىن قىسقارتۋعا بولادى. قالا اراسىندا قاتىناس بولمايدى. ءار كلۋب تاڭدالعان ايماقتا قوناقۇيگە ورنالاسىپ, ىشكى كارانتين شارالارىنا تولىقتاي جاۋاپ بەرەدى. بۇل جوبا OLIMPBET-فۋتبولدان قازاقستان چەمپيوناتى مەن فۋتزالدان قازاقستان چەمپيوناتىنىڭ ويىندارىنا قاتىستى بولماق.
تاراپتار ەلدەگى ەپيدەميالىق احۋالعا بايلانىستى بالالار مەن جاستار اراسىنداعى فۋتبول جارىستارىن قايتا جالعاستىرۋ مۇمكىن ەمەس دەگەن پىكىرگە توقتالدى. ولاردىڭ اراسىندا ەكىنشى ليگا باسەكەسى بار. ويتكەنى بۇل تۋرنيرگە كامەلەتتىك جاسقا تولماعان ويىنشىلار قاتىسادى.
ۆيدەوكونفەرەنتسيا قورىتىندىسى بويىنشا چەمپيوندار ليگاسى مەن ەۋروپا ليگاسى حالىقارالىق جارىستارىنا ەلىمىزدىڭ ءتورت كلۋبى قاتىساتىنى ايتىلىپ, سونىمەن قاتار ۇلتتار ليگاسىنداعى قازاقستان ۇلتتىق قۇراماسىنىڭ الداعى ويىندارىنا قاتىستى دەنساۋلىق ساقتاۋ مينيسترلىگى مەن كوروناۆيرۋس ينفەكتسياسىنىڭ تارالۋىنا قارسى كۇرەس جونىندە مەملەكەتتىك كوميسسياعا ءوتىنىش جاسادى. باستى تالاپ فۋتبول ماتچتارىن كارانتين رەجىمىندە سپورت نىسانىنا كىرەتىن قىزمەتكەرلەردىڭ سانىن ازايتىپ, اشىق اسپان استىندا وتكىزۋ بولىپ وتىر.
