ءبىر جۇتىم اۋاعا ءزارۋ بولىپ جاتقان جاندارعا «ابزال ي ك» شارۋا قوجالىعىنىڭ باسشىسى ماعجان ەراليەۆ 700 باللون الىپ بەرگەن. ءدال وسىنداي كولەمدەگى كومەك وبلىستىق ءماسليحات دەپۋتاتى راسۋل ەسەنوۆتەن, «اقتوبە ي ك» جشس ديرەكتورى نۇرلان ىزدىباەۆتان دا كەلىپ ءتۇسىپتى. «اباي-داۋلەت» شارۋاشىلىعىنىڭ جەتەكشىسى مۇرات سارسەنباەۆ 300, جەكە كاسىپكەر نۇرجان بايجىگىتوۆ 50 وتتەگى باللونىن بەرگەن. ىسكەر ازاماتتار مەن قوعامدىق ۇيىمداردان جينالعان كومەكتى اسحات بايداۋلەتوۆ باسقاراتىن «ەل اراي» قوعامدىق بىرلەستىگى تەگىن تاسىمالداپ جاتىر. قالا اكىمىنىڭ ورىنباسارى اسقاربەك ەسجانوۆ بۇل ىسكە قوعام بەلسەندىلەرىنىڭ, ۆولونتەرلەردىڭ كوپ ۇلەس قوسىپ وتىرعانىن ايتادى. ۆولونتەرلەر وتتەگى باللوندارىمەن بىرگە ءدارى-دارمەك جەتكىزۋدى دە ۇيىمداستىرىپ, قينالعاندارعا قول ۇشىن سوزۋدا.
– وسى ۋاقىتقا دەيىن ءبىر ەمدەۋ مەكەمەسىنىڭ سۇرانىسى 25-30 باللوننان اسپايتىن. قازىر قالالىق اۋرۋحانانىڭ ءوزى ءبىر كۇندە 160-170 باللونعا تاپسىرىس بەرەدى. ارينە قازىر پايدا ويلايتىن ۋاقىت ەمەس, ەمحانالار مەن اۋرۋحانالارعا بارىنشا ارزان باعادا قىزمەت كورسەتىپ وتىرمىز, – دەيدى «شىڭعىس لتد» جشس باسشىسى ەرىك ءجۇنىسوۆ.
تۇرعىندار تاراپىنان شاقىرتۋلاردىڭ كۇرت كوبەيۋىنە بايلانىستى 29 ماۋسىمنان باستاپ وبلىس ورتالىعىنداعى ەمحانالار قالا اكىمدىگى بالانسىنداعى 23 قىزمەتتىك كولىكتى پايدالانا باستادى. ماماندار وسى كولىكتەرمەن 1 500-دەن استام شاقىرتۋعا بارىپ, جۇرتقا دارىگەرلىك كومەك كورسەتكەن. قالا اكىمىنىڭ ورىنباسارلارى, اپپارات باسشىسى جانە دەربەس ءبولىم باسشىلارى شاھار اۋماعىنداعى بارلىق اۋرۋحانالار مەن ەمحانالارعا جاۋاپتى بولىپ بەكىتىلدى.
