قازىر وڭىردەگى 314 ءدارىحانانىڭ 223-ءى اتىراۋ قالاسىندا تۇتىنۋشىعا قىزمەت كورسەتەدى. سوڭعى اپتاداعى ءدارى-دارمەك تاپشىلىعى ماسەلەسىن شەشۋ ءۇشىن "سك-فارماتسيا" ارقىلى ستاتسيونارلارعا جانە مەديتسينالىق-سانيتاريالىق العاشقى كومەك ۇيىمدارىنا بىرقاتار مەديتسينالىق پرەپاراتتار اكەلىنۋدە.
"جاقىندا اتىراۋعا 220 ميلليون تەڭگەنى قۇرايتىن ءدارى-دارمەكتەردىڭ 430 ءتۇرى شۇعىل جەتكىزىلدى. ونىڭ ىشىندە ازيتروميتسين, تسەفازولين, تسەفترياكسون سىندى انتيبيوتيكتەر مەن ىستىقتى تۇسىرەتىن دارىلەر مەن دارۋمەندەر بار. بۇل پرەپاراتتار پارتياسى وبلىس حالقىنىڭ سۇرانىسىن قامتاماسىز ەتەدى. ءدارى-دارمەكتەر قالاداعى جانە اۋداندارداعى دارىحانالارعا تۇگەل تاراتىلدى. اپتا سوڭىندا تاعى وسىنداي كولەمدە ءدارى-دارمەكتەر جەتكىزىلىپ, قاجەتتى دارىلەردىڭ بەلگىلى دەڭگەيدە قورى بولادى. سونداي-اق, كاسىپكەرلەردىڭ كومەگىمەن الىناتىن پرەپاراتتاردى الەۋمەتتىك جاعدايى تومەن توپتارعا ەمحانالار ارقىلى تاراتۋدى ويلاستىرىپ وتىرمىز", - دەدى وبلىس اكىمى ماحامبەت دوسمۇحامبەتوۆ.
