وسىلايشا بيىلعى چەمپيونات ءىس جۇزىندە جاز سوڭىنا قاراي عانا «باستالايىن» دەپ تۇر. ەۋروپا مەملەكەتتەرى كارانتيننەن ەرتە شىققاندىقتان چەمپيوناتتارىن دا ەرتە جالعاستىرىپ, قازىر ءوز قالىپتارىنا كەلىپ ۇلگەرسە, قازاقستاندىق فۋتبول ەۋروپا ليگاسىنىڭ ىرىكتەۋ ويىندارىنا دايىندىقسىز بارماق.
الايدا وزدىگىنەن ءۇي جاعدايىندا دايىندىقتارىن جالعاستىرىپ جاتقاندار دا بار. مىسالى, «استانا» ساپىنا بيىل جاڭادان قوسىلعان, بۇعان دەيىن كوپەنگاگەننىڭ نەگىزگى شابۋىلشىسى بولعان پەروس سوتيريۋ مەن ەلوردالىق كلۋبتىڭ تاعى ءبىر ويىنشىسى دورين روتاريۋ دا دايىندىقتارىن توقتاتقان جوق. بۇل تۋرالى فۋتبولشىلار وزدەرىنىڭ الەۋمەتتىك جەلىدەگى پاراقشالارىندا تۇراقتى حابارلاپ وتىرادى.
الايدا, پرەمەر-ليگا ويىنشىلارىنىڭ بارلىعى وسىلاي دايىندىقتارىن جالعاستىرىپ جاتىر دەي المايمىز. كوپشىلىگىنىڭ ءۇي جاعدايىندا دايىندالۋ مۇمكىندىگى بولماۋى دا ىقتيمال. ونىڭ ۇستىنە, وزدىنىەن جاسالعان دايىندىق چەمپيونات ۋاقىتىنداعىداي قىزۋ بولمايتىنى انىق.
ەل بويىنشا قاتاڭ كارانتين جاريالانعانىمەن, قوعامدىق ورىندار مەن مەكەمەلەر قالىپتى جۇمىس ىستەپ تۇرعانى بەلگىلى. ولاي بولسا, قازاقستان فۋتبول فەدەراتسياسىنىڭ پرەمەر ليگا ويىندارىن توقتاتىپ قويعانى اقىلعا قونىمسىز. كورەرمەندەردىڭ فۋتبول تاماشالاي الماۋى ءوز الدىنا, ەڭ باستىسى قازاقستان اتىن ەۋروپاعا تانىتىپ جۇرگەن كلۋبتار ەۋروپا ليگاسىنىڭ ىرىكتەۋ ويىندارىن مۇلدە دايىندىقسىز باستاعالى تۇر. بۇل, ارينە, كوماندالاردىڭ ويىنىنا ۇلكەن زيانىن تيگىزبەك. ماسەلەن, قازاقستاندىق كوماندالاردىڭ ىرىكتەۋ كەزەڭىندەگى قارسىلاستارى شوتلانديا, حورۆاتيا, كيپر, يزرايل, بەلارۋس سەكىلدى ەلدەردىڭ كلۋبتارى ساقاداي ساي دايىن بولادى. ويتكەنى ول ەلدەردە چەمپيونات قايتا قالىپتى رەجيمگە ءتۇستى. ال بەلارۋس ءتىپتى ءوز چەمپيوناتتارىن توقتاتقان جوق.
جىل سايىن ىرىكتەۋ كەزىندە ونسىز دا جوعارىدا اتالعان ەلدەردىڭ كلۋبتارىنان ءسۇرىنىپ جۇرگەن قايرات, توبىل, ورداباسىلار بيىل ءتىپتى ءالسىز بولاتىنى انىق. ال جىل سايىن توپتىق كەزەڭگە دەيىن جەتىپ جۇرەتىن استانا بيىل ىرىكتەۋ كەزەڭىنەن سۇرىنسە, تاڭ قالمايمىز.
سول سەبەپتى قازاقستان فۋتبول فەدەراتسياسى چەمپيوناتتى توقتاتپاۋى كەرەك ەدى. ەۋروپا ليگاسىنىڭ ىرىكتەۋ ويىندارى 18/19 تامىزدا باستالادى دەسەك, ەكى اي كارانتيننەن كەيىن چەمپيونات قايتا جالعاستى دەگەن كۇننىڭ وزىندە ءبىر اي ۋاقىت وتاندىق كلۋبتاردىڭ قالىپتى ويىندارىنا تۇسۋىنە جەتپەۋى مۇمكىن.
ماعجان مولداحمەت
