قالانىڭ وڭ جاعالاۋداعى تاريحي بولىگىندە, "كوپەس ۆاسيلي كۋپرين ءۇيىنىڭ" ىرگەسىندە ءوتىپ جاتقان كورمەدەگى تاريحي قۇجاتتاردىڭ ۇلكەيتىلگەن كوشىرمەسى مەن فوتودەرەكتەردى تاماشالاۋ ارقىلى باس قالانىڭ قالىپتاسۋى مەن دامۋىنا قاتىستى ەڭ قىزىقتى دەگەن اقپاراتتارعا قانىعۋعا بولادى.
– " ۇلى ەلدىڭ مۇراسى" اتتى وسى فوتوقۇجات كورمەسى وتكەن عاسىردىڭ 1990-شى ەىلدارىنان باستاپ, بۇگىنگە دەيىنگى ءبىر عاسىردان استام كەزەڭدى قامتيدى. ەكسپوزيتسياعا نۇر-سۇلتان قالاسىنىڭ مەملەكەتتىك ارحيۆىنەن, قر تۇڭعىش پرەزيدەنتى-ەلباسىنىڭ كىتاپحاناسىنان, قر پرەزيدەنتى ارحيۆىنەن جۇزگە جۋىق فوتوماتەريال مەن ارحيۆ قۇجاتتارى قويىلدى. استانامىزدىڭ تاريحىنداعى ەڭ تاعدىرلى كەزەڭدەر تۋرالى دەرەكتەردى جان-جاقتى قامتۋعا تىرىستىق, – دەيدى ۇيىمداستىرۋشىلار.
تۇڭعىش پرەزيدەنت ن.نازارباەۆ ەلىمىزدىڭ الەۋمەتتىك ماڭىزى زور نىساندارىنىڭ اشىلۋ راسىمىنە قاتىسۋى, الەمدىك كوشباسشىلارمەن كەزدەسۋ كادرلارى, حالىقارالىق ۇيىمداردىڭ سامميتتەرىنەن اسەرلى ساتتەر دە نازاردان تىس قالعان جوق. بۇل استانانىڭ ىرگەتاسى قالانعان كەزەڭنەن باستاپ, تاۋەلسىزدىك جىلدارىنداعى تاريحىنا دەيىنگى ارالىقتاعى تاريحىنا ەكسپوزيتسيالار ارقىلى شولىپ شىعۋعا تىپتىرماس مۇمكىندىك ەكەنى انىق.
ءبىر ايتا كەتەرلىگى, كەلۋشىلەرگە ىڭعايلى بولۋى ءۇشىن QR كود ارقىلى مەملەكەتتىك ءارحيۆتىڭ سايتىنا ەنىپ, ماتەريالدارمەن تەرەڭىرەك تانىسۋعا دا مۇمكىندىك جاسالعان.
ەلىمىزدە قالىپتاسقان ەپيدەميولوگيالىق احۋالعا بايلانىستى, ەكسپوزيتسيالار اشىق اسپان استىندا, ءبىر-بىرىنەن ءبىرشاما قاشىقتاۋ ەتىپ قويىلعان. حالىقتىڭ ءوزارا الەۋمەتتىك قاشىقتىقتى ساقتاۋى ءۇشىن ساقتىق شارالارى تۋرالى ەسكەرتۋلەر دە بار.
